خلال الساعات اللي فاتت، تصدر إسم رامي صبري وويجز، التريند على مواقع التواصل الاجتماعي، بعد الأزمة اللي نشبت بينهم، بعد تصريحات رامي صبري بأنه مش بيقدر يفهم كلمات أغاني ويجز. في المقال ده، هنتكلم عن بداية الأزمة، ووصلت لفين.
بداية الأزمة
بدأت أزمة رامي صبري وويجز باستضافة الفنان رامي صبري في برنامج راديو أنرجي، واللي اتكلم فيه عن ويجز وقال: “مش بسمع مهرجانات خالص، أنا رجل متخصص في المزيكا، ودرست تأليف موسيقي وأذني لا تتحمل المهرجانات فهي تحمل دوشة في الكلام”.
وعن الراب، قال إن فيه في مصر راب لكن مفيش تراك، واللي بيعجبني هو ويجز، لكنه مش بيقول حاجة، ومش بيقول كلام. وأضاف: “ويجز بيعمل موسيقى ممكن أسمعها ومقلدها من بره، لكن مش بسمع مهرجانات”. وده اللي تسبب في إشعال فتيل الأزمة.
ويجز يرد
وردًا على تصريحات رامي صبري، علق ويجز، في ستوري على حسابه بإنستجرام، وقال: “هو الفنانين مينفعش يطلعوا فى البرامج يتكلموا عن نفسهم، لازم اسمى يتحط فى جملة.. ماتبص فى ورقتك”.
وقال في فيديو لايف، عبر حسابة على إنستجرام، إنه شخص بيتعرض لانتقادات كتير ومبيتعاملش مع ده بحساسية ومؤمن بحرية التعبير عن الرأي، وعن تصريحات رامي صبري، قال: “الكلام مزعلني لأنه طالع منك، والمفروض إنك شخص مختص”.
وأضاف: “محدش ياخد عني فكرة من أغنية واحدة ويدخل يسمع باقي الأغاني اللي قدمتها ويشوف ويفهم اللي أنا بعمله، أنت راجل مختص في حتة كبيرة اعمل بحث قبل أن تتحدث عني، يفرق معايا لأنك تعني لي شيء”.
وقال، إنه في النهاية هم شغالين في مجال الترفيه، ومش من المفترض أن أغانيهم تحمل رسايل، ولكن في بعض الأغاني بيقول فيها كلام مهم، وفي أغاني تانية بيقول فيها حاجات وبيصقف لنفسه إنه قدر يكتب الكلام ده من الأساس.
رامي صبري يوضح
وبعد ما عبر مغني الراب ويجز عن غضبه بسبب تصريحات رامي صبري في راديو إنرجي، كتب رامي صبري في ستوري على حسابه على إنستجرام: “يا ويجز يا حبيبى أنا قلت أنا بسمعك وبحب شغلك لكن مش بفهم الكلام وده ميقللش من شغلك بالعكس أنت شاطر جدًا ومجتهد وناس كتير بتحب شغلك وما تفهمش كلامى غلط”.
