Using smart phone
بمناسبة انتشار خاصية السكرين شوتس بين البنات ع السوشال ميديا، واللي هي ضد مبادئي بشكل قاطع، واللي باحسها بتتعمل م البنات عشان تعوض عقد النقص عندها ف شخصيتها، قررت بصفتي تم التحرش بيا إلكترونيا أكتر ما كحيت، اني أفنط كدة أنواع المتحرشين الإلكترونيين، بس من غير سكرين شوتس.

 

فيما يلي أبرز أنواع الذكور الإلكترونيين، اللي لا مؤاخذة “بيحكوها” مع البنات عامة، وإليكم التفاصيل J
  • منصور الوقح.

الشئ ده، وهو شئ لأنه لا يستحق في الأساس لقب شخص، بيكون أسوأ نوعية ممكنة تقابلها بنت علي الانترنت، بيبدأ كلامه مع أي بنت بحاجتين أسفل من بعض: صورة نيود، أبيض وأسود “علي اعتبار انها فن طبعا” أو الأنكي والأضل سبيلا “نيود” ليه هو شخصيا، ده عامة مش حله انه يتفضح، حله انك تاخد سكرين شوت ليه، بس تعمل بيها ريبورت، بلاش فضايح ع الملأ، الناس مش ناقصة قرف الكائن ده.
  • عبده العبيط

ده واحد مش عارف يكون صايع، وفشل انه يرتبط بأي بنت، قاعد عاطل بقي، معهوش فلوس، بياخد مصروفه من الحاج، المهم انه بيعمل نفسه عبيط، بيرمي الصنارة  في كل اتجاه ممكن، ف المكان اللي هتطلع منه بسمكة كان بها، والمكان اللي هتطلع منه بجزمة مش مهم، هو متعود ع الضرب.
عبده العبيط بيمتاز انه بيصبح عليكي ليل نهار، رايح جاي، كأنك بواب عمارته، بيفضل يهري، والناحية اللي بيمسك عليكي منها تجاوب بيشتغل عليها، مش زنان، وبيمتاز بأنه بيرمي تلميحات قليلة الأدب من تحت لتحت، ولو صديتيه يقولك كلمته المشهورة “مكنتش أقصد كدة”.
  • حوار صريح جدا

المخلوق رقم 2 الغير مرغوب فيه، هو عارفه هو عاوز ايه، عاوز يصاحب، مش يرتبط حتي، عاوز يصاحب بس،بيدخلك دخلة مباشرة، وبيكون حريف تليفونات، ومعاه خطوط ودقايق كتير وهو عارف بيستخدمها ازاي بالظبط، عامة بيكون شخص انطوائي في الحقيقة ومحدش عارف عنه حاجة، وبيحكيلك قصة مؤثرة عشان يصعب عليكي، في حين انه عارف كويس ومحدد هدفه.
  • عب راشق

برج المراقبة اللي ربنا بعتهولك ع السوشال ميديا، لوانتي علي تويتر هتلاقيه بيرد علي كل تويتة، ف النهاية بتطهقي منه وتعمليله بلوك، وساعات لو مردش بابليك ياخد سكرين شوت ويبعتهالك ع الDM أو الانبوكس، حد فعلا فاضي، فاكر انه كدة روش وجميل وكدة، بس هو بيكون فعلا مزعج وأحيانا Disturbing  جدا، وملوش غير البلوك يريحك من صداعه عزيزتي حواء.
  • الطفل

“شوفي البوست اللي انا كتبته – انا جعان – انا عطشان – انا بردان – بتعرفي تطبخي – لازم تدوقيني أكلك – انا جعان”
“مردتيش ليه علي البوست بتاعي – انا شيرتلك الأغنية دي مخصوص –ايه ده بتحبي حماقي؟لا احنا بينا حاجات كتير مشتركة” وهكذا….
  • اللذيذ

اللذيذ ده بيجمع ما بين أسوأ صفات “عب راشق” و “حمدي الوزير” بيقول قلشات تصيب بالشلل الرباعي والخماسي، بيزن بقلشاته دي، زائد انه بيرمي افيه سافل من حين لاخر كنوع من أنواع التيست كدة، لو نجحت هيدخلك بقي بالتقيلة ويبدأ في علاقة صحوبية.
نهاية أحب أقول لكل الشباب اللي بتستوك أو بتتحرش إلكترونيا، بلاش، لازم تحس ان فيه قبول من البنت عشان تدوس، غير كدة انتا بتستلذ، وهي بتشتمك وبتتسلي عليك مع صحابها، فبلاش أحسن…!