زي أي بنت مصرية أصيلة، بتقعد في أي مكان، وأول ما تتفتح سيرة الأبراج والحظ بتقول “لالالا، انا مش بصدق التفاهات دي خالص..” ولما بتبقي لوحدها بتفلي المجلات والجرايد عن الأبراج، قررت بما ان موضوع الأبراج ده شاغلني لفترة ولو جزئيا، اني أكتب عنه، بس بطريقتي أنا، مش هقعد أقولك حجرك الكريم المفضل، ولا القمر بيأثر عليك ازاي، ولا الكلام ده، انا هحاول أجيب م الاخر..!
حابين أولا كبداية نقسم الأبراج لأربعة كاتيجوري: ناري “اوعي يلسعك” وترابي “غلط ع الجيوب الأنفية.”، وهوائي “وده زعابيبه كتير” ومائي “بلاش تنزل الغويط”.
  النهاردة انا باتكلم بحب شديد، بتكلم عن برج من أطيب الأبراج وأرقها قلبا، ورغم طبيعته الهوائية، إلا انه بجد، بيتمتع بطيبة وصفاء وبهجة قلما تجتمع في انسان واحد عامة، النهاردة معادنا مع برج “الدلو” أو Aquarius..!
 رغم طبيعة برج “الدلو” الهوائية واللي بتخليه مزاجي أحيانا، إلا انه بيكون شخص طيب جدا، الأسطورة الأغريقية بتقول ان الإله “نبتون” شاف بنت أسمها “أوريتا” بتملا “دلو” من بحيرة، ف أعجب بيها وحبها، وبدأ يناديها كل ليلة عشان تخرج وتملا الدلو ده م العين اللي جنب بيتها، لقت القمر بيبتسم لها، وحوّل الإله نبتون نفسه لفرس، خطف “أوريتا” علي ضهره، وطلع بيها ع السما، واتدلق الدلو من ايدها وبقي الكوكبة النجمية الموجودة حاليا، ما علينا، مواليد برج الدلو اتولدو في جو شتوي حميمي من 20 يناير ل 81 فبراير، في جو شتوي جميل، أجمل وقت في السنة تقريبا..

 

خلونا زي العادة نبدأ مع صفات “ستات” برج الدلو و..ما تيجي نشوف؟

 

1. هادية

download (2)

نادر لما تلاقي بنت أو ست قاعدة في ركن لوحدها، ماسكة الموبايل بتلعب، بتسمع أغنية، بتقرا كتاب، لو بنات برج الدلو أجدع بنات، وأهدي بنات، مبيحبوش يأذوا حد، ولا بيتدخلوا في حياة؛ البنت اللي مش بتجر شكل حد وفي حالها دي، أكيد هتطلع من برج “الدلو”..!

 

2. حرة..مستقلة

7008242-beautiful-woman-wallpapers-free

أكتر حاجة مبتحبش تحسها بنت أو ست من برج الدلو هي انها متقيدة أو متكلبشة جنب حد، بتكره كده، وبتحس انها لازم تطير بأي شكل كان، حاول لو ارتبطت بأنثي من برج الدلو انك تسيبلها مساحة، متملاش عليها حياتها عشان متكرهكش، دايما سيبلها وقت تشوف مامتها، صحابها، تقعد تقرا، خليها ف محيطها الخاص شوية عشان تفضل تحبك وصدقني هتحبك اكتر..!

 

3. صاحبة جدعة

download (3)

من أكتر الناس اللي بتبقي مش علي بعضها لو حد من صحابها عنده مشكلة، مش بتطمن ولا يهدي ليها بال الا لو صحابها كلهم كويسين، مستعدة تاخد رصاصة بدل حد من صحابها لو وصل الموضوع للرصاص، الدنيا بالنسبة ليها دايما بخير، وكل مشكلة ليها حل، بس انتا افتح ليها قلبك واتكلم وهي هتساعدك حتي ولو بحضن..!

 

4. مبتكرة

download

دايما أنثي برج “الدلو” بتفكرني ب”أحمد زويل” في معمله، تدخل المعمل وتطلع بشئ مبهر وجديد يزغلل عين البشرية كلها، سواء بقي شئ في الشغل، في المطبخ، في اللبس، كلها ابتكارات أنثي برج الدلو مش بتعرف تعيش من غيرها، حاول دايما تقولها مجاملات علي أي حاجة بتبتكرها، أو هتخلي أيامك سودا..!

 

5. عنيدة

download (1)

“نقول طور يقولو احلبوه” هكذا هو شعار أنثي برج الدلو، هي من أكتر الأبراج عندا وتصميما في الكووون كله، بتفضل مصممة علي رأيها حتي ولو غلط، ولو فضلت تقنع فيها شهر بردو هتفضل علي نفس وجهة نظرها، ولو هزت دماغها وقالت انها موافقة، متصدقهاش، هي كدابة وبردو هتعمل اللي هي عاوزاه في الاخر..!

 

ثانيا الرجالة:

1. صداقاته كتير

download (4)

رجل برج الدلو مش بيدور علي الحب في المقام الأول، دايما علاقاته كتير، ومتشعبة، وأغلبها نسائية، مش بغرض الحب، بغرض الصداقة، لأنه دايما بيحب يكون متلاقي ذهنيا مع كل الناس اللي حواليه، بيتفاهم بالتخاطر معاهم، بنظرات العيون، ولازم هو وصحابه يكونوا علي نفس المستوي من التفكير والوعي، وإلا بيبدأ ينسحب من وسطيهم ويتجه للعالم بتاعه..!

 

2. بيحب النضافة

download (5)

“نضيف لحد الوسوسة” ده رجل برج الدلو، لو هو بيشيل شنطة فغالبا هتلاقي فيها ديتول ووايبس، ومناديل وش، ومش بعيد تلاقي سبراي عشان الحر، مبيحبش حد يشرب من الBottle بتاعته، مبيحبش حد يلبس هدومه، حاول دايما تبعد عن أشياءه وملكش دعوة بيها، هيمرمطك لو بوظت فيها حاجة، آديني قلتلك أهو..!

 

3. بيحب الغموض

download (6)

زي ما قلتلكم هو صداقاته كتير، لكن مش كلها بدافع الحب، رجل برج الدلو بيعشق الست الغامضة، الست اللي زي الكتاب المفتوح قصاده بتبقي زي الاسطوانة المشروخة، محدش عاوز يسمعها، بيستمتع باستكشاف الست الغامضة، لذلك لو عاوزة تكسبي قلبه، حاولي تبقي تقيلة عليه، ومتعرفيهوش كل حاجة عنك، ولاعبيه، هو بيحب كدة قوي

 

4. ذاكرته ضعيفة

img_0168

دي نوعية الرجالة اللي بتنسي عيد جوازها، وعيد خطوبتها، وعيد تحرير سيناء، للأسف مش بيكون بمزاجه، بس من كتر الناس والأفكار اللي ف دماغ رجل برج الدلو مش بيركز ف تفاصيل تماما، حاولي دايما تكوني Gentle معاه في الجزئية دي وبلاش الخناقات الكتير، لأنه بيزهق بسرعة 😀

 

5. بيحب المفاجآت..!

download (7)

“يلا نروح نتغدي سمك في السويس”، “ما تيجي نقضي الويك إند في الساحل”، دي دايما بتكون نوعية المفاجآت اللي بيحبها رجل برج الدلو، عاشق للمفاجآت ويحب انه يبسط كل الناس اللي حواليه، دايما جيوبه مليانة هدايا ولو هدايا صغيرة، هو دايما بيقوم بدور بابا نويل وسط أهله وصحابه، ولو مع حبيبته دايما بيفاجئها بحاجات صغننة بتخليها طايرة من السعادة..!

 

لو بقي ارتبطي برجل من برج “الدلو” ياريت تاخدي الكلمتين دول كدة نصيحة مني ليكي، عشان تعرفي تكسبيه ويحبك أكتر..
1. صاحبيه
2. قوليله نكت، ضحكيه
3. متقيديهوش، سييبه حر هيرجعلك
4. اعمليله مفاجآت
5. لو بتتخانقو كلميه بالمنطق، عشان يقتنع
ولو المقالة عجبتك اعمل شير وريتويت وتاج لصاحبك/صاحبتك من برج الدلو، واستنوني قريب مع آخر برج !