Multiethnic Group of People Socail Networking at Cafe
الفيسبوك أول ما بدأ أو بمعنى أصح أول ما سمعته عنه كان من صديقة أكبر مني كانت بتشرح لي أزاي الموقع ده قدر يقربها من صحابها القدام في المدرسة والكلية لما دورت عليهم بأسمهم وأزاي قدر فعلا الفيسبوك يوصلهم لبعض تاني، وبغض النظر عن دوافع مارك الرئيسية في أختراع الفسيبوك، فالمفروض الغرض الرئيسي منه هو التواصل الإجتماعي، بس بعد مرور سنين طويلة من إستخدامه قدر المصريين يخلوا للفيسبوك إستخدامات تانية خالص غير غرضه الرئيسي، زي الكتاب اللي بيسند الترابيزة، وبطرمان المربى اللي بقى بطرمان نعناع الخ الخ.
1- عايزة أوصل رسالة معينة لحد معين
هاش تاج #موجهة، أو بمعنى أصح التلقيح، الفسيبوك أصبح ساحة رائعة وجيدة للتلقيح على الناس اللي مزعلينك، ويومياً لازم تقابل على الهوم بتاعك بوست تلقيح سواء واحد بيلقح على زميلة في الشغل وهو قاعد ع الجهاز اللي جمبه اساسا، او واحد متخانق مع صاحبته ومش راجل كفاية يقولها في وشها فينزل بوستات تلقيح والبنت نفس الكلام.
2- الردح
ودي المرحلة المتطورة من التلقيح، لما حد من الاتنين يكون جريء كفاية، والموضوع يتطور عن رمي الكلام على مجهول ويبدأ يذكر اسم الشخص أو يكون جبروت كفاية ويعمله تاج، وساعتها يتلم صحاب ده ومناصرين دهون وتبدأ وصلة من الردح بردو لازم تقابلها يومياً، يجي واحد يقولي طيب م ده تواصل إجتماعي يا متعلمة يا بتاع المدارس، وللشخص ده أقوله أقعد ساكت.
3- تحقيق الرغبات الدفينة
الفيسبوك بيسمح لك لفترة أنك تعمل بروفايل بأسم تاني غير أسمك وصورة غير صورتك لحد ما تبدأ الناس تعملك ريبورت ويقفله ليك، في الفترة دي بقى كل اللي عنده طموحات مريبة دفينة بيحاول يفرغها في الناس على الفيسبوك، فتلاقي ناس عاملة اكونت fake وحطا صورة واحد بتعذبه واحدة ويبعت لبنات كتير جدا نفس الرسالة “أنا ممكن أعيش زي الكلب تحت رجليكي” على أمل أن رسالة منهم تلمس مع واحدة وتاخد وتدي معاه في الكلام وبي دي إس إم وكلاب وييلف وكده.
4- ظهور السوبر هيروز
أنا شايفة أن دي موهبة مهياش سهلة، أن يكون عندك الجرئة انك تعمل أكونت على الفيسبوك وتسميه بأسم السوبر هيرو اللي كان نفسك تكونه من وأنت صغير، حازم انسولين، أميرة بحجابي، أمير الأحزان، صقر امبابة، بهدورة الدرب الأحمر..
5- عرض أزياء
في ناس كده عندك ع الفيسبوك مهمتهم الصبح أنهم يفرجوك هما لابسين أيه قبل ما يخرجوا، وعادة بيكون كل يوم طقم مختلف، ويقفوا أدام المرايا بالكاميرا وياخدوا بوظات عارضين الأزياء كده، أكيد عندك على الأقل شخص واحد بيعمل كده، عارفه؟ أعمله unfollow . لأن معظمهم –وليس كلهم بيكون لبسهم وحش اساساً
6- الحزن السيكسي
ودي عادة حاجة بتعملها البنات مش الولاد، حيث الصور السيكسي الحزينة المتمثلة في نص كتفها مع خصلة من شعرها مع عين واحدة من عيونها الحزينة السيكسي وتقوم كاتبه فوق الصورة بيت شعر من درويش. وعادة ده بيكون طلب صريح وواضح أنها محتاجة ترتبط بسرعة وإلا هتعرض حياتنا كلها للخطر.
