تفاعل الجمهور مع حكاية “حلم حياتي” من مسلسل “إلا أنا”، واللي بتأدي فيها مايان السيد دور بنت إسمها “خديجة” بتعاني من التوحد، وبتحلم إنها تكون ممثلة زي شادية، ولكنها بتواجه صعوبات في تحقيق حلمها. في المقال ده، هنتكلم عن دور مايان السيد في حلم حياتي، وهنتكلم بشكل أكبر عن مرض التوحد، وازاي ممكن نتعامل مع مريض عنده توحد.
مايان السيد والتوحد
في البداية، عايزين نقول، إن قصة “حلم حياتي” نالت إعجاب الكتير من الجماهير، وده لأنها بتتناول قضية، بيعاني منها كتير من الأهالي. وكمان أداء “مايان السيد”، عجب ناس كتير، لأنها قدرت تعبر عن مرضى التوحد، بشكل كويس، ده غير اختيار الملابس اللي كان أكتر من رائع.
المسلسل بيتناول قضية أرهقت كتير من الأسر المصرية، وهو مرض التوحد، واللي بيصاب بيه كتير من الأطفال، واللي بيخليهم مش قادرين ينخرطوا داخل المجتمع بسهولة. واحنا بنشوف ده، من خلال أسرة خديجة، البنت المصابة بالتوحد، اللي بتورينا ازاي نقدر نتعامل مع مرضى التوحد وأزاي ممكن ندعمهم.
تواجه خديجة مشاكل كتير في تعاملاتها مع المجتمع، إلا أن أسرتها بتحاول جاهدة احتوائها، وبتحاول تلاقي حلول حقيقة للعقبات اللي بتواجهها. وتعتبر قصة “حلم حياتي”مستوحاة من عائلات مرت بالتجربة دي، وده اللي خلاها توصل لقلب المشاهد بسرعة.
ايه هو التوحد؟
لو حبينا نعرف التوحد، تعريف بسيط، هنقول إنه مرض مرتبط بنمو الدماغ، واللي بيؤثر على قدرة الشخص على تمييز الآخرين والتعامل معهم على المستوى الاجتماعي، وده اللي بيسبب لهم مشاكل في التفاعل والتواصل الاجتماعي.
يبدأ التوحد في مرحلة الطفولة المبكرة، ويتسبب في مشكلات في الأداء الاجتماعي، سواء في المدرسة أو الشغل. غالبًا بتظهر أعراض التوحد على الأطفال، في السنة الأولى. على الجانب الآخر، بتظهر أعراض التوحد على بعض الأطفال، في الفترة بين الشهر الـ 18 والـ 24.
والحقيقة، عايزين نقول، إن على الرغم إن مفيش علاج لاضطراب طيف التوحد، إلا أن العلاج المكثف المبكر، ممكن يساعد في إحداث فارق كبير في حياة الأطفال المصابين بالتوحد. وللأسف، كتير من الناس مبتكونش عندها المعرفة في التعامل مع الأطفال المصابين بالتوحد، عشان كده، هنتكلم في النقطة الجاية عن ده.
ازاي تتعامل مع حد عنده توحد؟
1- ركز على الإيجابيات: غالبًا الأطفال المصابون بالتوحد، بيتأثروا بشكل إيجابي لأي (إطراء)، وده معناه إنك لو قابلت حد عنده توحد محتاج تمدح في السلوكيات الإيجابية اللي عنده، وخليك محدد في كلامك، زي أنا عجبني إنك عملت كذا في الموقف ده.
2- خليك منضبط في مواعيدك: يحب المصابون بالتوحد، فكرة الروتين، عشان كده محتاج تتأكد، لما تتعامل مع مريض توحد، إنك تركز على مواعيدك.
3- استخدم أساليب بسيطة في التواصل: ببساطة، لو عايز تقول فكرة معينة لطفل مصاب التوحد، فانت محتاج تستخدم أساليب مبسطة، زي استخدام الصور أو الإيماءات، عشان تتأكد إذا كان فهم قصدك ولا لأ، ولازم تكون اللغة المستخدمة واضحة.
4- ركز على أحاسيسه: في كتير من الأطفال اللي بيعانوا من التوحد، بيكون عندهم حساسية كبيرة ضد الضوء، والصوت، واللمس، والشم. على الجانب التاني، في بعضهم بيكون غير حساس لأي منبه حسي سواء ضوء أو صوت أو غيره. شوف ايه اللي بيأثر عليه بشكل سلبي، ومتعملوش.
في النهاية، عايزين نقول، إن الفن اللي بيقدر يعبر عن القضايا، اللي بيعاني منها الناس، أو الفن الهادف بشكل عام، بيقدر يلمس الناس بجد، لأنه بيعبر عن حاجات هم بيعانوا منها، عشان كده، احنا بنعتبر حكاية “حلم حياتي”، واحدة من أفضل الحكايات في مسلسل “إلا أنا”، لأنها قدرت تعبر عن معاناة الأشخاص اللي عندهم توحد.
