مبدئيا كده أوعي تحط ميعاد معين للأنتهاء من تشطيب شقتك ده حلم صعب التحقيق وفى أفضل الظروف هتخلص بعد3 شهور من الميعاد اللى بتتوقعه ومتنساش انه مستحيل صنايعى يجى فى ميعاده مهما عملت ولاهيسلم شغله فى اى ميعاد تتفقوا عليه ودايما عنده أسبابه ( أصل النهارده مطر / أصل ابن عم بنت خال أمى توفى وسافرت البلد/ أصل والدى فى المستشفى وانا عيان مبتحركش من السرير ومراتى بتولد).. فنسى الوقت. ويامستعجل عطلك الصنايعى
ورا الكرسي
متدققش فى التفاصيل أوى لو الحيطة ديه فىها خربشة أو اللون فى الحته ديه أفتح والكرانيش هنا مش مظبوطة خليك عارف ان ده الطبيعى ومتهتمش بالفنش اللى بتشوفه فى الصور على النت عشان بيفضل فى الصور بس ومتشغلش بالك كتير بالمسألة دي لأن حلها أبسط مما تتخيل أول مايتحط العفش يامعلم ولا أى حاجة من ديه هتبان وهتكتشف انك أرهقت نفسك فى حاجات هتدارى تحت السجاجيد وورا الكراسى. كن كفريد شوقى فى البخيل وأنا
الفلوس معايا
أياك ثم أياك ثم أياك تفكر تدى صنايعى فلوس قبل اما يخلص شغله كده يبقى عليه العوض ومنه العوض
ومتحاولش تفكر هو فين عشان هتتشل لو عرفت ان فلوسك يابرنس فى جيبه وهو نائم مطمئن فى سبات عمييق ومتفكرش ولا يجى فى بالك لاسمح الله انك ممكن تشوفه مرة تانية فى حياتك فاستعوض ربنا وألحق دور على واحد تانى وطبعا لايقع المؤمن فى نفس الجحر مرتين
أنى لا أكذب ولكنى مضطر .. وحسبى الله ونعم الوكيل
أيه الحلاوة ديه ايه تسلم ايديك يااسطى , يابرنس الليالى ,الجمل ديه لو متقالتش للصنايعى محدش هيزعل غيرك وبعدها روح عيط فى بيتكم براحتك وانت بتهد صورة الشقة اللى فى خيالك وبتبدلها بالواقع المرير
التلصيم والكروتة مبدأ مش أى كلام
مفيش أى حاجة هتطلع مظبوطة مثلا لو قررت انك تدهن قبل السراميك بتاع السراميك هيرشلك الأسمنت ع الحيطة ولو ركبت السيراميك الأول النقاش هيدلق عليه المعجون م الأخر كلهم هيسبوك ويمشوا وانت اللى هتلم ده لوحدك و فى الحالة ديه شمر واستعين ع الشقى بالله
تيلفونى مغلق أذن أنا صنايعى
أعمل حسابك في خطوط تيلفون كتير عشان الصنايعى لو شاف رقمك مش هيرد عليك فدايما تفاجئه بأرقام جديدة ولو قالك قدامه نص ساعة يبقى تعرف انو مش هيوصل قبل ساعتين ولو قالك بكره ان شاء الله جاى يبقى ده
انا محدش يتوقعني
الشقة هتطلع حاجة تانية بعيدة عن اى توقع هتكتشف ان الصنايعى عمل كل حاجة على ذوقه هو والألوان اللى أختارتها هتطلع ألوان تانية, هى هتبقى شبها بس من بعيد فكبر راسك واستمتع واستعد للمعركة الأكبر العفش وما أدراك ما العفش .. كل اللى فات حمادة واللى جاى حمادة تانى خاااالص