بما إن معظم الشعب المصري بيهتم بالكورة .. ونسبة كبير من الشباب في مصر “مدمنين كورة” .. يبقى احتمالات إنك ترتبطي وتتجوزي واحد “مدمن كورة” كبيرة جداً. وعشان كدة إحنا هنقدم لك شوية نصائح عشان تعرفي إزاي تتعاملي مع جوزك “المدمن” وقت الماتشات المهمة.
أنا هقدم لكم النصائح دي بصفتي “مدمن كورة” شخصياً .. وحطيت القواعد دي عشان أبلغها لأي واحدة هرتبط بيها .. عشان لو  مش عاجبها نفركش من أولها كدة.

1- بلاش أسئلة غريبة وقت الماتش

1
إحنا لو قررنا نتفرج على ماتش مهم في البيت .. بيبقى الأحسن لينا إننا نتفرج لوحدنا أو مع حد فاهم كويس أوي .. عشان أكتر حاجة بنكرهها هي إننا نتفرج ما حد ملوش فيها .. فلو أنتي قررتي تعملي حركة كويسة وتتفرجي معاه ع الماتش .. ياريت بلاش أسئلة من نوعية “هو الأهلي لابس إيه؟” أو “هو ميسي بيلعب فين؟!” أو ” هو مش رونالدو ده كان في البرازيل؟”

2- حاولي تحتويه لو فرقته خسرت

3
إحنا بنمر بأسوأ أوقات حياتنا لما الفرقة اللي بنشجعها بتتغلب .. بالذات لو كان ماتش نهائي بطولة .. حاولي تحتوي جوزك في الوقت ده وارفعي روحه المعنوية .. وهو مش هينسالك الموقف ده أبداً

3- الماتش أهم منك أنتي شخصياً

2
لو كنتي عايزة تخرجي معاه أو تروحي تزوري مامتك مثلاً .. بلاش تختاري وقت ماتش مهم وتقوليله يللا نخرج .. لأن الماتش بالنسبة له أهم من العلاقة أساساً وقرار الطلاق بيبقى سهل أوي في اللحظات دي .. أنصحك إنك تنزلي جدول الدوري وترتبي أمورك بناءً على مواعيد الماتشات.هتسألي طبعا دوري ايه هاقولك راجعي نقطة 1 لان في الاجيبشن ليج وفي دوري ابطال اوروبا والدوري الانجليزي والايطالي والاسباني والالماني وبنتفرج علي تفاصيات كأس العالم وكأس الامم والماتشات الودية كمان .

4- شوفيلك تلفزيون تاني

4
في أيام بتبقى الماتشات فيها من الصبح لغاية بليل .. يعني التلفزيون محجوز لجوزك طول اليوم .. في الحالة دي تشوفيلك تلفزيون تاني تتفرجي فيه على “سنوات الضياع” بتاعتك ..  تخرجي مع أصحابك .. المهم تخلعي اليوم ده …المهم متضيقهوش لان اليوم المقدس ده مينفعش يبوظ تحت اي ظرف.

5- انتهزي فرصة المكسب

540
لو الفريق اللي بنشجعه كسب ماتش مهم أو بطولة .. بنبقى في حالة من السعادة بشكل لا واعي .. اطلبي منه أي حاجة في الوقت ده ومش هيرفض .. ممكن يمضيلك على توكيل عام أساساً وهو مش حاسس.

6- الماتش مش 90 دقيقة

7
الماتش بالنسبة لمدمن الكورة مش مجرد الـ 90 دقيقة مدة الماتش .. إطلاقاً .. لسه في استوديوهات تحليل بعد الماتش لمدة أربع خمس ساعات وبرامج تانية ملهاش لازمة بس بنحب نتفرج عليها وكوميكس ع الفيسبوك وتحفيل من الصحاب وقنوات الكورة لازم تبقى محطوطة في أول قايمة القنوات .. لازم تبقي فاهمة ده كويس .. ويا سلام لو تشاركيه في الحاجات دي .. هيحبك أوي
دي أهم النصايح اللي لازم تتبعيها لما تتعاملي مع جوزك مدمن الكورة .. لو أنتي فاهمة كورة أو بتحبيها .. وده شيء نادر .. يبقى أغلب النصايح دي مش ليكي .. بس هوجهلك نصيحة واحدة بس وهي بلاش تستفزيه لو بتشجعي الفريق المنافس لفريقه .. وأتمنى لكم حياة كروية سعيدة.