في رجالة بيجمعنا بيهم شغل او دراسة و دول مهما كانت صفاتهم لا تطاق, فمش مهم طول ما المدة اللي بتجمعنا بيهم قليلة.. اما اذا الراجل اللي قدامك ده شريك حياتك و المفروض هاتقضي معاه فترة طويلة – فلازم تاخدي بالك. لازم الاول تكوني متأكدة ان مفيش بني ادم كامل – لكن دول اسوأ صفات الرجالة اللي معظم البنات و الستات اجمعوا علي استحالة الحياه معاهم:
في مقال سابق اتكلمنا عن 6 انواع تبعدي عنهم وهنا بنكملهم لانهم كتير قوي : لقراء المقال السابق اضغط هنا

بخيل
canvas

و هنا بخل المشاعر اسوأ بكتير من بخل الماديات. انه يبخل عليكي بمشاعر و كلام حلو (حتي لو الفعل برده مهم) اوعي تدوري علي عذر و تقولي اصله مبيعرفش يعبر عن مشاعره – في الاخر كل حاجة بتتغير و بيفضل الراجل الحنين هو اللي يهون علي الست صعوبات الحياه – والست في الاخر مهما كانت مبسوطة, قوية و مش ناقصها حاجة – لما بتتعب مبتحتجش الا لكلمة حلوة تصبرها و مشاعر شريكها يدعمها في ضعفها عشان تخليها تكمل

 

كداب

LAAAcIO

الكداب بيبقي فاكر نفسه زكي و محدش عارف انه بيكدب – لكن من كتر ما بيكدب بينسي و ممكن لو سألتيه علي نفس الحاجة يجاوبك اجابات مختلفة. الكداب لو صارحتيه بكدبه هايعملل حاجة من الاتنين, يا هايقولك الحقيقة و يبرر بكدبة جديدة او عمره ما هايخليكي تمسكي عليه حاجة ممكن تفضلي فاكراها, و ممكن يوصل الموضوع انه يخليكي تشكي في نفسك و يحاول يوصلك انك بقيتي مجنونة و بتتخيلي حاجات.

 

خاين
8f3cd3b77fee093181445081c4b7d6b3_123696586_147

اكيد مفيش بنت او ست تقدر تستحمل انها تعيش مع راجل خاين – قصة مني زكي في سهر الليالي و استحمالها طول عمرها دي بصراحة اوڤر شويتين – و خصوصا انها طول عمرها عارفة ان جوزها بيخونها و واجهته مرة واحدة بس, مرة واحدة بس لما تعبت… اوعي تصدقي ان لو سامحتيه مرة مش هايعمل كده تاني – لأ اللي عمل مرة يعمل عشرة.. البنت او الست لما الراجل بيخونها – بتحس اسوأ احساس في الدنيا, ثقتها في نفسها بتتهز و بتسأل نفسها اسئلة كتيرة و ساعات بتلوم نفسها كمان – بس صدقيني مفبش اي مبرر للخيانة

 

شكاك

b1c07f818767efab9925161292301a9a_123457111_147

الراجل الشكاك ممكن توصل بيه الدرجة انه يركبلك كاميرا في البيت – او يتصل بيكي كل 5 دقايق يسألك بتعملي ايه و ممكن يعرف باسوورد اي حاجة بتاعتك و يفتحها من وراكي – و هو اصلا لو سألك هاتديهاله – بس هو بيحب يعيش نفسه في دور انه هايكتشف حاجة مريبة ياعيني انتي مخبياها ممكن تكوني قاعدة مع صحباتك في مكان و فجأه تلاقيه في وشك – مش عشان هو عاملك مفاجأه – لأ ده عشان يتأكد انتي بتعملي ايه.

 

نكدي
hqdefault

الراجل اللي ينكد عليكي ده اسوأ الرجالة – ممكن تكوني في عز فرحتك و بكلمة واحدة ممكن يقفلك و ينكد عليكي. الراجل النكدي مهما نجحتي و تفوقتي في اي حاجة (اي حاجة: دراسة, شغل او حتي اكلة عملتيها) فعمره ما هايحسسك بأنك عملتي حاجة – و هاتلاقيه دايما بيحبطك و يقلل من اي حاجة انتي بتعمليها. لو خرجتوا مثلا و المفروض انكوا مبسوطين – فهتلاقيه عمل اي حاجة او قال اي حاجة تنكد عليكي.. لو عاملة له اكلة بنفس: هايقولك عادي في احلي بكتير لو نجحتي في كورس مثلا و لقاكي فرحانة: عادي يعني ده كورس انتي فاكرة نفسك خدتي نوبل

 

ابن امه
3

طبعا مش محتاجة اقولك الاعراض اللي هاتجيلك لما تعاشري راجل ابن امه, احنا ممكن نكتبلك مجلدات في الراجل ابن امه – بس اهم الحاجات اللي تأكدي انها هاتحصل:
هاتكوني انتي لوحدك اللي شايلة مسؤلية – مامته هي الامر الناهي لأي حاجة – مفيش قرار واحد (واحد) هو ممكن ياخده – ممكن تلاقي مامته في كل خروجة معاكوا (عادي جدا) – مفيش خصوصية: كل اسرارك و كل حاجة بينكم مامته عارفاها – ممكن تكونوا مبسوطين انتي و جوزك و فجأه يقلب عليكي – الست الحاجة هاتتدخل في كل كبيرة و صغيرة (بمعني الكلمة) اسامي عيالكوا – المدارس و الحضانه اللي هايدخلوها (يدخلوا حضانه ليه ما تخلي مراتك تقعد بيهم, عمرنا ما دخلناكم حضانه) – تربية عيالك نفسها – كل حاجة ممكن تتخيليها او متتخيلهاش بذمتك, تقدري تعيشي مع حد كده؟