شهر أكتوبر مش شهر عادي كدة زي باقي الشهور، وده لإنه فيه مميزات كتير بتخليه واحد من أحسن شهور السنة، من أول الجو اللي بدأ يتعدل وأوراق الشجر اللي بتغطي الأرض بمنظر طبيعي جميل واللبس الشتوي اللي كلنا بنحبه والمشروبات الساخنة اللي مبنشربهاش غير في الشتاء وغيرها من التفاصيل الكتير اللى بتخلي شهر أكتوبر شهر مختلف، ده غير شوية أسباب تانية هنقولك عليها في المقال ده.

1-شهر العظماء

1

سمعتي أكيد كتير إن شهر أكتوبر هو شهر العظماء، لكن يمكن تكوني مش عارفة سموه كدة ليه!
شهر أكتوبر اتسمى “شهر العماء” لإنه شهد ميلاد كتير من الشخصيات المهمة زي بيل جيتس، ألفرد نوبل ، احمد شوقي، وغيرهم، ده غير كم الفنانين اللي اتولدوا في الشهر ده واللي اشهرهم “الهضبة” عمرو دياب، النجم محمد منير، الفنانة شيرين، واليسا وغيرهم من النجوم اللي كلنا بنحبهم.

2-مشروبات الشتاء

2

الهوت شوكليت، السحلب، حمص الشام، الهوت سيدر، القهوة وغيرها من المشروبات الشتوية اللى بيتميز بها فصل الشتاء، والتى دايماً بيكون ليها طعم مختلف فى أيام البرد سواء كان الصبح أو بالليل.

3-الجو حلو

3

وطبعاً منقدرش ننكر إن الجو مع بداية شهر أكتوبر بيبدأ يتعدل ويبقى جميل، مع لسعة برد خفيفة كدة تفتح النفس وتعدل المزاج، فا لا منه حر زي معم شهور الصيف ولا برد زي الشتاء.

4-مكياجك مش هيسيح

4

أكتر حاجة بقى بنعاني منها كلنا كبنات خلال الصيف هو المكياج اللي بيسيح بسبب الحر والشمس، وخصوصاً لو كانت بشرتك دهنية، لكن مع دخول شهر أكتوبر واعتدال الجو هتختفى تمامًا المشكل دي.

5-لبس الشتاء اللى بنحبه

5

السويت شيرت والسكارف والبوت والجاكيت الجلد والبلوفرات الواسعة وغيرها من الهدوم الجميلة اللي بنحبها كلنا، واللي هنرجع نلبسها تاني مع دخول شهر أكتوبر اللي بيعتبر بداية فصل الشتاء.

6- قعدة البيت مش مملة

6

عادة كتير من البنات بيكرهوا قعدة البيت لإنها مملة ومفيش حاجة تتعمل، وخصوصًا فى فصل الصيف بسبب الاجازات والسفر والخروج وكدة، أما بالنسبة لشهر أكتوبر فا القاعدة في البيت بتكون ممتعة ومسلية، تقدري تقومي تعملي مشروب سخن أو شوربة عدس مثلاً وتقعدي قدام التلفزيون مع عيلتك تتفرجي على أفلام من غير ما تزهقي.

7- الهالوين هيغير مودك

7

الهالوين بيجي يوم 31 من شهر أكتوبر، وده بيعتبر فرصة كويسة جداً تخرجي بيها عن الجو الروتيني وتعملي حاجة جديدة مع اصحابك عن طريق ارتداء الملابس التنكرية ووضع ماكياج مرعب وحضور واحدة من حفلات الهالوين المميزة مع أصحابك تقدري من خلالها تستمتعي بوقتك وتتصوري صور جديدة ومختلفة.