الثقة من النفس دى من أكثر العوامل جاذبية اللى ممكن تبقى موجودة فى الواحد ومش بس عشان هى بتخليه أكثر جاذبية ولفتًا للي حواليهم, لكن كمان لأنها بترفع من قيمة الإنسان قدام نفسه وبتخليه مقبل على قرارت كتير أحيانا بيبقى عارف إن نسبة الخطأ فيها كبيرة بس مع ذلك بيجازف بقلب ودى الثقة فى حد ذاتها!

وعشان كده، قررنا نقولكم على 6 حاجات تساعدكم تكونوا واثقين ف نفسكم أكتر:

 

1- بطل تكرهك.

الثقة فى النفس عمرها ما هتيجى من محاولة التقليل من نفسك, أو إنك تسمح للحظة شك تأثر فيك وقدراتك أو الأسوأ, تسيب الناس تقرر لك. لازم تبقى عارف قدراتك ومستواها وتتصرف على أساسها ومتكونش عدوك الأول.

2- فين الضحكة الحلوة؟

خد بالك من مظهرك. بداية من نظافتك الشخصية للبسك النظيف وضحكتك الحلوة! لأن هو ده اللى هيرسم انطباع كويس جوّه عقول الناس وهيديهم إيحاء أنك شخص مميز. خليك هادى, بتتكلم بحساب وفخور بثقافتك وخلفيتك.

 

 

3- خليك مع اللي بيدعموك.

حاوط نفسك بناس بتحبهم وبيحبوك على قد ماتقدر, بيشجعوك على كل الأفكار اللى بتيجى ف دماغك مع تقديم كل الدعم الممكن تحتاجه.. اللى بيشوفوك إنسان موهوب ومبدع أو بيشوفوك دماغك نضيفة حتى لو انت مش كدة أوي يعني! لو عندك ناس كدة إوعى تفرط فيهم.

4- اشتغل كتير على نفسك.

حاول أنك تتمسك بمواهبك واشتغل عليهم كتير ومع الوقت هتلاقى نفسك برنس مجالك ومحدش قدك. اتعلم أكتر ونمي من نفسك كتير فبالتالى هتصدق نفسك

5- سيبك من الطاقة السلبية والسلبيين.

سيبك من أى طاقة سلبية سواء ف شكل أفكار او مواقف او ناس لأنهم مع الوقت بيآثروا عليك ومبيزودوش ليك أى جديد غير الشك ف كل حاجة إيجابية سواء فيك أو فى اللي حواليك.

6- تقبل نفسك بكل ما فيها!

 

 

آخيرا, لازم تتقبل فكرة إن مش كل الناس هتحبك ومهما حاولت ترضي جميع الأطراف مش هتعرف وهيجيلك إحباط. حاول تحب كل الناس, وتخدم كل اللى حواليك ومتستناش مقابل من حد وتعرف انك شخص كويس بموافقة الناس أو من غيرها!

فى النهاية الثقة بالنفس عمرها ما بتييجى بالساهل! حاجة مكتسبة تماما وبتيجي بالتدريج.. بس لما بتوصل بتعرف قد إيه كان فايتك كتير

 

—–

كتابة: ساندي حسام.