لو في حد من الأشخاص اللي هتكلم عنهم في الموضوع ده فكر يقرب ليكي أو ليك ابعده بسرعة لأن وجوده هيخلي حياتك مش لطيفة خالص.
البخيل
الشخص البخيل في فلوسه بيكون برضه في الأغلب بخيل في مشاعره والأكيد إن في كلا الحالتين هو شخص يعتبر ميت لأنه مش عايش الحياة ولا هيخليك تستمتع بالحياة.
الحاسد
هيخلي كل النعم اللي ربنا مديها ليك تزول من كتر ما هو باصص ليك فيها وبيحسدك على إن ربنا اداها ليك ومدهوش النعمة ديه.
النمام
لو قلت ليه حاجة هيقولها لكل الناس وهيزود من عنده كلام وفي الأخر هتلاقي إنه خسرك ناس كتير في حياتك بسبب إنه بينقل ليهم الكلام وبيزود عليه كلام مش لطيف خالص.
السلبي
اللي كلامه ليك كله إحباط عمره مايفكر إنه يقوي من عزيمتك ويخليك عندك أمل إن بكرة أحسن دايمًا كلامه يكسر النفس. وممكن يوصل حد إنه يسيب البلد ويمشي أو إنه يتجنن ويدخل مستشفى العباسية أو إنه ينتحر من كتر شحنة الكلام السلبية اللي أخدها منه.
الأناني
هيكون عايز كل حاجة لنفسه وأي حاجة في إيدك هيعمل المستحيل عشان ياخدها منك من خلال طرق كتيرة وفي الأخر هتلاقي نفسك عايش مرحلة نفسية صعبة وحياتك مسلوبة منك.
المصلحجي
عارفك عشان عايز حاجة منك ومش هيسيبك غير لما ياخدها منك هيمثل عليك في الأول إنه حبيبك لغاية ما ياخد الحاجة اللي عايزها وبعد كدة يقولك أتوتالير معطلكش.
المنافق
يقولك كلام حلو جدًا في وشك ولما يسيبك يشتم فيك ويتكلم عليك وحش جدًا كأنه بينه وبينك صراع كبير واللي زي الشخص ده البعد عنه غنيمة.
ممكن سؤال يدور في بالك دلوقت عن إزاي هبعده من غير ما أعرف إذا كان من الشخصيات دول ولا لأ؟ . وإجابتي هى إنك من كلامي عنهم أكيد عرفت هما عاملين إزاي وبالتالي هتعرف إذا كانوا من الشخصيات دول ولا لأ.
ونصيحة
متدخولش في مجازفة وتصاحبهم لأنك إنت اللي هتندم في الأخر وهتحس إن حياتك ضاعت في معرفة ناس متستاهلش.
وخليه مبدأ في حياتك إنك تقرب منك الناس اللي هيخلوا روحك فرحانة وهيمدوك بطاقة إيجابية من كلامهم، طاقة تحقق بيها كل اللي تتمناه لأن الحياة بنعيشها مرة واحدة بس فلازم نعيشها وإحنا فرحانين ومعانا ناس بيحبونا من قلبهم بجد.
