طبعاً كلنا عارفين “الحب من أول نظرة” ويمكن كتير مننا جربه وعاشه، وهو عبارة عن كيميا كدة بيتحصل بينك وبين الشخص التاني بمجرد ما عينك تيجي في عينه فا تلاقي نفسك ارتحتله وحبيته، لكن هل تعرف إن الخطفة دي ممكن يكون ليها علاقة بالأبراج؟
انهاردة هنقولكوا على الـ 6 أبراج اللي اصحابهم يتحبوا من أول نظرة، اقروا المقال واعرفوا إذا كان برجكوا واحد منهم ولا لأ.
1- برج الميزان
مواليد برج الميزان عادة بيكونوا شخصيات إجتماعية ومحبوبة من كل الناس، ده غير إن دمهم خفيف وقاعدتهم حلوة مفيهاش عقد ولا مشاكل، بالإضافة إلا إنهم من أكتر الأبراج اللي بتهتم بمظهرها واناقتها فا بيشدوا إنتباه كل اللي يشوفهم.
2- برج العقرب
على الرغم من إن اصحاب برج العقرب عادة بيبانوا غامضين وساعات كتير مغرورين، إلا إن ليهم جاذبية كدة تشد أي حد يشوفهم من النظرة الأولى، ده غير انهم لما تعرفهم أكتر هتكتشف إنهم من أكتر الأبراج الوفية والمخلصة لأصحابها وعشان كدة دايماً بيكونوا محبوبين.
3- برج الثور
لما نتكلم بقى على برج الثور لازم نقول اللي لينا واللي علينا، فعلى عكس اللي معروف عنه بإنه برج روتيني وممل، إلا إن جاذبيته وخفة دمه بتخليه يدخل القلب من غير إستئذان، ده غير إن ليه كاريزما كدة مش موجودة في غيره من الأبراج.
4- برج الجدي
اما بالنسبة لمولود برج الجدى فا هو زي ما بيقولوا كدة “صاحب صاحبه”، دايماً موجود وقت اللزوم، وعشان كدة اصحابه بيجروا عليه دايما لما بيحتاجوا اي نصيحة، وهو عمره ما بيتأخر عنهم، وعشان دة دايماً محبوب من الكل.
5- برج السرطان
لو تعرف حد من برج السرطان تبقى أكيد عارف قد ايه مواليد البرج ده كائنات حساسة بتتاثر من أقل حاجة، لكن بالرغم من حساسيتهم دي إلا إن قلبهم أبيض بيسامحوا وبينسوا بسرعة، وده اللي بيخلي كل اللي يعرفهم واللي ميعرفهمش يحبهم.
6- برج الأسد
وأخيراً بقى يجي برج الأسد عشان يختم القائمة بروحه الحلوة والمرحة وثقته في نفسه اللي بتخليه يسيطر على أي قاعدة يقعد فيها، ده غير الطاقة الإيجابية اللي بينشرها على كل اللي حواليه وعشان كدة هو حقيقي من الأبراج اللي تتحب من أول نظرة.
