الواحد مش سهل يتولد ويكون الأخ الكبير في عيلة، شخصياتنا عامة بتتشكل حسب التربية، وحسب ترتيب السن في الأسرة، الأم اهتمامها بيتوزع غصبن عنها للطفل الكبير، اللي بيكون حقل تجارب للتربية، الدلع كله، وهكذا، بصفتي البنت الكبيرة علي أخ وأخت أصغر مني أقدر أكلمكم باستفاضة شديدة عن الموضوع ده، وأقدر أحكيلكم عن عيوب ومميزات المنصب الفشيخ، اللي محدش راحله، القدر هو اللي لعب لعبته في كل حاجة، وهو اللي لبسك ف الموضوع ده لنهاية عمرك..!
عاوزين نستعرض في اختصار غير مخل بالسياق اهم مميزات وعيوب انك تكون أخ/أخت كبيرة، ويلا مع بعض نشوف

أولا المميزات

 

  • أول قطفة

1

بما انك الطفل الأول هتاخد أول قطفة من كل حاجة، اللبس البراندز، المدارس اللغات، اللعب الغالية، الأكل المستورد، المستشفيات النضيفة، كل حاجة كويسة هتاخدها بقي، منتا اللي ع الحجر والطفل الوحيد، ف قابل يا معلم حاجات كتير حلوة بقي، وعيش..

 

  • دلع عيني دلع

2

بما انك بتكون الطفل الأول، بتاخد كمية دلع محدش شافها قبلك، من جدك، جدتك، سواء لباباك أو لمامتك، من جيرانك، منتا الطفل الأولاني بقي، وعيديات، وهدايا، ولعب دهب، وبدلة ظابط، وبلاي ستيشن، والذي منه، كله بيدلع ف المحظوظ اللي هو حضرتك.

 

  • نصيب الأسد

3

لو ربنا كرم مامتك وباباك بولاد تاني، أوعدك ان نصيبك مش هيتلمس، انتا هتفضل علي وضعك متقلقش، الصدر في الفرخة هيفضل بتاعك، الفلوس هتفضل زي ماهي، محدش هيقرب من نصيبك متقلقش، اسألني انا

 

  • السلطة التالتة..!

4

من مزايا انك تكون الأخ الكبير زي حالاتي هي السيطرة،ففي حالات غياب الأب والأم انتا اللي بتكون مصدر الفلوس، وانتا اللي بتوزع الأدوار، وبتقود مسيرة التنضيف “لو بنت” وبتقول مين يعمل ايه، وبتزعق “لو الموضوع احتاج” وهكذا، السيطرة مش سهلة بس مستاهلة وصدقني هتنبسط وانتا قاعد وكله متسيطر عليه

 

ثانيا العيوب بقي

 

  • مسئوليات..مسئوليات ايفري وير

5

طبعا بما انك رقم 3 ف البيت بعد الحاج والحاجة، ف انتا ملزم تساعدهم في شغل البيت، مصاريف البيت، تنضيف البيت، جواز اخواتك الصغيرين، دفع فواتير النور والمية والغاز، وكل ما يلزم، اومال انتا كبير ع الفاضي ولا ايه. صعب جدا تتهرب من مسئولياتك دي، وياسلام لو ربنا كرمك وبقيت في شغلانة كويسة، فأنت ملزم تشغل اخواتك، واجواز اخواتك، وجيران اجواز اخواتك، ولو معرفتش هتتصب عليك اللعنات صبا من أمك وأبوك

 

  • قدوة

6

طبعا بما انك الكبير ف اخواتك ف كل حاجة بتقوم بيها هي قدوة، بتنعكس بشكل أو بآخر علي اخواتك الأصغر، ف لو حد فيهم شتم عشان انتا اللي شتمت “مش عشان هو سافل مثلا”، حد شرب سجاير يبقي عشان انتا اللي شربت، وهكذا،فأي مصيبة حد عملها من اخواتك، أبوك وأمك هيورطوك فيها بشكل تلقائي، فاتعود وارمي ورا ضهرك، ومتركزش أحسن.

 

  • أمل العيلة

7

متفهمش ليه العيلة كلها بتحط عليك، بتحط عليك أملها، ف لازم انتا تطلع دكتور، أو مهندس، أو نقيب شرطة، أو رائد جيش، المهم تطلع حاجة مهمة العيلة كلها تتفشخر بيها، مع ان أكتر واحد ف عيلتك أصلا معاه دبلوم صنايع مزور، بس تقول ايه، بيفضلو يضغطو عليك، ويلعبو في اختياراتك، ويتحكمو فيك، ثم يستغربو “العيال طالعة مقعدة من ايه؟” فعلا؟

 

  • ديليفري العيلة 

8

بما ان حضرتك أكبر الأعضاء سنا، ف حضرتك وانتا راجع م الشغل بتبقي مطالب تجيب عيش، ولبن، وفول، وأي حاجة تخطر علي بال الست الوالدة وهي قاعدة بتتفرج ع المسلسل الهندي، مع ان عندها شحط تاني مرمي بيلعب بلاي ستيشن ف أوضته، إلا انها مش بتفكر غير ف الغلبان الي راجع م الشغل زاحف مش شايف قدامه. أي مشاوير حكومية، أي حاجات تقيلة بتتشال، وطبعا بما انك الكبير ف هتقوم بأعمال صيانة الكهربا، تركيب الأنابيب وبعض أعمال السباكة، منتا الكبير بقي..!

 

الخلاصة، ياريت حد يفهم أهالينا اننا ملناش أي ذنب اننا اتولدنا الكبار، وان ده موضوع قدري بحت، وياريت ترحمونا شوية .