زي أي بنت مصرية أصيلة، بتقعد في أي مكان، وأول ما تتفتح سيرة الأبراج والحظ بتقول “لالالا، انا مش بصدق التفاهات دي خالص..” ولما بتبقي لوحدها بتفلي المجلات والجرايد عن الأبراج، قررت بما ان موضوع الأبراج ده شاغلني لفترة ولو جزئيا، اني أكتب عنه، بس بطريقتي أنا، مش هقعد أقولك حجرك الكريم المفضل، ولا القمر بيأثر عليك ازاي، ولا الكلام ده، انا هحاول أجيب م الاخر..! حابين أولا كبداية نقسم الأبراج لأربعة كاتيجوري: ناري “اوعي يلسعك” وترابي “غلط ع الجيوب الأنفية.”، وهوائي “وده زعابيبه كتير” ومائي “بلاش تنزل الغويط”. النهاردة موعدنا مع البرج العزيز علي قلبي، برج عملوله مثل مخصوص، البرج اللي اللون الأحمر بيستفزه، البرج أبو قرون، برج “الثور” أو ما يعرف باللاتينية “Taurus” ، مواليد برج الثور اتولدو في الفترة من “20 أبريل – 20 مايو” (عيد ميلادهم قرب). برجنا برج مزعبب، ترابي خماسيني، ينصح لأصحاب الجيوب الأنفية الضعيفة بالابتعاد، خدلك ساتر ويلا نشوف مع بعض، ايه أهم صفات البرج النطاح ده، رجالة وستات..

أولا: ليديز فيرست (الستات)

 انا باكيناه وانا ماسكة فنفسي

1

أغبي شئ ممكن يعمله أي راجل ف الوجود أنه يخلي ست من برج ال”ثور” تغير، هي مش بتغير لثقتها الكبيرة واللامحدودة ف نفسها، فلو شافتك عمال تتحنجل يمين وشمال قال ايه فاكرها هتغير، تبقي هتجيبه لنفسك، هتسمع كلام حلو أوي زي “اه فعلا هي حلوة”، ولو سألتها السؤال الفتئ بتاع “انتي مش غيرانة ولا ايه يا حبيبتي؟” هتقولك “انا مقارنش نفسي بحد” وساعتها هيبقي شكلك “قطونيل” بشكل كبير. محاولة اثارة غيرتها شئ عديم القيمة، أما لو قفشتك بتغازل أي واحدة بجد، أو بتعدي الحد المسموح بيه م الهزار ودخلت ف الجد هتكون ليلتك أسود من قرن الخروب…هتوحشنا..!

 

 ألوان..ألوان…ألوان…
2

تشتهر ستات برج الثور بحبهم الشديد للألوان، خصوصا اللون الفاروزي، متفهمش اللون ده عاملهم ايه، والدتي عافاها الله برج الثور وعندنا ف البيت كل أطقم الملايات لون واحد، ف نشيل لبني نحط فوشيا، نشيل فوشيا نحط لبني حاجة يعني رهيبة..
الألوان كذلك بتأثر عليه بشكل كبير، ممكن ست من برج الثور تقضي نص ساعة قصاد مراية بتوفق لونين علي بعض، او بتشتري سكارف بدرجة لون معينة، والاختيار والتحدي الأكبر بقي يوم ما ربنا يكرمها وتفكر تغير دهانات البيت، بتكفر ذنوب النقاش تسعين سنة قدام..!

 

 أعظم عظمات الأمهات

3

من أكتر الأمهات اللي لازم نرفعلهم التحية بأمانة، اهتمام غير مسبوق تفاصيل حياة ولادها، اختيارات بعد تفكير وعناية، ف المدارس، ف اللبس، ف العلاج، ف كل تفاصيل حياتهم، أم شاطرة، لهلوبة، بتعرف توازن ما بين البيت والزوج والولاد والجيران والقرايب  وكل أنواع الناس، لكن فيها عيب واحد..خطير…!
بما انها بتتدخل بشكل كبير في حياة ولادها، فادراكها انهم كبرو ومبقوش معتمدين عليها بتتجن بقي، وبتفضل تعاملهم كأنهم أطفال – هما كل الأمهات كدة – بس أم برج الثور بزيادة أوي، فطبعا ده يعني مشاكل لاأول ليها ولا آخر.

 

 أصحاب للأبد..!

اصحاب ولا بيزنس
اصحاب ولا بيزنس
شئ شائع جدا انك تلاقي ست من برج الثور عندها صحاب م الحضانة مثلا، وهي قربت تطلع ع المعاش، عندهم روابط غريبة بيقدرو يخلوها مشدودة بينهم وبين صحابهم، مهما مرت الأيام عندهم قدرة انهم يرفعو سماعة التليفون ويعيدو الوصال بكلمتين ونص، وتقابلهم كأنهم كانت معاهم امبارح.
امرأة برج الثور هي أصدق وأوفي صديقة ممكن الواحد يحظي بيها ف حياته، لكن لازم دايما توصل الود عشان تفضل معاك.

 

 المريسة

4

أحد العيوب القاتلة في ستات برج الثور هي ال”مريسة” الزيادة، كله عاوز يشتغل مدير وخلاص، مع انه ممكن ميكونش بيعرف يدورها بس أهو “ممكن أجرب يمكن أطلع بعرف” وحاجة يعني، اوف خالص..!
الطريقة الوحيدة اللي تتعامل بيها مع ستات برج الثور وهما بيتمريسو عليك انك تفكك منهم نهائي، اولا لو دخلت معاها ف نقاش مش هتخلص، ثانيا هيعند أكتر واحنا مش ناقصين مشاكل..!

 

ثانيا: الرجالة (الأخير ربه كريم)

 بطئ..بطئ…بطئ

5

من عيوب الرجالة عامة هي “قلة الحركة”، يعني بعد ما يرجع م الشغل بتلاقيه ركن ع الكنبة كدة مبيقومش غير للنوم، ولولا انه ف بيت محترم كان عمل بيبي مكانه..! رجل برج الثور بقي، بطئ بزيادة، يعني ممكن تفضلي تتحايلي عليه سبعين سنة يروح يطمن علي الولد ف مدرسته، أو يقوم يوصل مامته للدكتور “أيوة مامته هو” وهكذا..
البطئ برضه عند راجل برج الثور مش بطئ حركة لا، ده كمان بطء تفكير، يعني الكارثة أكبر بكتير، بيطبق حرفيا مشهد بوحة بتاع “حضرتك بتكلمني” ف تضطري تعيدي م الأول تاني عشان يستوعب وهكذا، امسكي أعصابك يا بنتي..

 

أبناااااائي أعزااااائي فلذات أكبادي

6

ونيس، وطوابير ونيس، ومواعظ ونيس، رجل برج الثور بيحب المواعظ جدا، لما بيخلف وولاده بيكبره بيلاقي المجال والفرصة انه ينشر عليهم خبرته العظيمة ف الحياة، وخلاصة تجربته الفلسفية العميقة اللي أدت بيه انه يشتغل موظف درجة خامسة ف مصلحة حكومية ملهاش لازمة..! خبرات الأبهات والأمهات كويسة وكل حاجة، لكن الشئ اللي يزيد عن حده يتقلب لضده، ولذلك أول ما الطابور بتبدأ بتلاقي حملة فرار سريع بتبدأ بالأولاد وراهم الأم

 

محدش يقاطعني

7

من أجمل مميزات وعيوب برج الثور في الرجالة بالذات هو صعوبة احتفاظهم بتسلسل أفكارهم، فيفضل يزعق يزعق ولما تيجي دبانة علي وشه تنسيه كل حاجة، زي فيلم “فاصل ونعود” بالظبط..! لذلك حاول تستغل النقطة دي لصالحك أو لصالحك عزيزتي حواء، وكل ما تلاقي الموضوع مش عاجبك غيريه وتوهي، وهو نفسه مش هيفتكر أي حاجة..! نظرا لأنه مش بيعرف يركز بسهولة ف لو حد قاطعه بيزعقله وبيتعصب عليه، فياريت تبعد عن مرمي ايديه بأي شكل من الأشكال، نسيت بس أقولك انه عنيف شوية ويسهل اثارة غضبه، انا حذرتك أهو

 

نزيه ويحب النزاهة

8

معروف عن الراجل ده انه بيعشق النزاهة والشياكة، ريحة البيرفيوم بتاعه بتكون جايبة لآخر الشارع، القميص المكوي بيكون علي سنجة عشرة، من وقت للتاني ممكن يطلع Day Use ف أي مكان يغير جو، بيشتري ساعات غالية، أكل غالي، يحب ينشر السعادة علي المكان بنزاهته. أحيانا ما تكون النزاهة كارثة علي صاحبها بسبب انه بيكون مسرف جدا لدرجة انه بيصرف اخر قرش ف جيبه، المهم ينبسط..!

 

ألعوبان

9

الجزء اللي هيعجب أغلب القراء، برج الثور يعتبر أكتر برج “شهواني” في الأبراج  دايما رجل برج الثور بيبقي عايش دائما وأبدا عشان يرضي شهواته الدنيئة وأغراضه الخسيسة “الرجالة كلهم كدة بس هو أكتر”، ولو متجوز طبعا بيكون مقضيها ومش هامه. اما لو لسه سنجل ياريت تاخدي بالك عزيزتي حواء وحاولي تحلقي عليه قدر الامكان، لأن أي مزة معدية هتعلقه منك، آمين، اللهم بلغت *بصوت أحمد عز ف ولاد رزق*
نهايته، برج الثور من أدمث الأبراج أخلاقا وأطيبها عشرة وأوفاها، بس يحب ياخد برستيجه ووضعه قدر الإمكان، ويحب يحس انه كبير القعدة، وميحبش حد أصغر منه يتنطط عليه، خد بالك بقي وانتا بتتعامل..!