البديهي جداً إنك لما تنضم لجروب على الفيسبوك خاصة لو كان جروب مغلق انك تقرا التعليمات بتاعت الجروب وسبب تكوين الجروب ده وأهدافه وأيه اللي ممنوع يتنشر فيه، طبعاً مش كل الناس بتعمل كده، وعادة بتحصل مشاكل كتير أو مواقف مضحكة بسبب ده، ولكن في المقابل بيكون في بعض “الجروبز” على الفيسبوك ملتزمة وده بردو بيخليها ممتعة جداً، ولأني بهتم بحاجات كتير حظي سمح لي اني اكون في جروبز كتيرة وحبيت العوالم دي جداً وفي الموضوع ده هكلمكم عن الجروبز دي سواء كانت مغلقة أو مفتوحة وعن ايه اللي بيدور جواها

1-      Plant Based Diet Egypt

1

الجروب ده مش مغلق لكن مسلي جداً، بداية واضح جداً من اسمه انه عن  نظام غذائي يعتمد على الأكلات النباتية فقط، يمكن اللي محبتوش في الجروب ده انه بيمنع كل حاجة تقريبا وانا مبطلتش غير اللحمة والفراخ بس بستفاد منه في طرق طبخ الخضار والمكرونة المختلفة، الجروب ده فيه حوالي 37 الف بني ادم من بينهم باسم يوسف وسيمون وطبعاُ مش هكلمكم عن التعليقات اللي بتيجي لما حد منهم يكتب بوست “هو انت فعلا بااااسييم” ، ” لو سمحتي بجد قوليلي هو انتي فعلا سيمون الفنانة” وأشياء من هذا القبيل، بس يمكن أكتر حاجات مضحكة واجهتني في الجروب ده لما دخل واحد حاطط صورة فرخة مسلوقة ومعمولة طاجن وكاتب “عشان اللي مش بيحب الفراخ مسلوقة”، طبعا هو قرى كلمة دايت في العنوان وشاف ناس عماله تحط صور اكل، مفكرش يقرا التوصيف بتاع الجروب ولا يقرا ايه اللي الناس بتكتبه من الاساس، طبعا الناس هجمت عليه في التعليقات لحد ما شال الصورة وغالبا شالوه هو شخصياً، الموقف التاني واللي اقنعني أن اللي اصعب من انك تجمع بنات كتير في جروب واحد، هو انك تجمع رجالة كتير في جروب واحد فيه بنات، واحد دماغه عالية دخل يسأل “هو الكحول ممنوع في النظام الغذائي ده” وفيما يقرب من 150 تعليق مفيش ولا تعليق واحد يخص النظام الغذائي النباتي بل تحول البوست الي منصة للدفاع عن الدين و”انت هتدخل النار اصلا” واشياء من هذا القبيل، وبدأ كل واحد منهم في بوستات جديدة منفردة يشرح وجهة نظره عن الحرام والحلال في غستعراض واضح للعضلات كأي ذكر بيحترم نفسه في اي موسم تزاوج.

2-      في جانب النجوم

2

وده من أقرب المجتمعات وده مجتمع مغلق على كل محبي كتابات الرائع أحمد خالد توفيق، وفي جانب النجوم هو أسم احد أعداد سلسلة ما وراء الطبيعة، الجروب ده مبهج وفيه حنين ونوستالجا رائعة، كل اللي فيه بحس انهم صحابي من غير ما اعرفهم شخصيا، بنتكلم بلغة واحدة ميفهمهاش غيرنا وبنتبادل كل أخبار أحمد خالد توفيق وبنفكر بعض بأحلى زكريات لينا وعلى الرغم من إن الجروب بقاله سنين الا اني لحد دلوقتي ماشوفتش عليه أي اختلاف في وجهات النظر بين اعضائه.. فعلاً من أهدى وأنضج المجموعات اللي انضميت ليها.

3-      7ad ye3raf Ladies only

3

أكتر حاجةو مستغرباها في الجروب ده هو عدد اعضاءه الكتير جدا اللي فوق 30 الف ودايما بسأل نفسي هما ازاي ضامنين انه Ladies only ! ومن جوايا واثقة أن في كام واحد كده باكونت مش حقيقي بيتفرج على العالم الخاص بالبنات ده، في الجروب ده تقريبا  بنات كتير جداً متعرفش فيه بس فعلا كل البنات بتتعامل فيه مع بعض بحب جداً ومشوفتش أي نوع من الخناقات، الحاجة اللي خلتني اقتنع ان لو البنات لوحدها أو الرجاله لوحدها هيكونوا على حقيقتهم جداً لأن محدش منهم مضطر يبهر الجنس الاخر، حسيت من الجروب ده أد ايه ربات البيوت بيحتاجوا ونس وبيكون عندهم اخلاص قوي جدا وجبار ناحية الجروبز اللي شبه كده عشان بيحتاجوا يحسوا انهم بيروحوا اي مكان تاني غير البيت وان ليهم مجتمع بعيد عن اسرتهم الصغيرة، وبدأ الجروب من الاسئلة العامة الضرورية لاسئلة شبه “انهي جزمة في دول احلى وبسرعة عشان انا في المحل” في الاول كنت شايفة ان دي سذاجة، وبعدين لما فكرت في الموضوع حسيت انه ممكن فعلا يكون شيء صحي انك تحب ناس وتحتاج رايهم بالشدة دي والأهمية

4-      شخاليل

4

ده جروب نسائي جدا حيث الدلع كله، ومغلق، وفي حوالي 30 بنت بس وكلنا عارفين بعض، صحيح الجروب ده زمان او لما اتعمل كان له حادثة سيئة عن تسريب معلومات خاصة من داخل الجروب لبعض الناس، لكن لما المشكلة دي اتحلت وتم التخلص من العناصر الجاسوسية بقى من احلى واقرب وادفى الجروبز لقلبي، واحلى حاجة فيه اننا بنقدر نتكلم في كل قلة الادب براحتنا ونقول رأينا في الرجالة بصراحة، ويا سلام لو واحدة جت ترتبط بواحد، لو كتبت بس اسمه على الجروب باقي البنات يجيبوا لها تاريخ كامل وغالبا بيطلع مفضوح، م الاخر الجروب ده بيفكرني بهند صبري في احلى الأوقات لما جت تتخانق مع الراجل في العربية وقالت لكل الستات انا يسرية وليا واجب في كل بيت في الحتة فنزلت الستات رنت الراجل علقة معتبرة.

Don’t Shop Here – (A list of Untrustworthy Shops in Egypt5-

5

وده بصراحة جروب أصابني بالاكتئاب والحزن، هو جروب كتير وفيه حوالي 200 الف بني ادم مهمتهم انهم لما يشتروا حاجة من مكان و متعجبهمش يدخلوا يقولولك ما تشتريش حاجة من المكان ده، يعني كان بالنسبة لي ممكن يسموه “عارف بتاع العصير اللي بعد الكوبري… وحش ما تشربش منه”، بعد ما ركزت في الجروب يومين حسيت ان معدش في مكان ممكن الجأ له في الحياة، اللي يشتري سندوتش ويطلع بارد يدخل بقولك متجبش حاجة من المحل ده، حقيقي محبتوش وبطلت اتابعه، لأن طبيعي جدا في اي مكان في العالم ان هتحصل مرة والمكان ده هيغلط مش معنى كده ان المكان كله فاشل، الي جانب اني بكره اي حاجة مهمتها التركيز على الحاجات السلبية وبس.