انا عارفة اننا كمصريين مبنحبش القراية، وأول ما بنخلص الجامعة، بنحتفل ببيع الكتب بالكيلو، أو توزيعهاعلي جمعية رسالة، بس القراية حلوة، القراية حلوة مفيش كلام، وأكيد أي حد بيقرا هيفهمني، ويعرف ان القراية هي غذاء العقل، جنب الكورة، والتدخين، والحاجات التانية …
باختصار القراية هي الشئ اللي ممكن يلهمك بأفكار جديدة، ويجدد شباب عقلك، ويوسع مداركك، بالاضافة لأنها أكيد طريقة أكيدة لفتح مواضيع مع أي بنت “نيرد” عاجباك، ومش عارف تدخلها منين، “ابقي اشكرني بعدين”..
وعشان نثبت ان القراية مش حاجة صعبة، وان كلنا لازم نقرا، حتي ولو حاجات بسيطة، جيت النهاردة بخمس كتب، أسلوبهم سهل وسلس، هتستفاد منهم كتير لو قريتهم، وصدقني، هيفرقو معاك جدا، خصوصا لو قريتهم قبل التلاتين..!

 

  1. الخيمائي “باولو كويلو”

maxresdefault

باولو كويلو، روائي برازيلي، ليه أعمال كتير، أشهرهم 11 دقيقة، بالقرب من نهر بيدرا، فيرونيكا تقرر أن تموت، وغيرهم، أسلوب باولو كويلو السلس، والسهل، والمعتمد أغلب الوقت علي أحداث تاريخية حقيقة، ف بيمزج الحقيقة بالخيال، شجع ناس كتير تقراله، وعمل شعبية كبيرة للأدب اللاتيني ف العالم العربي، ف خلاه جنب: ماركيز، وايزابيل اللندي وغيرهم.
ليه لازم تقرا “السيميائي”؟ السيميائي كتاب بياخدك جوة العالم بتاعه، بيمزج ما بين المغامرة، والخيال، وعلم النفس، والتأمل، وبيغير مفاهيم كتير جواك، في النهاية بيعلمك ان “الكنز في الرحلة”، وبيصدمك في نهايته، عشان كدة أشجعك تقراه..
  1. السر “روندا بايرن”

maxresdefault (1)

روندا بايرن كاتبة ومنتجة تليفزيون استرالية، كتاب صغير، بسيط، والفكرة في الكتاب ده مش محتواه وبس، الفكرة كمان في الرحلة الي ورا تسويق الكتاب ده، وازاي الكتاب ده خلا “روندا” من أشهر الكتاب حول العالم..
ليه لازم تقرا “السر”؟ لو محبط بسبب حياتك، أو مش لاقي هدف، أنصحك تقرا الكتاب ده، بيتكلم عن “قانون الجذب” أو بالعربي “تفائلو بالخير، تجدوه”، وازاي المبدأ ده ممكن يغير حياتك للأفضل لو انت مصدق انت بتعمل ايه، كمان الكتاب اتحول لفيلم، لو انت بتكسل تقرا ممكن تتفرج عليه وهيفرق معاك جدا.
  1. العادات السبع لأكثر الناس فاعلية “ستيفن كوفي”

download

ستيفن كوفي، متحدث تحفيزي أمريكي، وخبير اداري ومستشار، ولا مش زي ابراهيم الفقي، لأنه معاه ماسترز ادارة أعمال  من هارفارد، ووشهادة من جامعة سولت ليك سيتي، وغيرها من الشهادات، انا كنت من المحظوظين اللي شافو ستيفن كوفي لما جه مصر، في جامعة القاهرة، وبجد فرق معايا جدا.
ليه لازم تقرا “العادات السبعة”؟ لأنه كتاب بيخليك تركز علي القدرات الموجودة جواك، وتسيبك م السلبيات، والناس الي بتحبطك، وتكسر مجاديفك، كتاب رائع بمعني الكلمة، ويعتبر من أكتر الكتب اللي اتقرت علي مستوي العالم، ولو حابب تستزيد فيه كتاب مكمل ليه اسمه “العادة الثامنة” وده بيناقش تطور المشاكل اللي ف البيزنس علي مر الوقت، وبيساعدك أكتر في التركيز علي نفسك.
  1. من حرك قطعة الجبن؟ “سبنسر جونسون”

a2cfb4219__750x0

سبنسر جونسون، كاتب ومتحدث تحفيزي أمريكي، بيركز بشكل أساسي علي قصص بسيطة وراها مضمون كبير، لأنه عارف الانسان عامة بينفر من المبادئ المجردة والكلام الكبير، ف ماشي ف كل كتبه بمبدأ “أبسطهالك”، ولذلك بتعتبر كتبه قيمة رغم بساطة أسلوبها.
ليه لازم تقرا “من حرك قطعة الجبن”؟ ببساطة شديدة هو أكتر كتاب ممكن يقدر يطلعك م الكومفورت زون، بيعلمك تبطل تركن ف شغل مبتتعلمش منه، ف علاقة بتضرك مش بتنفعك، ببساطة بيقولك “لو مش عاجبك مكانك غيره، لأنك مش شجرة”، من الكتب اللي لازم تتقري، ولو انت مكسل تقراه، ممكن تجيب فيديو ليه من يوتيوب

 

  1. أب غني…أب فقير “روبرت كيوزاكي”

9781612680002

روبرت كيوزاكي، رجل أعمال وكاتب أمريكي، له عدد كبير من الكتب، وهو رجل أعمال ناجح جدا، أسلوبه سهل وبسيط، وللعلم انا حبيت الكتاب بالانجليزي أكتر منه بالعربي، ونصيحة ليك تقراه بالانجليزي هيفرق معاك أكتر.
ليه لازم تقرا “أب غني..أب فقير”؟ باختصار، الكتاب ده هدفه انه يحط ف دماغك فكرة انك مش لازم تعيش عمرك كله موظف، الكاتب في الكتاب ده بيحكي قصة حقيقية، عن ان أبوه دايما كان بيربيه علي مبدأ “ان فاتك الميري اتمرمغ ف ترابه” لكن مع ذلك لما كبر، قابل أبو واحد صاحبه، كان هو أبوه الروحي، وهو اللي زرع فيه حب المغامرة، وبيعتمد الكتاب مبدأ واحد كبير هو “خلي فلوسك تشتغل بدالك” وبيطرح عليك أكتر من فكرة هتخليك فعلا تكره شغلك الروتيني.
في النهاية القراية لناس كتير بتبان رخمة ومش مهمة بس لو مش مهمة او مش هتفيدك مكنتش الكتب دي وغيرها بتحقق ملايين ملايين المبيعات ؛ ياريت لو حد قرا الكتب دي يشاركنا رأيه