مكتئبة؟ مقريفة؟ زعلانة؟ نفسيتك وحشة؟ معندكيش نفس تعملي اي حاجة؟ كل دي مشاعر طبيعية كلنا بنعيشها وبنمر بيها من وقت للتاني لاسباب مختلفة، منها مثلاً ضغوط الشغل او انتهاء علاقتك بحبيبك او الخلافات العادية اللي بتحصل في كل بيت وغيرها من الاسباب اللي كلها ليها تأثير مباشر في نفسيتك، وعشان كدة هنقولك انهاردة عن طرق مختلفة تقدري بيها تحسني مزاجك وتظبطي مودك وكلها تقدري تعمليها بنفسك ولنفسك.
1-لو مضايقة كلي شيكولاتة
كلنا طبعا عارفين أن الشيكولاتة لها تأثير كبير على هرمون السعادة وبالتالي تقدر تحسنلك مودك وتظبطهولك فورا، يلا مستنية ايه قومي بسرعة هاتي لنفسك الشيكولاتة اللي بتحبيها وافتحي التلفزيون على فيلم حلو او شغلي اغنية هادية واستمتعي بالسهرة انت وشيكولاتك وبس، حبي نفسك لانها تستاهل تتحب
2-لو زهقانة سافري
قاعدة على الشاطيء تحت الشمسية بتستمتعي بالهوا النقي، والبحر قدامك بلونه الأزرق الجميل، واشعة الشمس فوقيكي بتزود حلاوة المنظر الطبيعي ده؛ عايزة ايه اكتر من كدة يخرجك من حالة الزهق والملل اللي ممكن تكون مسيطرة عليكي بسبب حياتك الروتينية وتكرار تفاصيلها بشكل ممل؟!
3-لو مودك وحش اعملي شوبينج
الشوبينج ثم الشوبينج ثم الشوبينج، مهما كان السبب اللي مخلي مودك وحش ونفسيتك مش مظبوطة، فبمجرد ما تنزلي تشتري طقم ولا جزمة جديدة او حتى ماكياج، هتلاقي “الحياة بقى لونها بمبي” فوراً
4-لو مكتئبة اعملي نيولوك
همممممممم…. يا ترى زيادة ثقتك بفسك مش كفيلة تخرجك من حالة الاكتئاب اللي انتي فيها دي؟ يبقي الحل في “النيولوك”، انزلي روحي للكوافير وغيري لون شعرك او اعملي قصة جديدة، بيقولوا ان البنت لما بتقص شعرها بتحس انها قادرة بعد كدة تغير اي حاجة مش راضية عنها في حياتها “البداية تأتي من هنا”.
5-لو مش مرتاحة العبي رياضة
الرياضة مش بس هتحافظلك على شكل جسمك وتخليه شكله حلو ومثالي ورشيق، لأ دي كمان هتساعدك على التخلص من الطاقة السلبية وهتديكي احساس بالانتعاش وبالتالي هتحسن حالتك النفسية وهتساعدك على الاحساس بالراحة والتخلص من التوتر والقلق.
6-لو حاسة بالوحدة هاتي قطة
مش لازم قطة على فكرة، لو مش بتحبي القطط ممكن تجيبي كلب مثلاً او اي حيوان اليف تاني تكوني بتحبيه وده عشان تتخلصي من الاحساس بالوحدة، واللي كفيل يخليكي تدخلي في حالة من الاكتئاب متعرفيش تخرجي منها بسهولة.
