Close Up Of Romantic Couple Embracing By Autumn Woodland
عزيزتي البنت، وحبيبتي الست، بقالنا كتير بنتكلم عن الأبراج، الأفلام، الأغاني، ونسينا حاجة مهمة، احنا النهاردة هنتكلم عن “الحب” وبكل الحب، هنكتب مقالة من جزئين، عاوزين نديلك هنا الخلاصة، عشان تتعلمي ازاي تكسبي قلب الراجل، بخطوات سهلة وبسيطة، وبعيدة عن الافتكاس والنصايح الخزعبلية بتاعة برنامج “نفسنة” وشوية الهري الفاضي ده،، واسأل مجرب ولا تسأل أسامة منير

 

1. اهتمي بتفاصيله

rs_1024x759-160422064402-1024.the-good-wife-party-7.ch.042216

أي راجل، عبارة عن بروفايل، مكون من شغله، بيته، صحابه، معارفه، قرايبه، التفاصيل دي كلها بتفرق معاه لو انتي مهتمة مثلا بمامته “مش اهتمام كداب” اهتمام بجد، مهتمة باخواته، بتفاصيله الصغيرة،  بتعرفي تفاصيل صغيره في شغله وبتفكريه بيها، لازم عامة يحس انك شريكته في كل حاجة، معاه في كل حاجة، بتفكري ليكي وليه، عشان هو كمان يفكر ليه وليكي، المشاركة حلوة، شاركيه اهتمامه.

 

2. غازليه

Students talking in library

الراجل بيحب يسمع كلام حب زيه زي الست بالظبط، مفاجأة مش كدة؟! الراجل مش كومودينو، أو رجل كنبة، هو بالاثباتات العملية انسان زيه زيك، وعنده مشاعر، ومن حقه يسمع من وقت للتاني كلام حلو، ومحتاج حد يفكره هو بيحبه ليه، هو مش جاي مع النيش علي فكرة، وف وسط زحمة حياتكم، وشغلكم اللي مش بيخلص، محتاجين تاخدوا ولو بريك صغير مع بعض، تفكرو بعض انتو اخترتوا بعض ليه، وليه انتو الاتنين بتحبوا  بعض بجد، كلميه، عاكسيه، لما تشوفه شيك قوليله ايه الشياكة دي، الكلمة الطيبة صدقة يعني، وده زي جوزك يعني؛ ولو حتي مش جوزك ف معلش، حيالله هو الراجل بتاعك، وبيحبك أوي يعني..!

 

3. ابتسمي في وشه

Embracing love

أجمل الحاجات اللي بتهون علي الواحد يومه ومشاكله هي الابتسامة، والطبطبة اللي بيحسها من شريك حياته، صدقيني البوز ده بيقصر عمرك تلات تيام كل ما تضربيه، وبيساعد في بهدلة علاقتك بشريكك، لأنه أصلا مش ناقص، ابتسمي، خليكي دايما مصدر راحة، صدر حنين بيلجأله كل ما ياخد شلوت من كل حاجة ف الكون، لما تحضنيه وتبتسمي في وشه هيحبك أكتر صدقيني، زائد ان البوز بيسبب تجاعيد وشيخوخة مبكرة،

 

4. سيبيله مساحة

download

بلاش خناقة القهوة كل أسبوع، قعدة القهوة دي بتحميكي من حاجات كتير، ومن نكد كتير، زائد انك أصلا مستفيدة قلبا وقالبا من قعدة القهوة/ النادي دي، أولا هترتاحي من وجوده وهو رايح جاي ف البيت، ولو مش متجوزين ف ده هيخليكي تعملي مشوار الكوافير اللي انتي مأجلاه، هتروحي تدفعي فاتورة تليفونك اللي مكسلة تعمليها،

 

5. العبي معاه

Picture 333

جوة كل انسان ناضج شحط عيل صغير، بيحب يلعب، سواء بقي بلاي ستيشن، كوتشينة علي اختلاف ألعابها، ان شالله حتي يلعب جو كارتنج في الملاهي، المهم انه بيحب يلعب وخلاص، الراجل عامة والراجل المصري خاصة دايما بيحب يحافظ علي الجانب التافه ده جواه، فتيجي الست المصرية بكل جبروتها تقوله “مش كبرت علي اللعب ده؟” يقوم هو يكتأب ويحس انه منبوذ من الست بتاعته ياعيني، ويتدايق وياخد جنب.
في الاخر بعد ما نقلتلك خلاصة خبرتي المتواضعة مع الرجالة، أحب أقولك مبروك، انتي كدة جاهزة تكسبي قلب أي راجل، ورحلة سعيدة !