يتفق جمهور فقهاء العلاقات الانسانيه والعاطفيه على ان الرجاله بسيطه بس مكلكعه في نفس ذات الوقت يدعون البساطه واللؤم  يشعرون دائما بالغموض بس هما مفضوحين يا اما تافه من اجل التفاهة يا أما عميق من اجل العمق ولكن المتفق عليه في كثير من الاحيان ان فيه شوية اسئله بيكرهها الراجل لما تتسأل في العموم

1- انت بتحبنى ولا بتضحك عليا ؟

13414524_10208714075665765_679158855_n-630x391

ماهو لو بيضحك عليكي مش هيقولك ده ايه الذكاء ده وبعدين ده سؤال يابنتى ينم على غباء فادح منك بردوا يعنى هل انتى مافيكيش عقل للدرجه دى انك مش عارفة حقيقة مشاعره وبعدين لو افترضنا انك شاطرة وناصحة يابنتى حقيقه النوايا والمشاعر محدش بيعلمها الا الله هنكفر بقي ولا هننجم، وبعدين الحاجات دى مابتتعرفش إلا في مراحل العلاقه المتأخر يعنى لما يضحك عليكي فعلاً ساعتها هتعرفى أنه كداب انما لو كمل حلو كافي غيره شره يبقى الراجل كويس
الرجاله يا بنتى زى البطيخه ممكن تطلع حمرا بس طعمها وحش وممكن تطلع مش حمرا بس حلوة ومسكرة فبطلى السؤال اللى مالوش لازمه ده وأعتبري الحب زى الحقنة بالظبط يا تخديها وتخفي يا تخديها وتنتكسي وتقلب باعراض جانبيه مميته.

2- بتقبض كام ؟

368922_Large_20150708041544_57

اهو ده سؤال غير اخلاقى بقى لا راجل يسأله لست ولا ست تسأله لراجل وحتي لو افترضنا سلامه النية وجاوبك فتأكدى ان محدش بيرد على السؤال ده بصراحه مطلقة لازم يقول الرقم ناقص شويه فلوس يكمرهم منك عشان الستات مُسرفة زى ما انتى عارفه فبلاش احراج .. ها! لو عايز يقول هيقول انما لو مش عايز وقال هيكدب.

3- ماردتش عليا ليه ؟

24a83d092bbd55dd108cf02c02bcee81

نفس السؤال اللى انتى نفسك بتكرهيه ماردتيش عليا ليه مانتى كنتى اونلاين شوفتى السؤال ضايقك ازاى ماهو برضوا من حقه وحقك ماترديش احنا مش نايمين في حضننا التليفون يعنى وارد جدا يكون بيلعب كوره او بيشتغل او مع صحابه او حتى مش عايز يرد ماهو انتى برضه بييجى عليكى وقت بتبقى مش طايقه تردى على حد لا تليفون ولا شات فالبرسونال سبايس حلوة ومريحة سيبيه وارجعيله كمان شويه وبرضه من غير السؤال ده لانه حتى لو كان مع بنت غيرك اكيد مش هيقولك يعنى .

4- سرحان في ايه؟

1444010348

بصى عشان نتفق على حاجه مهمة جدا انتشرت الاقاويل ان الرجالة لما بتسرح مش شرط خالص يكون بيفكر هيهرب منك ازاى او انه يكون بيفكر في واحده تانية او حتى انه زهقان منك ممكن يكون سرحان في الولا حاجة اه هو بنى ادم زيك بالظبط ممكن يكون مركز بعينيه في السقف بس مافيش حاجة في دماغه بيفكر فيها، اعتبريه بيعمل ماديتيشن مثلا او بيختلى بنفسه الفاضية شويه فبلاش السؤال الرخم بتاع انت مش معايا ليه انت بتفكر في ايه لازم تقولى لانه لو حلفلك على المية تجمد انه مش فاكر كان بيفكر في ايه انتى مش هتصدقيه وهتقلب بخناقة على الفاضى وهو فعلا ممكن يكون هوا ولا بيفكر في اي حاجه .

5- هتيجي تتقدملى امتى ؟

actor

اهو السؤال ده بقي يسمى السؤال خراب البيوت فـ ليه بتجرى شكله لخناقة ماهو مش منطقى برضه انكوا لسه عارفين بعض من شهر وكل ماتشوفى وشه تساليه هتيجي تتقدملى امتي ثم ان مافيش راجل بيحب الزن فالموضوع ده مكانش هو اللى يقولك يبقى عمر الزن ماهيجيبه البيت، خلى عندك سينس وبلاش الخطة بتاعه مش انا جالى عريس دى عشان دى محفوظة وبقت قديمه قوى، الحقيقه معنديش اى نصيحه ليكي ازاى تجيبيه كعريس فالبيت بس اللى اقدر اقولهولك مافيش راجل بييجى مجبور ولا مجاملة مكانتش تيجي منه عمره ما هييجى خالص، سلاحك الذكاء بقي وربنا معاكى.

 

دول هما الخمس اسئلة اللي في اعتقادي الشخصي انهم بيضايقوا الرجالة ممكن تقولولنا ايه اكتر اسئلة سألتوها وضايقتهم او العكس ايه اللي الرجالة شايفاه كأسئلة يضايقهم غير الاسئلة اللي فوق دي؟