أفلام مصرية

في خلال الفترة اللي فاتت، تقريبًا من بداية موسم عيد الأضحى، نزلت أفلام مصرية كتير في السينما، منها أفلام الإنس والنمس والعارف وموسى و200 جنيه وماكو. وفي الفترة اللي جاية، هنشوف أفلام جديدة في السينما المصرية.

الحقيقة، بعد عودة الحياة لدور العرض، وفي أفلام مصرية بتحقق إيرادات معقولة مقارنةً بالفترة قبل انتشار فيروس كورونا، خلينا نشوف في التقرير ده أهم 8 أفلام مصرية هتنزل في السينما الفترة اللي جاية.

فيلم 30 مارس

30 March – Official Trailer | التريلر الرسمي لفيلم ٣٠ مارس

فيلم ٣٠ مارس انتاج / شركة دانا توزيع لجميع انحاء العالم / شركة ان ستارز بطولة : أحمد الفيشاوي – دينا الشربيني – محمد علي رزق – أسماء أبو اليزيد – أحمد خالد صالح – محمد جمعة انتاج / راني مسحال تاليف / حميد مدنى اخراج / أحمد خالد موسى #انستارز #٣٠ـمارس #فيلم #احمد_الفيشاوي #دينا_الشربيني

أول فيلم على قايمتنا، هو فيلم 30 مارس، اللي هيبدأ عرضه في دور السينما بدايةً من 8 سبتمبر، الفيلم بطولة أحمد الفيشاوي ودينا الشربيني وخالد الصاوي وأسماء أبو اليزيد. وبتدور قصة الفيلم حوالين “علي”، اللي بيحاول يهرب من جريمة قتل، هو مش عارف هل ارتكبها ولا لأ! 

الفيلم بيضم عدد من ضيوف الشرف، منهم نيللي كريم وإنجي المقدم، وهو  من تأليف حميد المدني، وإخراج أحمد خالد موسى. من المتوقع إن الفيلم يحقق نجاح كبير، خاصةً إن أفلام أحمد الفيشاوي، دايمًا، بتكون أفكارها جديدة ومختلفة.

عروستي

No Title

No Description

من المتوقع إن فيلم عروستي ينزل السينما خلال الأسابيع اللي جاية، خاصةً إن البوستر تم الإعلان عنه رسميًا، وكمان بدأت عمليات الدعاية الخاصة بالفيلم من خلال البرومو، وعن قريب هيتم الإعلان عن موعد العرض الرسمي.

الفيلم بطولة أحمد حاتم وجميلة عوض، اللي بيتصدروا البوستر الرسمي لفيلم عروستي، ومحمود البزاوي وفاتن واصل وزينب غريب ومروان يونس، وتأليف مصطفى البربري وإخراج محمد بكير. 

الفيلم من النوع الدرامي الرومانسي الكوميدي، وبيتكلم عن علاقة شاب وفتاة وانطباعهم عن فكرة العلاقة بين الرجل والست.

الكاهن

فيلم الكاهن من أفلام مصرية هتصدر الفترة اللي جاية

وبالإضافة لفيلم 30 مارس وعروستي، تالت فيلم على قايمتنا هو فيلم الكاهن، بطولة درة وإياد نصار ومحمود حميدة وحسين فهمي وفتحي عبد الوهاب، وغيرهم من النجوم الكبار، اللي هنتسنى نشوفهم على شاشات السينما الفترة اللي جاية.

على حسب كلام الشركة المنتجة، فقصة الفيلم هتكون مفاجأة وجديدة تمامًا على السينما المصرية، فخلينا نشوف. الفيلم من إخراج عثمان أبو لبن وتأليف محمد ناير، اللي من أشهر أعمالهم مع بعض فيرتيجو والمواطن اكس. فاحنا مستنيين نشوف تعاونهم الجديد هيسفر عن ايه.

المحكمة

فيلم المحكمة من أفلام مصرية هتصدر الفترة اللي جاية

بعد تعاونهم في فيلم 200 جنيه، اللي نزل الفترة اللي فاتت، هنشوف تعاون جديد بين المخرج محمد أمين والمؤلف أحمد عبد الله، في فيلم “المحكمة”، بطولة  غادة عادل ومحمود عبدالمغني وفتحي عبدالوهاب وصلاح عبدالله وجميلة عوض.

الفيلم بيتكلم عن قضايا مهمة وشائكة في المجتمع المصري، زي القضايا المدنية ومحكمة الأسرة والاغتصاب والتحول الجنسي. أحداث الفيلم بتدور في يوم واحد وفي مكان واحد وهو المحكمة. ومن المتوقع إن الفيلم يحقق نجاح، لإن نوعية الأفلام دي بتجذب عدد كبير من الجمهور.

العنكبوت

فيلم العنكبوت من أفلام مصرية هتصدر الفترة اللي جاية

بالإضافة لفيلم الكاهن، من المتوقع، الفترة اللي جاية، نشوف فيلم العنكبوت على شاشات السينما. العنكبوت، هو فيلم جديد من أفلام أحمد السقا ومنى زكي، الدويتو اللي حبينا ظهورهم مع بعض في الأفلام زي أفريكانو وتيمور وشفيقة. 

بالإضافة ليهم، من أبطال الفيلم، ظافر العابدين ويسرا اللوزي وريم مصطفى ومحمد لطفي. والفيلم من إخراج أحمد نادر جلال، وقصة الفيلم بتدور في إطار الحركة والإثارة، وبيتكلم عن تاجر مخدرات خطير، بيبدأ يصنع مواد مخدرة جديدة، وبيقع في كتير من المشاكل والمطاردات من الشرطة.

كيرة والجن

فيلم كيرة والجن من أفلام مصرية هتصدر الفترة اللي جاية

بعد نجاح أفلام الفيل الأزرق والأصليين وتراب الماس، قطاع كبير من الناس مستنية الفيلم الجديد لأحمد مراد ومروان حامد، واللي مقتبس عن رواية “1919”. 

الفيلم بطولة كريم عبد العزيز وأحمد عز وهند صبري وروبي وأحمد مالك وأسماء أبو اليزيد. فيلم كيرة والجن، بيحكي عن ثورة 1919، وحالة الغليان اللي كانت موجودة في الشارع المصري وقتها.

الجدير بالذكر، إن تصوير الفيلم اتأجل أكتر من مرة، نتيجة انشغال أبطال الفيلم بتصوير مسلسلات “الاختيار 2″ و”هجمة مرتدة”. 

وحتى الآن مفيش ميعاد رسمي لعرض الفيلم على شاشات السينما، ولكن كلنا مستنيين الميعاد، لأن من المتوقع إن الفيلم هيحقق نجاح كبيرة بعد نجاح التعاون بين مروان حامد وأحمد مراد في الأفلام اللي فاتت.

في عز الضهر

فيلم في عز الضهر من أفلام مصرية هتصدر الفترة اللي جاية

أول فيلم مصري لمينا مسعود، كلنا متشوقين نشوف مينا مسعود على الشاشات المصرية، هيكون عامل ازاي. الفيلم من إخراج مرقس عادل، ومن المتوقع طرحه في السينما في أقرب وقت. مينا مسعود بيأدي فيه دور زعيم عصابة بيعمل عمليات نصب، في إطار من التشويق والإثارة والأكشن.

فيلم في عز الضهر، بطولة محمد علي رزق ومحمد عز وإيهاب فهمي، اللي بيصادف إنه أدي دور علاء الدين (دبلجة)، زي مينا مسعود اللي أدى دور علاء الدين، في فيلم علاء الدين، اللي صدر 2019. 

أشباح أوروبا

الإعلان التشويقي لفيلم اشباح اوروبا | Renegades Of Europe Teaser Trailer

الإعلان التشويقي لفيلم #أشباح_أوروبا إنتاج Snapers Production – محمد الوزيري بطولة : هيفاء وهبي – أحمد الفيشاوي – مصطفى خاطر – باسم سمرة – اروى جودة – عباس أبو الحسن قصة : كريم فاروق | سيناريو وحوار : أمين جمال – محمد أبو السعد – شريف يسري إخراج : محمد حماقي #قريباً في دور العرض 2020 #مين_يقدر_عليهم #RenegadesOfEurope Teaser trailer #Coming_soon 2020 #Snapers_Production

آخر فيلم على قايمتنا، هو فيلم “أشباح أوروبا”، بطولة هيفاء وهبي وأحمد الفيشاوي ومصطفى خاطر وأروى جودة وبيومي فؤاد. ومن إخراج محمد عبدالرحمن حماقي، وﺗﺄﻟﻴﻒ كريم فاروق، وسيناريو وحوار أمين جمال.

الفيلم بيحكي عن زوجة تنجب 6 توائم، فالزوج بيبيع 3 منهم بسبب الفقر؛ الزوجة بتكتشف ده، وبتسافر بره، وفي المستقبل بتظهر صراعات بين الأشقاء. فيلم جديد لهيفاء وهبي، مستنيين نشوف هيكون مدى نجاح الفيلم.

في النهاية، حابيين نقول إن السينما المصرية في عام 2021، سينما مختلفة من حيث الأفكار اللي اتقدمت؛ أفلام كتير نجحت إنها تفرض نفسها على دور العرض، ومن المتوقع الفترة اللي جاية نشوف أفلام جديدة بتحقق نجاحات أكبر. زي فيلم 30 مارس وعروستي والكاهن والمحكمة والعنكبوت وكيرة والجن وفي عز الضهر وأشباح أوروبا.

قولولنا في التعليقات، ايه الفيلم اللي ناويين تدخلوه لما ينزل السينما؟

LEAVE A REPLY

Please enter your comment!
Please enter your name here