العلاقات العاطفية من أمتع الحاجات اللي فى حياتنا وأصعبها فى نفس الوقت، محتاجة من الطرفين مجهود للحفاظ على الحب والاستمتاع به، لكن للأسف البعض ممكن يقع فى خطاء بأنه بيبذل مجهود ويهدر كثير من وقته وطاقته فى علاقة حب بها مؤشرات قوية تدل على صعوبة استمرارية الحب دا، خلينا نقول أبرز العلامات اللي بتقول أنت فى علاقة حب فاشلة ولا ناجحة؟
1 – أنت مبسوط ؟
دا سؤال مهم ومحتاج إجابة صريحة منك.. هل العلاقة اللي انت فيها حاليًا بتخليك مبسوط ؟ ولا المشاكل والزعل موجود طول الوقت ومساحة الانبساط والاستمتاع قلت بينكم اللى هى الهدف الأساسي من الحب؟ لكن قبل ماتجاوب على الأسئلة دى خليك عارف أن اى علاقة فيها مشاكل واختلاف ولكن هل المشاكل دى لها حلول وبعد حلها بتوصل لمرحلة اعلى من التفاهم والتواصل ولاملهاش حل أصلاً وبتلفوا فى دائرة مقفولة وبتزيد الفجوة بينكم يوم بعد التانى لدرجة بتخليك تدورعلى السعادة بطرق تانية بعيد عن شريك حياتك ؟ الإجابة على كل دا هايساعدك كثير فى كونك فى علاقة صح بدعمك وتخليك مبسوط بجد ولا لا بس المهم تكون صريح مع نفسك.
2 – التقبل
(المحب يري النقص والعيب فى محبوبه بعقله.. لكنه لايؤثر فى حكم قلبه اطلاقًا) دى حكمة قديمة عن فكرة التقبل فى الحب، وهى أنك بالرغم انك عارف عيواب شريك حياتك لكنك قابل بالعيواب والمميزات ،بنى آدم كله على بعضه أو بمعنى أدق باصص للنص المليان من الكوب، عندك نضج كافى أننا بشر ومفيش حد مفهوش عيب، المشكلة هنا أن بعض العلاقات بنلاقى فى طرف مش متقبل التانى واحياناً ممكن توصل للمعايرة للجزء الناقص من شخصيته ، عند النقطة دى مهم تعمل واقفة فى العلاقة لأن عدم التقبل هيخلق باب من المشاكل ملوش حل والأهم من كل دا أن الحب الحقيقى مبنى على أنك فى الأساس بتحب الشخص دا كل على بعضه وبكل حالاته ودى من الموشرات المهمة اللى بتنبهك أنك فى علاقة حب محكوم عليها بالفشل هتستنفذ جزء كبير من روحك واحتمال تؤثر على ثقتك بنفسك فى المستقبل .
3 – الثقة ايه أخبارها ؟
من الحاجات المهمة اللى بتخليك مطمن فى العلاقة هو أنك مع شريك حياة بتثق فيه ومعنى الثقة هنا بيشمل اجزاء كثيرة زى أنك واثق من انه مش هيخونك او مش هيبعك عند الأزمات بتثق في شخص قادر يتحمل مسئولية انه يبسطك او يدعمك ويخليك تتقدم فى حياتك واثق انك بيحقق المعنى الحقيقى لكلمة شريك فى الحياة تقدر تعتمد عليه وترمي عليه حمولك وقت ضعفك ودا بيظهر من خلال مواقف بينكم هتكتشفها مع الوقت، لكن مهم تعرف غايب الثقة عموماً من العلامات المهمة اللى بتحذرك من أنك فى علاقة فاشلة هتأثرعلى نفسيتك وعلى ثقتك فى الناس.
4 – المستقبل
هل فىه خطة مستقبلية بتجمعكم طويلة الأجل أو قصيرة الأجل متفقين عليها؟ من العلامات اللي بتدل على إنك فى علاقة غلط هو أنك تكون مع شخص معندوش أى تصور إنكم هتكونو أصلاً مع بعض أو لا، هتلاقيه مش عايز يلتزم معاك بأى نوع من الوعود لأنه حاجة من الأثنين أم أنه مش جاد فى العلاقة ومعتبر أنك شي عابر فى حياته، أو أنه تايه ومش محدد هو عايز إيه من الأساس وفى الحالتين هتكون خسران. كلام شريك حياتك عن مستقبلكم سوا من العلامات المهمة اللي بتأكد إنك جزء مهم من حياته وإنه فعلا جاد فى الارتباط بك هو كلام صعب بس هنعمل إيه!
5- هل شريك حياتك حنين عليك ؟
بجانب كل النقاط السابقة الجزئية دى جايز تكون مش عقلانية لكنها فى الحقيقة مهمة جداً لأنك لما بتكون مع شخص حنين وعنده قدرة على التسامح دا بيذوب جبال من المشاكل بينكم وبيخليك تتقبل الشخص اللي معاك وتحبه أكثر لأنه قادر يغفر ويعدى كل اللى بينكم عكس القسوة والجفاء اللى ممكن يكبر مشاكل أكثر ويعمل حاجز نفسى مع شريك حياتك. قسوة القلب وعدم القدرة على التسامح من العلامات اللي بتحذرك أنك فى علاقة حب هتكون مرهقة لك فى المستقبل.
موضوع الحب مش حاجة سهلة محتاجة مجهود وتقبل وثقة وحاجات كثيرة بتختلف من شخص للتانى على حسب احتياج كل حد فينا لكن مهم تكون منتبه للعلامات اللى بتقول إنك ماشى على الطريق الصح .
