فترة العشرينات من عمرنا هى المرحلة اللي بيكون فيها حاجات كثيرة بتحصلنا من أول علاقاتنا واختيار الكلية والدراسة لحد بداية الحياة العملية والشغل، يعنى نقدر نقول أن سن العشرينات بيشوف أول كل حاجة على رأي الأستاذ أحمد السقا فى فيلم (عن العشق والهوا) !. وطبعا نتيجة لمواجهة الحياة من بدري فى سن العشرينات بتحصل نوع من اللخبطة عند البعض فى جوانب كثيرة من حياته لكن خلينا نشوف إيه الحاجات اللي ممكن تتغير فينا واحنا داخلين على (سن الثلاثينات): –

1 – الحب والبهدلة

زى ماقولنا إن فترة العشرينات فى الغالب بتشهد قصص حب بيكون فيها شوية بهدلة، ودا بسبب إن سن العشرينات هو السن اللي إحنا مفروض أصلاً بنتعرف على نفسنا! أيوا متستغربش انت لسه فى مرحلة اكتشاف نفسك واحتياجاتك الحقيقية ودا اللي بيعمل الصدام بينك وبين شريك حياتك، بالإضافة لأن الإختيار فى السن دا مبني عندك على المشاعر وبس، ودا طبعًا غصب عننا، باختصار لو أنت عايش متبهدل فى قصة حب دا كله هيخلص معاك لو أنت داخل على سن الثلاثينات هتكون عايز حد يشاركك حياتك وأفكارك فعلًا مش مجرد حتى يهتم بك اهتمام سطحي، واحتمال تكون مستمتع بأنك سنجل وتطبق مثل ( اتقل تخد حاجة نظيفة)!

 

 

2 – الوعي والمشاكل

أكيد كل مرحلة بنعيشها فيها مشاكل معينة حسب كل ظروف بنمر بها، فى سن العشرينات واللي تعتبر بداية انطلاقنا فى الحياة بنلاقي صعوبات بنواجها وبعض الصدمات فى التعامل مع الواقع ، ودا بيخلى البعض يصاب بالإكتئاب واليأس احيانًا، لكن مع الوقت والمواجهة بنكون أقوى من الأول.

مع كل ضربة وحاجة صعبة بتحصلنا بيكون في مستوى أعلي من القوة بنوصله، ودا بيخليك وأنت داخل على سن الثلاثينات بتستقبل المشاكل بنفسية بطريقة مختلفة لأن دا مر عليك قبل كدا وقدرت فعلًا تتعامل معاه، وحتى لو المشاكل كانت من نوع مختلف معداش عليك قبل كدا هيكون عندك مبدأ مهم قدرت توصل له :-

“The problem is not the problem. The problem is your attitude about the problem”

بمعنى أن التعامل مع المشاكل هيكون بدرجة معينة من النضج والقوة هيخلوك تتعامل مع المشكلة من غير اكتئاب وحزن ولكن بشوية هدوء وعقل وتوازن أكبر، ف أطمن سن الثلاثينات النضج فيه هيخليك ثقيل وقوي وانت بتتعامل مع مشاكلك عمومًا.

 

 

3 – العلاقات.. (الأصحاب والعائلة)

فى سن العشرينات بنكون أكثر تمرد على الواقع عمومًا وفى الغالب بنكون فى مشاكل مع أهلنا بسبب اختيارتنا اللي فيها نوع من الإصرار على إن اختيارنا هو الصح، لكن فى الثلاثينات الموضوع بيختلف هتلاقى نفسك بتستغرب ازى الأهل كان رأيهم صح وفي بُعد نظر ليهم فى موضوعات معينة واحنا مكناش عارفين، ودا بيقرب بينك وبين أهلك كثير، يعنى من الآخر لو فى اختلاف بينك وبين أهلك الإختلافات دى هتذوب كل ماتكبر.

موضوع الأصحاب بقي هيكون شبه الغربلة: بمعنى إن الشلة الكبيرة وأصحاب المدرسة على الجامعة والجيران المجموعة دى كلها هيحصلها عملية فلترة محترمة، ودا نتيجة مجموعة عوامل زى المواقف ومعرفتك للناس اللي شبهك وترتاح معهم ومين من أصحابك قادر يحتفظ بعلاقتكم رغم الظروف .. وهكذا. من الآخر الدايرة الكبيرة هتقل ودى مش هتكون حاجة وحشة بالمناسبة، بس هيكون عندك شعار فى سن الثلاثينات كدا وهو ( لم يعد هناك مزيد من الوقت والطاقة للأشخاص الخطأ).

 

 

4 – شغلك وفلوسك

الشغف.. الشغف وبعدين الشغف! الكلمة اللي بنفضل نقولها ونسمعها وندور عليها لحد مابنزهق ونزهق اللي حولينا بيها، وهى إيه الكاريير اللي أنا بحبه فعلًا حتى لو بعيد عن كل اللي درسته واتعلمته طول حياتي، الرحلة دى أحيانًا بتاخد شوية وقت فى سن العشرينات والشخص اللي عايز دا حقيقي عشان يشبع حاجة معينة جواه بعيد عن التمثيل والاستعراض على السوشيال ميديا بيلاقي نفسه فى النهاية لأن بيكون فعلًا جرب مجالات وحاجات كثيرة قدر يوصل من خلالها للحاجة اللي بيحبها بجد، الثلاثينات هتكون فترة الاستقرار نوعًا ما فى الجزئية دى لأنك عرفت الكاريير بتاعك وموجه كل طاقتك لتطوير نفسك، ودا كمان هيخليك تعمل فلوس كويسة لأن حبك وابداعك فى حاجة معينة هيخليك مميز فيها.

اطمن سن الثلاثينات هو سن هيخليك مستقر مهنيًا وماديًا طول مانت بتطور نفسك وحددت هدفك وربنا معاك.!

 

 

5 – جسمك والتنمية البشرية

ماتستغربش من اللي هتسمعه.. مفهوم (الهيلثي) عندك هيتغير يعنى لو بتعتبر أن الوجبات السريعة الكافيين او التدخين وغيرها من الحاجات اللي بنعتبرها كلام تنمية بشرية مضرة بالصحة وبنتجاهل دا واحنا ضميرنا مرتاح مش عيزة أصدمك بإن الرغبة فى الحافظ على شكلك وجسمك وإنك تفضل شباب طول الوقت هتخليك تعيد النظر فى كل عاداتك.. وبالنسبة للستات مش محتاجة أقولك أن عدم الحفاظ على جسمك وبشرتك وانت داخل على الثلاثينات احتمال يكون له ثمن كبير! يعنى لو انت مجهز نفسك وجسمك فى سن العشرينات دا هيخلك تدخل الثلاثينات وانت مطمن على شكلك وصحتك.

 

 

6 – الخروجات والتنطيط

واحنا فى سن العشرينات بنكون عندنا طاقة وحماس وفضول التجربة فى أعلي درجاته من أول تجربة كل الكافيهات والمطاعم لحد السفر والرحلات مع الشلة ودى حاجة حلوة لكن الإنبهار بكل دا هيقل تدريجيًا، هتبقى بتخرج لكن مش بتنطيط وانبهارات لأن فى عوامل ثانية بتحكمنا فى سن الثلاثينات زى الوقت والتركيز فى الشغل أكثر والاهتمامات نفسها بتتغير واشتياقك للسفر هيكون بغرض الفصلان من كل المسئوليات والشحن مش لمجرد اللعب وبس، ومستغربش لو لاقيت نفسك مستمتع وانت بتتفرج على مسرحية العيال كبرت او فيلم قديم وانت قاعد مع عائلتك القعدة دى هتكون عندك بالدنيا .

حاجات كثيرة بنعملها فى سن العشرينات، غصب عننا بنبذل مجهود كبير فيها بحكم أننا لسه بنجرب وبنتعلم ، وأكيد هنفضل نتعلم فى كل مرحلة ، النضج بيعمل من كل حد فينا شخصية قوية وجذابة وقادرة انها تدير حياتها بشكل أفضل.

كتابة: صفاء أحمد.