الإيستر

طبعاً كلنا بنبقى مسحولين قبل ما ناخد أي أجازة لدرجة اننا مش بنبقى فاهمين احنا واخدين أجازة ليه. بالذات بقى في وقت شم النسيم!

كله بيخش في بعضه، من أول عيد تحرير سيناء لكل مناسبة ثانية في الإسبوع ده؛ عشان كده احنا قلنا نعمل حاجة للناس الي مش مركزة ومتلخبطة تفهم هما ليه واخدين أجازة، وايه الفرق بين الإيستر وشم النسيم اللي بييجوا ورا بعض.

اولاً: الإيستر ده الإسم الأجنبي لعيد القيامة المجيد الي بردو معروف بعيد الفصح، وده بيوافق كل أول أحد بعد بداية فصل الربيع.

الإيستر

اللي المرة ديه هييجي يوم الأحد، ٢٨ أبريل.

المسيحيين بيحتفلوا بيه بطرق عديدة، زي زيارة القرايب و تزيين البيت بالوان الربيع والزرع الأخضر والأصفر. ده طبعاً غير عادة تلوين البيض.

الاحتفالات بتاعت الإيستر أو عيد الفصح بتبدأ من قبلها باسبوع بأحد السعف، وده يسمى أسبوع الآلام لذكرى آلام المسيح وصلبه لثلاث أيام و قيامه بعدها.

وده بيبقى فيه قبله صيام ٥٥ يوم يسمى بالصوم الكبير، ويوم سبت النور، اللي هو ليلة عيد القيامة ده اللي بيوشك فيه الصيام على الانتهاء وبيتم التناول في الكنائس مع الصلوات وقداس نص الليل، تمهيداً لعيد القيامة نفسه.
الجدير بالذكر أن أسبوع الآلام بدء السنة ديه يوم ٢١ أبريل، وعاداتاً الاسبوع ده بيبقى فيه صلوات كتير.

أما بقى شم النسيم والي بردو معروف بعيد الربيع، ده حاجة مختلفة شوية:

الإيستر

شم نسيم ده عيد متعلق بالمصريين، يعني عيد وطني مالوش علاقة بالديانة لأنه كان عادة عند الفراعنة وقدماء المصريين إنهم يعملوا مهرجان اسمه “مهرجان الربيع” بيقدموا فيه سمك مملح وبصل أخضر وخس.

الإيستر

ومن هنا إرتبط أكل الفسيخ والرنجة بشم النسيم اللي طبعاً بييجي في الربيع. شم النسيم دايماً بيوافق يوم الإثنين اللي بعد عيد القيامة مباشرة، وبكده هنستناه السنة ديه يوم ٢٩ أبريل!

عشان كده بقى الإيستر أو عيد الفصح/القيامة ارتبط بشم النسيم، ومن مظاهر إحتفالات الناس بيه هي تلوين البيض برده وما يسمى بـ التنزه في الحدائق. وده السبب اللي بيخليه حديقة الأزهر مثلاً وحاجات تانية فيها جناين زحمة جداً اليوم ده.

وطبعاً أشهر أغاني شم النسيم هي أغنية الدنيا ربيع والجو بديع بتاعة سعاد حسني من فيلم أميرة حبي أنا،و ديه علامة مميزة جداً. 

الإيستر

حابين برده نفكركم أن فيه في نص الاجازة ديه حاجة تالتة خالص ومهمة مش عايزين ننساها، وهي عيد تحرير سيناء اللي بيوافق يوم ٢٥ أبريل من كل سنة!

(وده اللي بنتفرج فيه على رأفت الهجان ساعات)

وبكده نعتقد ان الي كان بيتلخبط خلاص فهم وعارف دلوقتي يفرق بين كله؛ في كل الأحوال، كل سنة وانتوا طيبين ويارب تقضوا أجازة سعيدة، اياً كانت المناسبة!