مايلي سايرس, كتير مننا ميعرفهاش كويس كلنا عرفناها بهانا مونتانا المثل الأعلي للمراهقين في العالم كلة لمايلي سايرس العشوائية المنحطة!
مايلي كانت بنت عادية إتولدت زي الكتير مننا بإختلاف المجتمعات والثقافات طبعاً, كان ممكن تبقي زي سنية ونظيرة ونفيسة بنات عبد الغفور البرعي لكن مايلي كان عندها حلم بغض النظر عن الحلم دة كان إيه ولا كان غلط ولا صح إلا إنها وصلتله فعلاً وحققته.

بنات عبد الغفور البرعي

مايلي سايرس كسرت كل القيود حبت إنها تبقي مختلفة ومتبقاش زي حد، مشيت عكس التيار مع ان مجتمعها بيحترم الحريات لكنه إنتقدها في تحولها الجذري من هانا مونتانا الطفلة البريئة لمايلي سايرس البوب ستار الجريئة بزيادة في تصرفاتها المجنونة العشوائية! انا أقصد يعني ان مفيش حاجة وقفتها ولا الإنتقادات أثرت عليها ده بالعكس الإنتقادات القاسية دي عملت منها إنسانه قوية. هي بمنتهي البساطة كانت مقتنعه بإللي بتعمله بغض النظر عن اللي بتعمله صح أو غلط.
إحنا كدة .. البنات كدة يوم ما تقرر تغير حياتنا بنغيرها ممكن تتغير للأسوأ .. أه بتحصل بس بنواجه عقوبات تصرفاتنا مش بنستسلم ! كل واحدة فينا عندها جانب مغامر وجرئ مبيهموش حاجة ولا حد! خلي جزء مايلي سايرس اللي جواكي يتغلب علي جزء بنات عبد الغفور البرعي .. عيشي، سافري، إنطلقي، إشتغلي، حبي وإتحبي، فركشي ملكيش دعوة بحد إحنا مش بنعيش مرتين إعملي الحاجة اللي بتحبيها متخليش حد يجبرك علي حاجة بحجة العادات والتقاليد والظروف!
سيبك من الناس وكلامهم إكتشفي الدنيا، إكسري الروتين وإشتغلي, حافظي علي شكل جسمك ورشاقتك ونضارة بشرتك وإلعبي رياضة, حطي ميك أب زي مانتي عايزة أو متحوطيش مايهمكيش حد إنتي حلوة في كل حالاتك، إلبسي ملوّن وإشتغلي خليكي إنسانة مستقلة! أي حاجة هتختريها – أي ان كانت – خلي هدفك الأساسي تكوني مبسوطة – حتى لو حاجة هايفة وبسيط ة- ضحكتك بالدنيا.
من الأخر إنتي اللي بتحددي حياتك ومستقبلك لنفسك متخليش حد يتحكم فيكي إنتي سيدة قرارك .. كون إنك أنثي دي لوحدها معجزة إلهية لازم تكوني فخورة بيها. وخليكي شجاعة زي مايلي.