زي أي بنت مصرية أصيلة، بتقعد في أي مكان، وأول ما تتفتح سيرة الأبراج والحظ بتقول “لالالا، انا مش بصدق التفاهات دي خالص..” ولما بتبقي لوحدها بتفلي المجلات والجرايد عن الأبراج، قررت بما ان موضوع الأبراج ده شاغلني لفترة ولو جزئيا، اني أكتب عنه، بس بطريقتي أنا، مش هقعد أقولك حجرك الكريم المفضل، ولا القمر بيأثر عليك ازاي، ولا الكلام ده، انا هحاول أجيب م الاخر..! حابين أولا كبداية نقسم الأبراج لأربعة كاتيجوري: ناري “اوعي يلسعك” وترابي “غلط ع الجيوب الأنفية.”، وهوائي “وده زعابيبه كتير” ومائي “بلاش تنزل الغويط”.
بصراحة البرج اللي بكتب عنه ده من أكتر الأبراج اللي قتلتني فضولا عشان أكتب عنها، لا لشئ إلا لأني مش باعرف انطق اسم البرج بالانجليزي، باتحول بالظبط ل”بوحة” وهو قدام الظابط “ما تقول يا عم الحاج اسم البرج ايه؟” وهكذا..بس الحمد لله ربنا كرمني وخدت الاسم كوبي وبيست وحطيته ف جوجل وعرفت أخيرا بتتنطق ازاي، وبدأت أكتب فعلا عن البرج ده، اللي متعاملتش كتير مع أبناءه وبناته، بس شكله برج مجنون بصراحة، برج ناري وليلتنا طين مطينة بطين…برجنا هو برج ال”قوس” ونفسي افهم ايه Sagittarius دي، الي بتتنطق “ساجيتيرياس” وايه الحوار ده وليلة كبيرة اوي سعادتك..!
مواليد برج القوس اتولدو ما بين 22 نوفمبر ل 21 ديسمبر، برجهم ناري، برجهم يسمي ببرج القوس نسبة لأسطورة اغريقية “كالعادة” علي اسم القنطور “نص حصان ونص انسان” اسمه “كايرون” وكايرون ده هو اللي علم “أخيل” الرماية بالقوس والسهم، أساطير وألهة ملناش دعوة بيهم يا محي، المهم البرج ده ناري، لا يؤمن بشئ اسمه الصبر أو الانتظار، وخلينا نشوف كدة حكايتهم ايه النهاردة وكالعادة هنبدأ مع الستات زي ما اتعودنا من أول السلسلة..!

أولا الستات..!

1. كن صديقي

download (2)

سيدات برج القوس عاشقات للحياة، بيحبو كل حاجة حواليهم بتكون حلوة ومرتبة وهادية، هدف بنات وسيدات برج القوس في المقام الأول هو انها تلاقي شريك يكون ليها صديق قبل ما يكون حبيب، بتكره انه يكون في العلاقة طرف أقوي من طرف، لذلك أغلب علاقاتهم العاطفية جت مثلا عن طريق زمالة أو صداقة في الشغل/النادي المهم يكون فيه سابق معرفة، استحالة تحطها مثلا في جواز صالونات وتلاقي نفسها فيه، لازم يكون صديق قبل ما يكون حبيب..!

 

2. عاشقة للشهرة وملفتة للأنظار

kim-kardashian-out-in-new-york-city-ny-2-12-2016-1

لما بنت من برج القوس بتدخل مكان، بتكون عارفة من جواها ان كل العيون عليها، لذلك بتتفنن في انها تكون جميلة ومبهرة، يمكن ده بينعكس للأسف بالسلب علي شخصيتها، ف ممكن تكون إلي حد ما سطحية لاهتمامها بمظهرها وشكلها بشكل زيادة شوية عن باقي البنات طبعا، بنات وسيدات برج القوس ميالات للشهرة، مش بتشتغل عشان الفلوس قد ما بتشتغل عشان تكون معروفة أو مشهورة في الكارير بتاعها، الفلوس تيجي لوحدها بعدين..!

 

3. فضولية

images

كلنا عارفين ان الستات فضوليين وبيحطو مناخيرهم في كل كبيرة وصغيرة في الحياة، لكن بالنسبة لنساء برج القوس الوضع مختلف تماما يا برايز..! الست من دول تمتلك جهاز مخاباراتي وحس استخباراتي ملوش حل، بتحط مناخيرها في كل تفاصيل المحيطين بيها، بتكون عارفة مين مصاحب مين، ومين فركش مع مين ومين هيتجوز مين وهكذا، ملهاش حل، لو عاوز تجيب قرار أي حاجة ميل علي واحدة من برج القوس، هتخلصلك الليلة..!

 

4. صريحة

download

شعارهم في البرج ده “أقول للأعور انتا أعور في عينه”، مش بتخاف، مش بتنافق مش بتجمل الكلام، ده ممكن يزعل الناس أحيانا، وأحيانا كتير بيخلي صحابها قليلين، لكن اللي بيفضل بيكون ناس فعلا بتقدر الصراحة وعندها قدر من الفهم والوعي ان صراحة بنات وسيدات برج القوس دي جزء لا يتجزء من شخصياتهن الفريدة والجميلة..!

 

5. ثقتها زيادة ف نفسها

download (1)

شخصية أنثي برج القوس، متهورة بطبعها، عاشقة للمغامرات، وكذلك عندها للأسف ثقة زيادة في نفسها، الموضوع ده ممكن يعملها مشاكل بس هي أغلب الوقت حاطاه تحت السيطرة، بس للأسف ده دافع من برجها مش منها، دايما بتتعامل بمبدأ “علي نفسك مش عليا” مفيش حد هنا زيي ولا شبهي، انا محصلتش ومش هييجي زيي تاني..!

ثانيا الرجالة..!

1. بيحب السفر..!

download (3)

عارف صاحبك اللي تلاقيه ف “دهب” ف شم النسيم، وتلاقيه راح “طابا” في العيد الصغير، وطلع “راس شيطان وراس محمد، وكل الروس” في الويك إندز بتاعته، أهو ده بقي من برج القوس، شخص بيتنطط ف كل مكان، ملوش مسقط رأس، تحسه مولود في سوبرجيت، بيعشق السفر زي عينيه، ممكن مياكلش ولا يشرب بس يسافر يشوف أماكن جديدة، غالبا صاحبك ده شايل كاميرا بروفشنال عشان يصور كل الحتت الحلوة دي، ولما بتسأله انتا بتعمل بيها ايه، بيقولك ببساطة “باحب التصوير”، مش مصور عادي ولا عامل صفحة فوتوجرافي سبحان الله..!

 

2. مهمل وملول..!

cutcaster-photo-100079124-Careless-Smoker

ذكور برج “القوس” للأسف هما أسوأ ذكور الواحد ممكن يرتبط بيهم في تاريخه، أيوة أسوأ من برج الجوزاء والأسد يا أوختي، للأسف بيزهق بسرعة ومهمل جدا، لا ليه في الاستقرار ولا ليه في انه يحفظ أعياد ميلاد وذكري سنوية لأول لقاء، وذكري أول بوسة وذكري أول مسكة ايد وهكذا، هو بيحبك، هتحسي بكدة، مش هيتكلم كتير، وانتي هتتخانقي معاه أكتر، انجوي يا روحي 😀

 

3. متفائل دايما

download (4)

في أحلك الظروف، أسود الأوقات، رجل برج القوس شايف قدامه نور في نهاية النفق، دايما عايش بأمل واحد في الحياة، بيحب ينشر الحب والتفاؤل وسط الناس، وبيحب يكون عامل زي الطير الخفيف كدة، مبتسم، هادي، دايما لصحابه البنات زي الحضن، بيطمنهم وبيهديهم..!

 

4. workaholic حمار شغل يعني

download (5)

لو فيه واحد بياخد جايزة موظف الشهر كل شهر ف شغلك فتش وراه هتلاقيه برج القوس، أيوة هو زميلك اللي بيطبق شفتين وبيفضل قاعد يكلم العملا طول الليل يعطف ويلطف، وهو اللي سر مديره معاه، ولو حد بيحب حاجة من المدير بيروحله هو يبسه ع المدير، وهكذا، أشطر حاجة فيها هي الشغل تقريبا، ولازم يكون باستمرار فيه تحديات وصعوبات عشان يحس بمتعة الشغل، لأنه لو حس ان اللي بيعمله روتيني هيستقيل هيستقيل..!

 

5. صياد بارع..!

hqdefault

زي ما قلنا ان رجل برج “القوس” شغيل بارع وعامل جيد، ف هو بردو صياد بارع، صياد ستات، وصياد أهداف، وصياد شهرة، بيعرف يصطاد كتير اوي، فضوله في التعرف علي الناس هو اللي بيخلي دايرة علاقاته واسعة جدا، خصوصا الرجالة، ممكن يفضل يجري شهر ورا واحدة مثلا عشان كتبت كومنت عجبه، ولا يروح يتعرف علي واحدة في الشغل عشان حاطة بيرفيوم عاجبه وهكذا، صداع للبنت اللي مرتبطة بيه ياعيني..!

 

تركيبة برج القوس ككل تركيبة لطيفة، بتجمع ما بين الجنان والفضول وحب المغامرة، …. واستنونا الحلقة الجاية..!