بعد غزو السوشيال ميديا في السنين الأخيرة علينا للدرجة اللي بقت فيه مواقع التواصل الاجتماعي شيء مهم في حياتنا وبيشغل جزء كبير من وقتنا .. سواء للتسلية أو الاستفادة أو حتى الشغل .. كان لازم ييجي الدور على الأم المصرية عشان تدخل عالم السوشيال ميديا ويكون ليها بصمتها هي كمان .. اشمعنى العيال يعني وهي لا ؟!
بس المشكلة أن دخول الأم المصرية إلى عالم السوشيال ميديا جاء على دماغنا إحنا بسبب اللي إحنا بنشوفه منهم .. واللي هنشوف عينة منه في الجولة دي
  • جنينة الواتساب

2013_1382756863_602
الواتساب .. اللي يعتبر أشهر تطبيقات التواصل بالرسائل القصيرة على السوشيال ميديا .. بالنسبة لأي أم مصرية عبارة عن جنينة كبيرة .. هتلاقيها مليانة ورد وصور مليانة ورد وقلوب ودباديب وعليها تعليقات من نوعية “صباحكم جميل” و “مساء الخير يا أهل الخير” .. أو شوية أدعية كدة من اللي قلبك يحبهم.
الواتساب كمان بالنسبة لأي أم مصرية هو مصدر الإشاعات الأول في مصر .. أي حد عايز ينشر إشاعة في البلد كل اللي عليه أنه يبعتها لأمه على الواتساب بس وفي ظرف ربع ساعة الـ 90 مليون مصري هيعرفوها.
  • الفيسبوك

CiSw5lvWwAElK50
لو مارك ذوكربيرج قرر يلغي أوبشن “الشير” من الفيسبوك هيبقى أكيد بسبب اللي بتعمله الأم المصرية .. الأم المصرية بتحس بسعادة مش طبيعية وهي بتعمل شير .. لدرجة أنها ممكن تعمل شير لصورة بروفايل ابنها بدل ما تعمله لايك وكومنت !
ده غير بقى الفوتوكومنت اللي هتلاقيها مغرقة البروفايلات .. وممكن تلاقي أمك مثلاً مصورة صورتك من البرواز اللي في الصالة وحطاها على بروفايلها .. أو سكرين شوت لخلفية موبايلها اللي هي عبارة عن صورة ليك برضه.
  • اليوتيوب

5
الأم المصرية لم تكتفي بقنوات سي بي سي سفرة وبرامج الشيف شربيني وبقت بتدخل على اليوتيوب تشوف وصفات طبخ وأكلات من جميع دول العالم .. ومع ذلك برضه مفيش أي تغيير في الغدا
أو تلاقيها بتتفرج على فيديو جايب أخبار الفنانين .. طب يا حاجة اقري الحاجات دي على جوجل .. يا حاجة الميجابايتس دي بفلوس مش ببلاش .. تقوم تصيع عليك وتفتح جوجل وتدخل على اليوتيوب منه برضه.

 

  • فيسبوك ماسنجر

23
أداء الأم المصرية على فيسبوك ماسنجر ميختلفش كتير عن أدائها في الواتساب .. بس هي بتستغل ميزة الصور المتحركة GIF اللي ممكن تتبعت على الماسنجر .. بالتالي بتبقى أكتر روشنة .. وبيبدأوا يبعتو لبعض صور روشة طحن وبتتحرك وبتنور في الضلمة.
طبعاً لسه تاتش الأم المصرية موصلش لتويتر وإنستجرام .. وأكيد الأم المصرية بجبروتها هتوصلهم قريب .. وخلينا نشوف الأداء هيبقى عامل إزاي

 

الموضوع ده الهدف منه الضحك مش أكتر .. مش عنصرية ضد الجيل القديم اللي من حقه هو كمان يبقى متطلع على التكنولوجيا ومن حقه يستخدمها بالشكل اللي يناسبه .. وربنا يخليهم لنا.