كتير من المقالات والفيديوهات والتحذيرات اتعملت عن معاناة الارتباط بمصور سواء مصور صحفي او مصور فوتوغرافي، منها مش هيكون عنده وقت، وان الكاميرا جزء من جسمه، بالإضافة ان كونه مصور فهو معرض للمخاطر إلا ان الارتباط بمصور زيه اي ارتباط في الدنيا ليه عيوبه ومميزاته ودول من أهم المميزات الارتباط
توثيق اللحظة
المصور عايش على فكرة توثيق اللحظة، سواء منظر طبيعي، كلبة معدية في الشارع، ام وعيالها، مظاهرة طالعة، ما بالك لما ترتبطي بمصور، كل حاجة عملتوها مع بعض او ذكري او مكان روحتوا او اي أول حاجة جربتوها مع بعض هتكون موجودة معاكوا في كل وقت، واشهر مثال على فكرة التوثيق المصور الروسي مراد عثمان صاحب فكرة .follow me
هيشوفك حلوة
دي حقيقي جدا، دايما هيشوفك حلوة، لانه متعود يكون كادر حلو، فلما يجي يصورك هياخدلك أحسن صور وهتتطلعي حلوة حتي لو انتي لسه صاحية من النوم وشعرك منكوش ومتبهدلة أو انتي مش في أحسن حالاتك المزاجية.
الخروجات
طبيعة شغل المصور انه يلف ويدور حوالين الكرة الأرضية عشان يأخد اللقطة المناسبة لموضوع شغال عليه او لحظة معينة حابب يوثيقها وتفضل دايما معه، فمن خلال اللف والمشاوير واللي شافه هيقدر يختار الأماكن اللي تقدروا تخرجوا فيها مع بعض بكل سهولة وهترتحي من سؤال هنتقابل فين او هنخرج فين.
الوقت المناسب
المصورين ممكن يستنوا سنين عشان ياخدوا الصورة المناسبة، وبالفعل في قصص كتير انتشرت عن المصورين قعدوا شهور وسنين في الأماكن البرية عشان ياخدوا لقطة كويسة وينفردوا، كونه عارف أهمية الوقت، هيختار الوقت المناسب عشان تتقابلوا، أو تتناقشوا في مستقبلكوا او يعترف بحبه ليكي.
الفسيخ شربات
من وظائف المصور انه يعمل من الفسيخ شربات، يقدر يخلي من صورة لمقلب زبالة لوحة فنية، فهتلاقيه في المواقف الصعبة هيسهلها عليكي في الأغلب مش هيجي عليكي ويخفف حدة الموقف.
المصور الروسي مراد عثمان صاحب فكرة follow me ، اللي كسرت الدنيا والناس بدأت تاخدها وتعمل زيها، بيقول ان زوجته ناتالي كانت بتتضايق كونه بيصور كل حاجة فقررت تسحبه من ايده ولما شاف المنظر ده قرر يصور ويعمل البروجكيبت بتاع follow me
بإختصار لو وقعتي في حب مصور، وقررت الارتباط بيه متقلقش خوضي التجربة زي اي تجربة هتلاقي حاجات حلوة وحاجات مش لطيفة زي اي علاقة، الكاميرا مش هتبقي ضرتك ولا حاجة بالعكس هتحبيها وهتلاقي نفسك بتساعديه في شغله.
