عادة أي حاجة جديدة علينا، أو غير مفهومة، بتختار اننا نكون عنها أفكار من شكلها الخارجي، واليوجا والتأمل من أكتر الحاجات اللي عندنا أفكار مغلوطة عنها، الي جانب أن أعمال درامية كتير قدمت ممارسة اليوجا والتأمل بشكل ساخر، وده ساعد على تأكيد المفاهيم دي، بس لما تتعرف على اليوجا والتأمل بشكل أكبر، هتكتشف أنهم أبسط بكتير من كل التعقيدات والأفكار المغلوطة اللي كبرنا واحنا بنفكر فيها، وربما فيلم عائلة زيزي، كان من أكتر الاشياء اللي خلانا نفكر في التأمل واليوجا بشكل كوميدي، لما كان أحمد رمزي بيحاول أنه يعاكس جارته اللي بتعلب يوجا.
  • جلسة التأمل

1

الطبيعي أن لما حد يسمع كلمة تأمل أو أن شخص بيتأمل بيتخيله قاعد القعدة الشهيرة بتاعت التأمل، مربع رجليه، وضامم صوابعه، وحاطط ايده على ركبه، وده مش حقيقي، أه طبعا ده وضع من أوضاع التأمل، بس التأمل في الأساس بيتم بالعقل مش بالجسم على عكس اليوجا، يعني أنت ممكن تتأمل وانت قاعد عادي على سريرك أو حتى في العربية، او أنت نايم على ضهرك، المهم في التأمل أنك تنظم تنفسك صح، وتسيطر على أفكارك وتخليها متأثرش على مشاعرك، تخلي الأفكار تطفو على سطح مخك بهدوء من غير ما تغوص جواه، هو ده التأمل ببساطة.
  • الماسونية

2

ودي تقريبا أغرب حاجة سمعتها، والشيء الحزين أني سمعتها من شخص رياضي صاحب محل أدوات رياضية، لما كنت بدردش معاه وجت سيرة اليوجا، فقالي بمنتهى الصدق “بس خدي بالك.. عشان في ناس كتير بتروج للأفكار الماسونية من خلال تدريبات اليوجا للمبتدئين”.. انا حقيقي ماحولتش اتناقش وافهم وجهة نظره اكتر، لأني حسيته مقتنع جدا ودفاعي عن الموضوع كان ممكن يخليه يتأكد ان في حاجة مريبة فعلا، بس الحقيقة اليوجا ملهاش أي علاقة بالماسونية، اليوجا بمنتهى البساطة رياضة روحانية. يعني بدل ما تمرن جسمك بس.. بتمرن عقلك وروحك معاه.
  • البوذية

3

للأسف في ناس متخيلين أن اليوجا والتأمل هي صلاة الديانة البوذية، وبيعتبروا أن اللي بيمارسوا النوع ده من الرياضة والتمارين العقلية أنهم بوذين وبمنظور اخر كفار، الموضوع ملوش أي علاقة بالدين، الموضوع له علاقة بتدريب الروح والعقل على أنهم يكونوا أصحاء وأنهم يتخلصوا من الطاقة السلبية
  • مكلفة

4

طبعاً في بعض الأماكن بيكون إشتراك حصص اليوجا والتأمل فيها بأسعار كتيرة، لكن نفس الأماكن وأماكن أخرى بتقدم حصص مجانية كتير جدا لو حبيت تجرب وتتابع حصصهم المجانية هتتبسط جدا واللي تتعلموا مارسوا بعد كده في البيت مع نفسك الموضوع مش صعب خالص، وكل اللي هتتكلفه انك هتشتري لمرة واحدة السجادة الخاصة باليوجا بحوالي 50 أو 100 جنية وهتفضل عايشة معاك العمر كله .

 

في النهاية، صعب جدًا نحكم على شيء إحنا مجربنهوش، واليوجا والتأمل حاجات تستحق فعلًا انكم تدوها فرصة، ممكن في البداية تروحوا حصة من الحصص المجانية اللي بتعملها الأماكن دي، ومش ضرورة تشتري سجادة لأنهم كمان بيوفروا بعضها للمبتدئين اللي لسه جايين يجربوا اول مرة، التمارين دي فعلا بتفرق في النفسية وفي النوم وكمان في ادائك في الشغل.. هتخسر ايه لو جربت؟