الضحك عملة نادرة، كل الناس لما بتضحك بتقول ف سرها “خير اللهم اجعله خير”، أول شعب اخترع “دموع الفرح”، الشعب اللي بيعيط ف الأفراح، وبيعيط ف المياتم وبيعيط ف ماتشات الكورة، تسعين مليون دراما كوين..! اعمالا بمبدأ “كما تكونو يولي عليكم” واننا بنموت ف النكد، ف أكيد كل المغنيين بتوعنا شبهنا “نكد” زينا…
حابين النهاردة نتكلم عن أكتر المغنيين النكديين المصريين، الصعبانيات، الأحزان، رمادية الشتاء الحزينة، واكتئاب ما بعد الساعة 11، اللي بيقومك تدعبس ف التلاجة علي أي حاجة تشكيلها أحزانك، يلا؟ يلا بينا..!
قائمة الشرف تضم كلا مين:

 

أمير الغناء العربي “هاني شاكر”

hqdefault (1)

سبحان الله النقابة دي مرزقة، اتنين نقباء ورا بعض، والاتنين أعمدة في النكد المصري المعاصر، أمير الغناء العربي هاني شاكر، بلا استثناء قمة في الأغاني الحزينة، أمير اليأس العربي بلا منازع، هاني شاكر بدأ بدايات مفرحة، لكن موت عبد الحليم، بعد كدة “عماد عبد الحليم” خلته يكوش علي كل النكد الموجود ع الساحة الفنية، ف طلعلنا بأغنيات حزينة، بل تكاد تكون مميتة..! أول واحد عمل عيد ميلاد لتعاويره، أول واحد كسر كل حاجة ف الأغاني، رائد من رواد النكد..!
الطبقة المستهدفة من النكد: طبقة فوق متوسطة – طبقة عليا.
نوعية الأغنيات: أغنيات عادية – مفيش مواويل مش ستايله.
أشهر الأغنيات: الحلم الجميل – سبتيني ليه؟ – جرحي أنا.

 

 المدبوح “محمد محيي”

محمد-محى-الخوف-من-الجاى

مولانا محمد محيي غني عن التعريف، عميد عمداء نكد التسعينيات، محدش فينا مفركشش علي صوته، كلنا لما بنبقي مش ف المود هو بيساعدنا نعيط، محمد محيي أحد أكثر المغنيين تميزا، مفيش ف أغانيه حاجة مفرحة واحدة، مع ذلك جمهوره عريض، اكبر من جمهور عمرو دياب 😀
الطبقة المستهدفة: المراهقين – مواليد التسعينيات والتمانينيات.
نوعية الأغنيات: نواح مستمر – أغنيات عادية.
أشهر الأغنيات: كلها

 خامة النكد الأولي “تامر عاشور”

861

معشوق المراهقين الأول، نجم الشباب، الفنان اللي هزأ نص بنات مصر وبهدل النص تاني عياط معاه، تامر عاشور بدأ بداية قوية جدا من عالم النكد،كان ملحن مفرح بس بقي مغني نكدي ؛ كل أغنياته قمة في الحزن واليأس والاحباط وقلة القيمة، بالاضافة لأن تامر أصلا صوته “حاد” جدا، فتحسه بيزعق فيك ف تعيط أكتر..!
الطبقة المستهدفة: بنات العشرين.
نوعية الأغنيات: تقطيع شرايين.
أشهر الأغنيات: ذكريات كدابة “التوزيع القديم” – هاجي علي نفسي – انتا اخترت

طائر السنونو الحزين “مصطفي كامل”

hqdefault

ملك الميكروباصات، نقيب الموسيقيين الأوحد، خير من يمثل الأغنية المصرية في عهدها الحالي، مصطفي كامل ماشي بمبدأ “مرة واحد ضحك، مات” كل أغانيه بلا استثناء نكد، أغاني سواقين كفر طهرمس المفضلة، بيمارس هوايته المفضلة في تقطيع رقاب العباد من النكد والاكتئاب.مصطفي كامل ميزته ف انه بيكتب وبيلحن الأغنيات لنفسه، ف الأغنيات بتخرج بمفردات شبهه، وألحان شبهه، بتلاقي كلمات زي “جيتلك ماشي عايم في بحرك الغريق” اللي علي رأي عمر طاهر انها “معجزة لم تتكرر من أيام سيدنا موسي” وجمل تانية زي “أحلامنا كانت شيطان، عايش بين أربع حيطان، أتاريني بضحك عليا، علي طول مغمض عينيا” وغيرها وغيرها من الجمل الي استحالة تطلع من حد غير الزعيم “مصطفي كامل”
الطبقة المستهدفة م النكد: طبقة دنيا – طبقة تحت متوسطة.
نوعية الأغنيات: أغنيات عادية، مفيش مواويل لأن صوته وحش جدا مش هيعرف يغني مووايل.
أشهر الأغاني: ح أدوس علي قلبي – أقوي من الأيام – رحلة عمري.

 

العاشق المجروح “رمضان البرنس”.

563f96c509b2f4b6c6de9005d311131b.large

سبحان الله رغم عمره الفني القصير إلا ان رمضان البرنس قدر يحفر اسمه ف جدار النكد الشرفي، عمل أغنيات عظيمة زي “عودي” والجزء التاني بتاعها “عودي” وأغنية “الأم” ومووايل عديدة بتتكلم عن غدر الصحاب والزمن وكدة.
رمضان البرنس للأسف نهايته كانت مأساوية جدا زيه، توفي في حادثة عربية مع عيلته، بعد شهرة قصيرة جدا، وصوت أجمل ما يكون، ، محدش بيفتكره غير ب”عودي” و”ارجعي”، عاوزة افهم بس مين فهمه ان “عودي” غير “ارجعي”..!
نوعية الأغنيات: مواويل وأغنيات حزينة، صوته كان جميل جدا.
الطبقة المستهدفة م النكد: طبقة متوسطة.
أشهر الأغاني: عودي – ارجعي – الأم.

 

 العميد “طارق الشيخ”

images

عمرو دياب الأغنية الشعبية، الأب الروحي لسعد الصغير، الراجل اللي بيهز الوسط الشعبي كله بأغنية واحدة من غير ما يتحرك من مكانه، صاحب الحكمة الأشهر “جينا الحياة علي عجل، ومروحين علي عجل”، صاحب “دقيقة حداد” و “اجرح” و “بدور عليكي” اللي حبيبته هربت منه فيها وقالها “بدور عليكي ف كل سكة وكل شارع، مش عاوزة ليه ترجعي؟” ياراجل؟ مش عارف هي هربت ليه؟؟ ريلي؟
الطبقة المستهدفة: رجل الشارع العادي.
نوعية الأغنيات: تقطيع شرايين+ مواويل.
أشهر الأغنيات: اجرح، دقيقة حداد، كفي نفسك، وغيرهم.

 

العظيم “حسن الأسمر”

hqdefault (2)

عميد لاعبي الأغنية الشعبية، المكتسب لقبه وصفته من لون بشرته، عمي وعم كل المغنيين دي، مولانا أبو شامة وعلامة، رحمة الله عليه بقوة “حسن الأسمر”، مش هنتكلم علي ان الراجل ده أول من كتب قصة كفاحه ف أغنية، أو انه أول من استخدم الاشارات في أغانيه “انا أهو وانتا أهو، والزمان أهو بينا أهو” ولا أي حاجة، الراجل ده رغم خفة دمه الشديدة في الحقيقة إلا ان أغانيه تميزت بكآبة شديدة جدا، والقطنة مبتكدبش..!
الطبقة المستهدفة: كل الناس.
نوعية الأغنيات: تقطيع شرايين + أغاني عادية + مواويل.
أشهر الأغنيات: كتاب حياتي – سألوني – سألو العذاب.

 

القادم بقوة “أحمد شيبة”

maxresdefault

 

اللي قارفنا في التكاتك والميكروباصات، اللي الزهر لعب معاه هو لوحده، ولازم يتبخر ويخمس عشان العين، اللي أسيادنا راضيين عليه “أحمد شيبه”،  ميزة أحمد شيبه انه راجل علي قديمه، مغني تقليدي، بيغني أحزن الأغنيات وأكثرها سوداوية في الأفراح! وده شئ لا مبرر له علي الاطلاق، لكن الراجل الحمد لله نجح ووصل وعمل ملايين الفيوز علي اليوتيوب الحمد لله..!
الطبقة المستهدفة: القادمون الجدد “مراهقين من 14 وانتا طالع”
أشهر الأغنيات: انا مش هفيه – اللي مني – اه لو لعبت يا زهر.
نوعية الأغنيات: أغنيات عادية.

 

العظيم “فريد الأطرش”

hqdefault (3)

لو اعتبرنا ان “محمد محيي” هو الأب الروحي لنكد التسعينيات الجميل في الأغنيات، ف لازم نعترف كلنا ان “فريد الأطرش” هو الأب الروحي للنكد من أول سنة “تلاتين” وانتا طالع..! فريد الأطرش بسبب ظروف وفاة أخته “أسمهان” تقريبا كان بيطلعه علينا، أول واحد غني لعيد ميلاده “قبل هاني شاكر” أغنية كئيبة، وكئيبة فشخ كمان، وأغنيات كتير جدا حزينة.
الطبقة المستهدفة: الشعب المصري والأقطار العربية الشقيقة.
نوعية الأغنيات: مآساويات.
أشهر الأغنيات: عدت يا يوم مولدي – عينيا بتضحك وقلبي بيبكي وغيرهم.

 

وبعد كل ده يا أخي يرجع يقولك الستات كئيبة وتحب النكد..! شاركنا لو عندك مغني كئيب تاني سقطناه من المقالة