Age is issue of mind over matter, if you don’t mind it doesn’t matter” Mark Twain”
أغلب الممثليين ابتدوا حياتهم الفنية فى سن صغير ,الا ان النجاح والشهرة ملهمش سن معين وكتير من الفنانين كسروا القاعدة ونجحوا وهم كبار علشان يثبتوا ان مفيش حاجة اسمها القطر فاتك .

1- محمود الفيشاوى

20151129_120803_6149

مواليد 1950 ,أول ظهور ليه كان فى دور “جلال” والد احمد حلمى فى فيلم “1000 مبروك” بعد 40 سنة من الشغل فى المصالح الحكومية وصل فيها لمنصب وكيل اول وزارة الكهرباء ,السيناريست محمد دياب كانت بتربطه صداقة قوية بابن الفنان محمود الفيشاوى واقترح عليه دوره فى فيلم “1000 مبروك” ووافق فورا وابدع فى الدور الاول ليه ,وشارك فى حملة اعلانية مع “احمد مكى” واللى برضه حققت نجاح كبير فى رمضان , الفنان محمود الفيشاوى كان بيستعد لتقديم بطولة فيلم جديد ,الا ان توفى قبل ما يبدأ تصوير الفيلم فى 2010 ,واتحرمنا اننا نشوف الموهبة دى فى ادوار تانية.

2- ليلى عز العرب 

2014_11_6_12_10_24_686

حصلت على الدكتوراة فى الاقتصاد واشتغلت لسنوات طويلة فى البنوك ومسكت مناصب كبيرة , ليلى مثال حقيقى لمعنى ال”career shift” وازاى توصل لنجاح كبير فى مجال وتقرر تسيبه وتعمل حاجة تانية انت بتحبها وتنجح فيها, من اشهر اعمالها فيلم (1000 مبروك ) ودور الام فى مسلسل الكبير , ليلى اكدت فى احد البرامج انها مصرية اصيلة من اب وام مصريين وده لان كتير بيفتكروها مش مصرية بسبب لكنتها ,لكنها فسرت ده بأنها كانت بتتعامل مع اجانب كتير فى شغلها القديم.

3- حسن حسنى 

حسن-حسنى

مواليد سنة 1931 ,على الرغم من الفنان حسن حسنى صاحب مسيرة طويلة الا انه مع بداية ظهور جيل جديد من الممثلين الشباب اللى احتلوا السينما وشباك الايرادات فى الالفية التانية كانت انطلاقة جديدة لحسن حسنى وصل بيها لقمة النجاح وتقريبا مكانش فيه فيلم بينزل الا ولازم يكون لحسن حسنى بصمة فيه بخفة دم وايفيهات مبتتنسيش ,وشارك نجوم كتير نجاحهم زى محمد سعد واحمد حلمى و كريم عبد العزيز وهنيدي وغيرهم ؛ حسن حسنى هيفضل مثال للنجم اللى بيعرف يجدد من نفسه على حسب المرحلة و مثال للفنانين اللى القطر عمره ما بيفوتهم.

 

4- حسن كامى 

218615_Large_20140411125637_11

مواليد 1936 ,حصل على ليسانس حقوق من جامعة القاهرة ودرس موسيقى واوبرا بمعهد الكونسرفتوار , بعدها اشتغل فى شركات سياحة وطيران ,بس فضل حبه للاوبرا مسيطر عليه وقام بدور البطولة فى اوبرا عايدة على مسارح الاوبرا فى الاتحاد السوفيتى و مسارح تانية فى ايطاليا وفرنسا والدنمارك ,اكتشفه الملحن محمد نوح علشان يمثل فى مسرحية( انقلاب ) وبدأ بعدها حسن كامى رحلته فى التمثيل, ويمكن طبيعة عمله فى الاوبرا وشكله الارستقراطى ساعده يلعب دايما دور رجل الاعمال او الباشا اللى بيتقنه جدا ,شارك الفنان حسن كامى فى كتير من الافلام زى (سمع هس) و (زكى شان) و(ليلة سقوط بغداد) ,وشارك الفنان عادل امام فى مسلسل (العراف)وغيره من المسلسلات.

 

5- لطفى لبيب

2783617624

مواليد 1947 ,حصل على ليسانس اداب وبعدها التحق بمعهد فنون مسرحية , بدأ مسيرته متأخر بسبب سفره خارج مصر الا انه بدأ اعماله بأدوار صغيره فى المسرح ,الا انه من بعد سنة 2000 ابتدت فترة النجاح وخصوصا بعد فيلم السفارة فى العمارة واللى بيعتبره “فاتحة خير عليه” وشارك عادل امام اعمال تانية بعد كده زى “زهايمر”و”بوبوس” ومسلسل “صاحب السعادة ,لطفى لبيب بيعتبر المنافس الاقوى لحسن حسنى , و برضه شارك ابطال شباب نجاحهم زى دور سواق الميكروباص الشهير فى “عسل اسود” اللى محدش ينساه .

6- بيومى فؤاد 

2015_3_12_12_5_17_744

مواليد 1965 خريج فنون جميلة وصاحب شخصية اشهر دكتور كوميدى فى تاريخ المسلسلات , بدأ العمل فى السينما بأدوار صغيرة فى (احكى يا شهرزاد)و(دكان شحاته) الا ان الانطلاقة كانت فى مسلسل (الكبير) واللى ابدع فيه بشخصية الدكتور ربيع اللى كانت من اكتر الحاجات الكوميدية فى المسلسل واللى استمرت لاربع اجزاء إلى اخر اعماله فيلم(اوشن 14) واللى حقق فيه نجاح كالعادة, بيومى ابدع بخفة دمه المعروفة وحاليا بيعيش انجح فتراته و اكيد مستنينه فى رمضان الجاى.

 

7- سيد رجب

368922_Large_20150708041544_57

مواليد 1950 ,بدأ مشواره الفنى فى المسرح بأدوار صغيره,سيد رجب من الفنانين المبدعين بمعنى الكلمة واللى تستمتع بكل ادواره ,شخصية الشرير اللى متكرهوش ويمكن تضحك على افيهاته كمان من الادوار اللى مش سهلة واللى بتتمثل قليل , علاقته بالسينما ابتدت مع فيلم (ابراهيم الابيض) وتألق بعد كده فى كتير من المسلسلات فى موسم رمضان ومنها دور” نجيب ” فى مسلسل “9 جامعة الدول” مع العبقرى خالد صالح . وغيرها من المسلسلات زى (طرف تالت) و(اسيا)و(بين السرايات)  وطبعا (موجة حارة) وظهوره الرائع في (ولاد رزق) .