بما أن مصر دولة كبيرة وفيها ثقافات مختلفة ولهجات مختلفة .. طبيعي هتلاقي شوية اختلافات مقبولة في طريقة الكلام وفي بعض الكلمات ومعانيها .. اختلافات متفق عليها ومقبولة زي معركة القاهروية مع الاسكندرانية في فتح الكلمات أو كسرها مثلاً.
لكن اللي مش مقبول بقى شوية الحاجات اللي هنقولها هنا .. مفيش لا شرع ولا دين يسمح بالمهزلة دي .. ولازم نضع حد للإعاقة اللغوية دي قبل ما تنتشر ومنعرفش نلم الموضوع
تعالوا نشوف

1- اللي بيقولوا “سمعت الفيلم” بدل “شوفت الفيلم”

3
علمونا في المدرسة أن الصور بتتشاف والأصوات بتتسمع .. فالطبيعي أني أقول “شفت الفيلم” أو “شفت المسلسل” .. اسمع بس ليه طالما ربنا كرمني وخلاني أشوف .. طب قولي ينفع تقول “سمعت الماتش” .. طب هتشجع مين يعني .. اللي صوته أعلى؟!

2- اللي بيقولوا “أنا و + الفعل”

1
من يوم ما وعينا على الدنيا وإحنا بنقول مثلاً ” وأنا رايح الكلية قابلت واحد صاحبي” .. مفيش حاجة اسمها “أنا و رايح الكلية قابلت واحد صاحبي” .. رايح ده مش بني آدم زيك.

3- اللي بيقولوا “أسمر” بدل “أسود”

11
دي مؤامرة ومخطط ضد الألوان .. مفيش حاجة اسمها تي شيرت أو بنطلون لونه أسمر .. يعني أصلاً بنطلون أسمر .. أبوه وأمه افارقة مثلاً .. هو لونه “أسود” ومتخافش مش هيزعل يعني لو قلت عليه “أسود”.

4- اللي بيقولوا “الساتت” بدل “السادس”

4
وفي الحقيقة الجريمة اللغوية دي منتشرة في الجيل القديم بس .. مستحيل تلاقي شاب بيقول “الساتت” بدل “السادس” .. ولو لقيت قولي عشان نخلص عليه.
كلمة “الساتت” دايماً مقترنة بكلمة “القاط” اللي هو “الدور” .. يعني “القاط الساتت” هو هو  “الدور السادس” في اللغة العربية اللي إحنا نعرفها

5- اللي بيقولوا “شيكل” بدل “شكل”

2
الله يرحمه الكابتن محمود بكر كان أحد أسباب نشر الفايرس ده .. إحنا اتولدنا وعشنا وهنموت واحنا بنقول “شكل” بفتح الشين .. بلاش “شيكل” دي وحشة أوي أرجوك.

6- اللي بيقولوا “دولي / دولم” بدل “دول”

14958820_10206947570583511_1718209635_n
بص هي كلمة “دول” أصلاً كلمة عجيبة وماصدقنا عرفناها كدة .. متجيش أنت بقى تجود وتقولي “دولي ودولم”.
في كمان اللي بيقولوا “دون” و “دهون” بدل “ده” .. دول بقى ميستاهلوش نجيب سيرتهم

7- اللي بيقولوا ” ع أو ح + الفعل” بدل ” هـ + الفعل”

14958404_10206947570223502_138208979_n
مينفعش حد يقول “عروح” أو “عمشي” أو “حنجيب” .. مفيش حد ينفع يتكلم كده غير اللمبي أساساً .. جرب تقول “هروح” أو “همشي” .. صدقني هتتبسط وهتبسطنا.
دي عينة من الجرائم اللي قدرنا نرصدها .. اللي عنده جرائم تانية يبعتلنا .. وتأكدوا إحنا مش هنسكت وهنحاول ننقذ اللغة العربية من الضياع
  • Nermeen Makram

    نسيتوا أهم واحدة
    وعينا على الدنيا بنقول، ماروحتش ماعملتش بغض النظر عن أن كله كلام عامي بس مش قبل الفعل دي بتنرفزني.
    مش رحت، مش عملت ،مش تتكلم كده تاني ارجوك لأني هتشل والله

    • Ahmed Zaki

      لا دي نوعية من البنات هي اللي بتتكلم كدة ودول بقى هنبقى نتكلم عليهم في مقال تاني 😀

      • Nermeen Makram

        لا مؤخراً الموضوع استفحل، والعار طالكوا 😊

  • islam mounir

    هربت منك ف الآخر ودخلت على اللهجات، يعني دولي و دلم و دولن دي لهجات في الصعيد و النوبة
    أومال لو سمعت التعبير عن الأبعاد (بدل هنا وهناك)وهما بيدرجوها حسب البعد:
    إهنيه – إهناك – إهناكه – إهناكاهيتي – أبيييي إهناكاهيتي
    دور عليها و حتعرف

    • Ahmed Zaki

      فعلاً أنت معاك حق .. في اختلافات كتير في اللهجات .. بس أنا اتكلمت على الحاجات المنتشرة أكتر

  • Mahmoud Abdelrazek Gomah

    اللي بيقولوا “أنا و + الفعل”، زي “أنا ورايح”… هي “رايح” فعل؟
    الحاء أو العين بدل الهاء + الفعل: دي لهجات، وال3 حروف من نفس المَخرَج، وكلهم أصلًا من اللغة المصرية القديمة.
    والساتت: الرقم أصلًا هو “ستة” مش “سدسة”، وفي القاموس المحيط: “ويقال: جاء فلانٌ سادِساً وسادِياً وساتًّا”، أهو “ساتًّا” الأخيرة دي اللي احنا فكّينا التشديد منها وبقت “ساتت”.

    • Ahmed Zaki

      الموضوع في الأول وفي الآخر كوميدي .. ولا أقصد بيه إهانة أي فئة