مين فينا مش نفسها يكون شكلها أصغر من سنها, وتكون أكثر لياقة, وفى قمة رشاقتها, وتفضل كأنها في العشرينات والثلاثينات لأطول فترة ممكنه, الموضوع مش صعب أوى كل الفكره انك تعيشى بشكل صحى وبس
1-السر فى الخضار والفاكهة
كفاية أكل غير صحى ودهون وزيوت وحلويات ومعجنات وسكر وملح ومعلبات وتدخين ومواد حافظة ملهاش أى لازمة للجسم غير انها بتأذيه , وبتتخزن في الجسم وتضر البشره وتأثر على صحتك فى المستقبل ومش هتحسى بأضرارها غير لما تكبرى والأمراض تبدأ تنهال عليكى وساعتها هتبطليهم مش بأرادتك بأمر من الدكتور فبطليهم من دلوقتى,وهتلاقى نفسك بتستمتعى بحاجات مكنتيش واخده بالك ان طعمها أحلى وهى طبيعية ومن غيرأضافات مضره زى طعم الخضار اللى نسينا نكهته من رش الملح الكتير عليه .. خدى السكريات من الفاكهة مش من السكر المصنع الغير مفيد بالمرة, كمية الفيتامينات المهولة اللى موجوده في الفاكهة والخضار هتخليكى تستغنى عن كل مستحضرات التجميل أصلا.
2-الرياضة .. الرياضة
أبدأى حالا مهما كان سنك وأختارى أى رياضة بتحبيها ومارسيها بس الأهم انك تواظبى عليها حتى لو كنتى هتمارسى أسهل وأبسط رياضة اللى هى المشى انزلى كل يوم اتمشى نص ساعة على الأقل , هاتى ماشية في البيت واصحى كل يوم أتمشى عليها شوية قبل ماتبدأى يومك هتفرق معاكى جدااا,ولوكنتى من الأشخاص اللى صعب تلتزم برياضه مع نفسها انزلى أشتركى في جيم حتى لو هتروحيه مرتين فى الأسبوع بس.
3-صحتك النفسية
من أهم الأشياء لجمالك الخارجى هو جمالك الداخلى أولا وانك تكون مرتاحة ورايقة وفى أحسن حالتلك وبالتالى كل ده بينطبع على شكلك وتصرفاتك فبتكونى أجمل وأصغر, وبما ان صعب جدا ده يحصل في ظل ضغوطات الحياة اليومية اللى بنعشها فمعندكيش حل غير ممارسة الهوايات اللى بتحسن المزاج والنفسية زاى اليوجا والتأمل والرقص وسماع المزيكا وقراية الكتب المسلية (حتى لو هتقرى ميكى وفلاش) والكتابة والسباحة أومشاهدة الأفلام والمسرحيات الكوميدية أو أى هواية بتحبيها وبتستمتعى بيها عموما.
4-السفر
سفرى كتير سافرى على أد ماتقدرى متضيعش أى فرصة سفر مهما كان السبب الحاجات اللى بتشوفيها وبتتعلميها في السفر بتخليك تعيش وقت أكتر وبتحسسك انك عشيتى عمر طويل, بختصار مفيش أى حاجة هتخليكى تحسى انك خفيفة قد السفر .
5-نامى
نامى بدرى مفيش أى حاجة بتكبر العمر وبترهق الجسم زى السهر والنوم القليل , وأصحى بدرى واستمتعى بالشمس وهى بتشرق يومك كله هيختلف وهتبقى في قمة نشاطك وحيويتك ,الحاجات اللى ممكن تنجيزها لو صحيت بدرى بتكون الضعف عن لو صحيت متأخرة ومكسلة ومش قادرة تعملى حاجة ,نامى بدرى هتقومى فايقة ومبتسمة,مفيش خسسان أو نشاط أورشاقة أوجمال أوصحه بدون نوم فنامى قبل اما يجى عليكى الوقت اللى يكون فيه النوم صعب .
6-الميه
اشربى ميه كتييير خلى جانبك قزازة ميه وانتى رايحة الشغل خدى معاكى قزازة ميه وانتى نايمة خلى على الكومود جانبك قزازة ميه طول مانتى قاعدة واقفه ماشية في الشغل في النادى في أى مكان متفارقش ايديكى قزازة الميه قبل أى أكل حتى لو سناك خفيف بردك أشربى ميه على قد ماتقدرى لو عرفتى أن الميه هى اللى بتحارب التجاعيد وهى اللى بتأخر ظهورها وبتحافظ على نضارة البشرة مش هتعملى أى حاجة غير أنك هتشربى ميه هتشربى ميه هتشربى ميه.
دي روشتة سريعة كده عشان تقدري تحافظي علي حيويتك ونشاطك وشكلك لحد فوق الخميسين زي ماكلنا بقينا بنبص علي سميرة سعيد او ليلي علوي وشيرين رضا ونسال هما ازاي بقوا كده…ولو عندك اضافات للروشتة دي ابعتي قوليلنا عليها