طلبوا مني اني أكتب مقالة عن الفلانتين، بما اني سنجل، بائسة، وحيدة، فقررت أكتب “عن السناجل في الفالانتاين، من منطق “حس بيا يحس بيك ربنا… حاول تدور في الخمس أنواع اللي مكتوبين، وقلنا في تعليق انتا أشبه بمين فيهم، والفايز معانا هيكسب وردة وقلب ودبدوب هدية، عشان نقلب عليه المواجع زيادة..!
أنواع السناجل في الفلانتاين :
  • يوسف منصور

vala1

مبدأ حياته: اذا لم تستطع اسعاد نفسك فابدأ باتعاس الاخرين.
أغنيته المفضلة: Set the world on fire.
أماكن انتشاره وتواجده: الميكروباصات – نزلات الدائري – شارع عبد العزيز آل سعود – كورنيش النيل – الحدائق العامة.
الشكل العام: يتميز ذكر وأنثي كائن ال”يوسف منصور” بنظرة تحفزية شديدة العنف علي الوجه، مع تكوير قبضة اليد في وضع البوكس، مع رغبة شديدة في الاعتداء، أو ضرب أي شخص يرتدي اللون الأحمر في يوم الفلانتان حتي ولو كان عنده “حصبة”، مع صوت يشبه صوت زوم Burring  بتاع القطط عند رؤيته لأي Couple  لابس أحمر، وياسلام لو كان مبتسم.
ازاي تتجنبه: حاول متحتكش بيه قدر الامكان، لو زنق علي عربيتك سيبه، لو حكها سيبه، لو قرر انه ييجي جنبك ويستغفر ربنا من البنات اللي أهلها مربتهاش، حاول تفكك منه تماما.
  • سوما العاشق

vala2

مبدأ حياته: دايما دموووع، دمووووووع، دمووووع…
 أماكن انتشاره وتواجده: أوض النوم – الحمام “زي أغنية انتا ايه” –  أي مكان Indoor  ما بين الريسيبشن والبانيو.
الشكل العام: يتميز ذكر وأنثي، لا ذكر ايه مفيش راجل بيأفور كدة أصلا، سوما العاشق ده مجرد كاريكاتير، البنت من نوعية سوما العاشق بتعتمد بشكل اساسي في شكلها علي ال”الكحل السايح” ومش أي كحل لا، الكحل اللي سايح من مطرح العياط، شعر منكوش، بيجامة مبهدلة.
ازاي تتجنبه: مش محتاج تتجنب الكائنات دي، لأنك مش هتشوفها، غالبا ممكن تتكعبل فيها ع الفيسبوك، وهي حاطة الصورة المشهورة بتاعة “أصلا عادي” – وأغنية منير بتاعة “وحدي لكن ونسان” ولو هي متدينة بتكتب “طبطب علينا يارب”
  • I DON’T GIVE A DAMN

vala3

مبدأ حياته: انا ومن بعدي الطوفان…!
أماكن انتشاره وتواجده: القهاوي – الكافيهات “ايوة القهاوي غير الكافيهات” – البلاي ستيشنز – الغرز أحيانا – البارات أحيانا تانية خالص.
الشكل العام: شكله كأنه مش مهتم، مش حابب، مش فاهم، نظرة لا مبالاة مرتسمة علي ملامحه عميقة، غالبا بيكسل يسرح شعره –لو راجل- ، غالبا بتكسل تعمل شعرها، وبتلمه كحكة –لو بنت-، صوت ضحكتها/ضحكته مجلجل، معندوش مشاكل، غالبا حب واتمرمط وعرف ان قلته أحسن.
ازاي تتجنبه: مفيش داعي تتجنبه، لو لك صاحب من النوع ده امسك فيه بايديك وسنانك، ده كنز لا بد من وجوده في حياتنا.
  • قول عا..

vala4

مبدأ حياته: انا عاجي معاكو كدة..!
أماكن انتشاره: لازق لصاحبه المرتبط، لازقة لصاحبتها المرتبطة.
الشكل العام: راجع شكل أحمد فتحي في فيلم “يوم ملوش لازمة” أيوة، زيه بالظبط.
vala5

 

ازاي تتجنبه: لو انتا مرتبط وهو لزقلك، حاول تضلله، قوله يستناك فوق كوبري قصر النيل الساعة 2 الضهر، تحت السد العالي، قدام الهرم الكبير، المهم بلاش يلزقلك انتا وصاحبتك، لأن غالبا عينه/عينها وحشة جدا…
  • رمضان بطيخة بقي مونامور..!

vala7

 

مبدأ حياته: فلوووس فلوووس..كتافي كلها فلووووس.– كتافي كلها حب، كتافي كلها ارتباط..
أماكن انتشاره: في سيتي ستارز، بالذات في سيتي ستارز.
الشكل العام: بيجيب هدايا كتير، بيبان عليه عامة انه محدث ارتباط، بيأفور في كل حاجة، في الهدايا، في الحب –قصاد الناس بالذات-، بيأفور في السهوكة والمحن ولوازمه.
ازاي تتجنبه: حاول قدر الامكان تهرب كل ما تشوفه، اللون الأحمر اللي البنت لابساه ده مش حب، لا دي اشارة تنبيه..!
نهايته، ربنا يعوض علي كل سنجل وكل سنجلة، السنجلة مرجلة، والارتباط احباط، ومحدش مرتاح، والفالانتاين ده سبوبة لبياعين الورد والقلوب والكافيهات، حاول متقعش ضحية ليهم، ولا تخليهم يستغلوك، انتا مش كروديا…!
images