جوزي
ازيك عامل ايه؟ اخبار الشغل و كده ايه؟ احنا آه لسه متقابلناش و ممكن منتقابلش اصلا بس انا حبيت يعني اكتبلك حاجات نتفق فيه على شوية اساسيات كده

 

  • مش هقدر اقول لمامتك يا ماما

19frxotugp5sdjpg

اصل بص انا ماما حملت فيا و خلفتني و غيرتلي و استحملت قرفي سنين فهيبقى ظلم اوي ليها اني اخد منها اللقب اديه لمامتك. مامتك على عيني وراسي لو طيبة هحبها واشيلها فوق دماغي ولو خبيثة هستحملها برضه بس موعدكش اني هقدر اكون صاحبتها برضه.

 

  • بلاش فرح و النبي

Collection24846_13122big

ليه نعمل فرح نصرف فيه كل الفلوس اللي حوشناها ، عشان نتصور فيديو نصه صورة ثابته لينا و انت بتبوسني على دماغي والناس يقعدوا يتريقوا علينا ! لما ممكن نسافر بقى ونتفسح و نشم هوا نضيف في اول ايامنا سوا.

 

  • مش هنكد عليك لما تخرج مع أصحابك

102014481152

ده وعد مش هخلفه ولا هخنق عليك اقولك انا زهقانه وانت على طول بره، بس في المقابل انا انسانة اجتماعية وليا اصحاب برضه احب اشوفهم يعني وكده.

 

  • مش لازم كل جمعه نروح لأمهاتنا

19c6cced3accad832054b18e6e4a9ae2_123515917_147

اصل ليه في الويك اند ما عندنا يوم التلات يوم جميل في نص الأسبوع، الجمعة ده اتعمل للأنتخة والفرجة على الأفلام او اننا نخترع اختراع في المطبخ ويبوظ ونطلب ديليفري.

 

  • مش هقارنك بظافر العابدين ولا اياد نصار

15
أياد نصار
انا عارفة كويس اني مش دره يعني ولا جنيفر انستون وعارفة ان اصلا ظافر العابدين وإياد نصار مش كده في الحقيقة بس تعالى نوعد بعض اننا لو كرشنا بقى وبقلظنا ننزل جيم او نلعب insanity  في البيت او يا سيدي اضعف الإيمان نروح نتمشي في مركز التنمية.

 

  • هتعلم Play Station

177

مش عشان اقعدك جمبي ومتنزلش والجو ده لأ، اصل عيب اوي اما ابقى شحطة كده ومش بعرف العب يعني وبعدين ممكن نلعب على غسيل المواعين *ضحكات شريرة*

 

  • مش هفضل اكتب رمضان احلى مع جوزي، العيد تحفة مع حبيبي، مش هقدر

340957067

اصل بص هقولك حاجة احنا اصلا بطلنا يجلنا الExcitement  بتاعة العيد ورمضان من ساعة ما بطلنا نبيت لبس العيد جنبنا على السرير، هو طبعا انا مبسوطة اننا مع بعض بس خليها بيننا وبين بعض

 

  • تعالى معانا الGraduation او حفلات المدرسة بتاعة العيال معلش يعني

files

اصل هقولك حاجه احنا بعد مانطلع معاش ذكرياتنا مع ولادنا هي اللي بقيالنا الميتينج والإيميل اللي هيتأجلوا هننساهم اخر الاسبوع

 

  • هسيبك تتفرج على الماتش

ibcbet

انا اصلا مليش في المسلسلات التركي، والمفاجأة الأكبر اني مش بحب التلفزيون اصلا، اما ببقى عايزه اتفرج على حاجة بشوفها على الانترنت، فظبطني في الانترنت اظبطك في BeIN Sports الحاجات دي كلها ممكن تحصل وممكن متحصلش، دي حاجات كتبتها ومش عارفة اصلا هفتكرها ولا لأ لو اتجوزت بس الأكيد اني هحاول حياتي تكون مختلفة ومش روتينية وفيها حب كتير و تعقيدات أقل.