زي أي بنت مصرية أصيلة، بتقعد في أي مكان، وأول ما تتفتح سيرة الأبراج والحظ بتقول “لالالا، انا مش بصدق التفاهات دي خالص..” ولما بتبقي لوحدها بتفلي المجلات والجرايد عن الأبراج، قررت بما ان موضوع الأبراج ده شاغلني لفترة ولو جزئيا، اني أكتب عنه، بس بطريقتي أنا، مش هقعد أقولك حجرك الكريم المفضل، ولا القمر بيأثر عليك ازاي، ولا الكلام ده، انا هحاول أجيب م الاخر..! حابين أولا كبداية نقسم الأبراج لأربعة كاتيجوري: ناري “اوعي يلسعك” وترابي “غلط ع الجيوب الأنفية.”، وهوائي “وده زعابيبه كتير” ومائي “بلاش تنزل الغويط”.
برجنا النهاردة برج متقلب المزاج، متغير الأهواء، متغير العواطف، الشئ الوحيد الثابت فيه انه مفيش فيه شئ ثابت فيه، برج هوائي، زعابيبي معتبر، حاول تاخد منه ساتر عامة، برجنا هو برج الرشيدي الميزان، لالا، الميزان بس احنا اسفين يا حلاوة 😀 اختراع يا كوتش عامة..! برجنا هو Libra الميزان….ربنا يجعل كلامنا خفيف عليهم..! دايما زي ما اتعودنا بنبدأ بالستات، بنات وستات برج الميزان اللي بقو سبب رئيسي في انتحار عدد كبير من رجال الكوكب، وشلل عدد أكبر منهم، و…ماتيجي نشوف أحسن؟؟

أولا الستات (كالعادة)..!

1- عاوزة أحس “بالأمان” يا ابراهيم…!20340943-og

مشكلة الستات الأزلية انها بتحب تحس بالأمان، بنات برج الميزان بالذات بيحتاجوا الدعم دايما من شركاهم وحبايبهم، دايما محتاجة دعم عاطفي أكتر من المادي، دايما محتاجة حد يفهمها ويحبها ويحتضنها ويتفهم طبيعتها الحساسة، ف دايما أغلب مشاكلهم بتكون ع الجانب الحسي مش المادي، أغلب خلافاتهم بسبب ان الراجل باصص انه “مقصرش” ف حاجة وهي شايفة انه “مش موجود” كفاية معاها، وهكذا، حاولو تتفاهموا شوية يا جماعة مش كدة، صوتكم جايب آخر الشارع..!

 

2- ازدواجية..!

hqdefault

كل حاجة وعكسها ف البرج ده، يمكن أكتر من برج الجوزاء، بتواجه أنثي برج الميزان صعوبة كبيرة في التغلب علي كل الازدواجيات اللي جواها، ف تلاقيها دايما ف حالة صراع مع النفس ما بين الأخلاق والمبادئ والحقيقة، ما بين أنوثتها وأدبها وقلبها، وهكذا، بتعيش صراعات كتير ما بينها وبين نفسها، لذلك دايما بتاخد وقت طويل في التفكير..!

 

3- سكتها مفيهاش مطبات

download

من أكتر الناس المؤمنة بمقولة “أٌقصر طريق ما بين نقطتين هو الخط المستقيم”، دايما في شغلها هي شخص نزيه، بتكره الوسايط، وبتحس بالظلم لو حد أخد منها حاجة بالكوسة، بتشتغل بشكل سلس ومفيهوش معوقات، بتستمتع بشغلها وبتبدع فيه جامد، ودايما ليها التاتش بتاعها الي محدش يقدر ينكره..!

 

4- بسيطة وسلسة

Amala-Paul-Simple-Girl-HD-Wallpapers

بالنسبة للموضة واللبس، بنات وسيدات برج الميزان بيكرهو الاكسسوارات والشخاليل، واللبس المتكلف، والنقشات الكتير، دايما بتاخد من الموضة الحاجة اللي تناسبها ومبتمشيش مع التيار وخلاص، دايما ليها شكل مستقل ومميز ما بين صحابها واخواتها، حتي في التعامل مع الناس، السلاسة دي بتنعكس علي تصرفاتها بشكل كبير..!

 

5- مترددة

21245471

زي ما قلنا لوجود متناقضات كتير جواها بتاخد وقت طويل في التفكير، كذلك لما بتيجي تختار ما بين حاجتين، هي دي البنت أو الست اللي ممكن تفضل تلف تلات أسابيع علي شوز معينة وفي الاخر متشتريهاش، أو لو حد قالها وحشة ترميها، دايما قراراتها مش سهل انها تاخدها ودايما محتاجة دعم.

ثانيا الرجالة ( يلا مش مهم):

1- بيهرب من المواجهات

Runaway-Groom

طبيعة رجل الميزان انه ف حاله، ملوش دعوة بحد، لذلك هو أول واحد بيهرب م الخناقات، ونادر لو عمل مشاكل او خلافات في الشغل أو البيت، بيحب دايما يريح اللي قصاده ويخليه سعيد ومبسوط، بس أحيانا لو فيه مشاكل في حياته بيأجل مواجهتها، ودايما شعاره في الحياة “خلينا نتكلم بعدين في النقطة دي”، ده طبعا بيعمل مشاكل لو مثلا هو مرتبط بأنثي من برج ناري زي “الحمل – الثور” وهكذا.

 

2- بيحب المظاهر

0b4af180f33b8a642f08abef1e95a98d_123490450_147

 

رجل برج الميزان عاشق للمظاهر، بيحب يدلل نفسه بأقصي درجة، شيك، نضيف، راقي جدا في التعامل، من الناس اللي بتحب الشوبنج، أو بيعرف يختار هدومه، م الاخر مش بيستخسر في نفسه حاجة، دايما بياكل أكل حلو، بيلبس لبس حلو، بيتكلم كلام حلو زي ما هنعرف كمان فقرة..!

 

3- دبلوماسي

2014-635327249296001842-600000

نقطة موجودة في رجل برج الميزان ياريت تحاسبي منها عزيزتي حواء، انه دبلوماسي، كلامه حلو، بيثبت بسرعة، ودايما محاط بالستات في مكان عمله، لأنه لسانه حلو، كذلك لأنه دبلوماسي فتلاقيه “كلك ف عشرة بلدي” زي ما بيقولو بالدارجة، بالتالي ده يثبت أول نقطة اتكلمنا فيها، انه هراب م المواجهات، النوعية دي م الرجالة عامة مثلا بتجاوب علي سؤال “هتقابل بابا امتي؟” باجابة وافية عن خطورة “الاحتباس الحراري علي دببة القطب الجنوبي”، انتي تنسي موضوعك الأصلي، وهو يهرب م السؤال …خطة ف منتهي الذكاء يا رجل الميزان..!

 

4- مسالم وهادي

download (1)

رجل برج الميزان “كتكوت” في البيت، ضيف خفيف، محدش بيحس بيه، مبيطلبش حاجة من حد، هو الرجل المناسب اللي يعيش عازب طول عمره وميحسش بتعب، هو بردو رجل مسالم جدا، ملوش أي نوع من العداوات، ولا حد يقدر يزعله ولا يقدر يزعل حد أو يجرحه بكلمة..!

 

5- اجتماعي بطبعه..!

images

لأنه دبلوماسي وهادي، طبيعي يكون كائن اجتماعي، لو شفت رجل الميزان في شغله بتحس انه زي “حمامة السلام” وسط الناس، بينشر الطاقة الايجابية بين الناس، بينشر طاقة الحب “روح للناس يا حب”، كلهم البنات بتحبه، وكل البنات حلوين، ومين مين ودا ودا، حاسبي عزيزتي حواء علي رجل الميزان، عينه هتزوغ غصب عنه..!
خلاصة برج الميزان انه برج “لطيف” لكن ما يعيبه بشدة هو البطء في اتخاذ القرارات والتردد الشديد، لذلك دايما رجل أو امرأة برج الميزان محتاجين شريك بيتمتع بطبيعة قيادية وحازمة جنبهم، عشان نتجنب المشاكل زي الضغط والسكر والمرارة وخلافه، أنثاه بتكون أم مثالية لكن الأب محتاج يظهر انه حازم بشكل كبير، رجل الميزان اجتماعي ولطيف جدا، لذلك دايما محتاج شريكته متكونش منطوية ف تقريبا أنثي العذراء، ورجل الميزان هما اخر اتنين ممكن يتجوزوh ف العالم وإلا هيتطلقو بعدها بتلات دقايق..!

 

استنونا ف الحلقة الجاية