اكيد كلنا شوفنا حملة الإعلانات على رجوع مطعم ومبي في مصر تاني. لو انت من مواليد التمانينات او اوئل التسعينات، اكيد جربته حتى لو مرة واحدة. ولو انت اتولدت بعد كدة، متأكدين بردوا إنك سمعت عنه من أهلك أو الأفلام. لو محصلش، اكيد في مرة عديت من شارع الهرم وسمعت جملة “نزلني عند ومبي لو سمحت” يا تري ايه قصة المكان ده وسبب شهرته..
#راجعين_علشانك
بالشعار ده، رجع واحد من أهم وأول مطاعم الأكل السريع وخاصة البرجر في مصر. ومبي هو سلسلة مطاعم بدأت سنة ١٩٣٤ في جنوب أفريقيا وفتح فروعه في أمريكا، بريطانيا، الكويت ومصر.
فتح في مصر سنة ١٩٧١، وحقق نجاح كبير جدًا وكان ليه فروع في المهندسين، الهرم، مصر الجديدة والزمالك. بس مع السنين بدأت سلاسل مطاعم عالمية كتير زي مكدونالدز وغيره تغطي عليه في القاهرة. والمنافسة كانت قوية وبدأت جودة الأكل كمان تقع بشكل كبير.
وفي سنة ١٩٩٨، قفل اخر فرع لومبي في مصر. بس دلوقتي في ٢٠٢١، اتفاجئنا برجوع المطعم الأيقوني ده تاني. قررنا نروح بنفسنا ونجرب المطعم اللي انتشر عنه أساطير كتير دة ونشارككوا رأينا فيه بصراحة…
ده شكل المكان من برا. الفرع الوحيد دلوقتي موجود في شارع البطل أحمد العزيز ما بين الدقى والمهندسين (في نفس شارع الفرع القديم) ماكنش باين انه زحمة اوي من برا بس لما وقفنا دقيقة بدأ المكان يتزحم على الباب بشكل كبير.
لما دخلنا جوا بصراحة اتخضينا من العدد اللي واقف مستني دوره عشان يطلب. كمان شكينا بنسبة كبيرة أننا مش هنلاقي طرابيزة ناكل عليها جوا بسبب الزحمة وسبب عدد الأماكن المحدودة. حوالي ١٠ بس تقريبًا. وقفنا تقريبًا من نص ساعة/ساعة إلا ربع عشان نطلب الاوردر بس.
بس لحسن الحظ، لما خلصنا كان فيه ترابيزة فاضية وقدرنا نقعد. وكان في كل أغاني التسعينات شغالة في الخلفية. والاجمل كمان ان الاوردر مكملش ١٠ دقايق وكان جاهز، وده اللي فاجئنا بصراحة! نيجي بقى للأكل والأسعار…
صدقونا دي مش مبالغة، بس تقريبًا ده من أحسن البرجرز اللي أكلناها في حياتنا. اللحمة طعمها غني وواضح جدًا وحجمها كبير. العيش طري جدًا والطماطم والمخلل في السندوتش فريش بشكل غريب والصوصات كتير بس مش مغرقة السندوتش ومش مغطية على طعم اللحمة خالص.
جربنا كمان البطاطس بالجبنة وكانت اكتر من رائعة بصراحة. في بقى مشروبات غازية عادية وفي ميلك شيك عالمي. واختراعات تانية كتير سمعنا عنها وحابين جدًا نجربها المرة الجاية!
الأسعار بقى معقولة جدًا. يعني مقارنة بالجودة بتاعت الأكل والخدمة في المكان، تقريبًا ده هيبقى اختيارنا الأول للبرجر من هنا ورايح. تقريبًا تتراوح من اول ٥٠-٩٠.
