لو مش عايزيين توصلوا لمأساة الطلاق ويتحكم على علاقتكوا بالفشل، لازم كل زوجين يعرفوا ايه هي الأسباب الرئيسية اللي ممكن توصل حياتهم مع بعض لحارة سد وميلاقوش قدامهم أي حلول تانية غير إنهم ينفصلوا، ويحاولوا على قد ما يقدروا يتجنبوها عشان يحافظوا على بيتهم وحياتهم الزوجية.
انهاردة، ومن خلال المقال البسيط ده هقولكوا ايه هي الـ5 أسباب الرئيسية للطلاق، ركزوا معايا شوية لو سمحتوا..

1- الخيانة

الخيانة تعتبر سبب من أهم الأسباب الرئيسية للطلاق وأكترها شيوعا، فبمجرد ما بيكتشف إحدى الطرفين خيانة الأخر ليه بتنهار فوراً علاقتهم وبيكون الحل الأمثل ساعتها هو الطلاق، لإنهم حتى لو كملوا عمرهم ما هيقدروا يرجعوا تاني زي زمان وهيفضل في بينهم حاجز نفسي محتاج سنين عشان يتعالج.

2- عدم التوافق الجنسى

العلاقة الجنسية بين أي زوجين بتلعب دور مهم جداً في نجاح أو فشل حياتهم الزوجية، يعني لو مكانش كل طرف منهم راضي عن العلاقة دي ومحققاله التوافق الجسدي –الضروري جداً لبناء علاقة عاطفية قوية- هيحس بالإحباط ويبدأ يختلق في مشاكل من الهوا واللي بدورها هتوصلهم للطلاق، وعشان كدة بيكون الحل في الحالة دي هو استشارة طبيب وطلب المساعدة.او في اضعف الحالات هتوصل احد الاطراف للخيانة اللي هي بالتأكيد هتوصلهم لطريق مسدود وينتهي بالطلاق.

3-المشاكل المادية

الفلوس زي ما تقدر تحققلكوا السعادة، تقدر برده تدمرلكوا حياتكوا وتقلبها رأساً على عقب، وده لإن المشاكل المادية بتكون سبب في التوتر المستمر وعدم الإحساس بالأمان، واللي غالبا بيؤدى للطلاق، وعلى الرغم من إن الفلوس مش دايماً بتكون سبب أساسي للطلاق، إلا إن ليها دور كبير جداً.

4- عدم التفاهم

تتعتبر عدم القدرة على التفاهم بين الزوجين برده سبب أساسي ومهم جداً بيؤدي للطلاق، وده لإنه بيعمل فجوة كبيرة بينهم في التواصل بشكل سليم ومرضي للطرفين، وعشان كدة لو واجهتكوا مشكلة حاولوا على قد متقدروا تتناقشوا فيها مع بعض وتوصلوا لحل يرضيكوا انتوا الاتنين.

5-الإدمان

“البيت والعيلة”، “الإدمان والمخدرات”، جملتين مينفعش يركبوا ابدا مع بعض، وعشان كدة يعتبر الإدمان بكل أنواعه -سواء كان مخدرات، كحول، قمار أو غيره- واحد من أكتر الأسباب اللي بتدمر الحياة الزوجية وبتؤدي للطلاق.

6- عدم القدرة على الإنجاب

وأخيراً بقى “الخلفة”، واللي بيعتبرها كتير من الناس أهم من كل الأسباب اللي فاتت دي، لإن الهدف بالنسبالهم من الزواج بيكون الخلفة، وخصوصاً الرجالة، واللي لو واحد فيهم قرر ميطلقش مراته عشان مبتخلفش بيروح فوراً يتجوز عليها… في رأي دي نقطة هشة ومفروض متوصلش لكده بس احنا في مجتمع تفكيره منصب في فكرة الزواج للانجاب معظم الوقت بيخلي حتي الشخص المتجوز عن حب ممكن يوصل يطلق الطرف التاني عشان محققلوش الاشباع في النقطة دي .