رمضان

لما رمضان بيجي كلنا بنتحمس وتاخدنا حموة المود الرمضاني ونقعد نقرر قرارات ونتفق اتفاقات ولا كأنها new years resolution. وبردو كل رمضان بنلتزم بالقرارات دي أول كام يوم وبعد كدة ولا كأننا قررنا حاجة وبنصوم بالعافية أساسًا.

ناس كتير بتفتكر أن لوحدها اللي بتعمل كدة، بس احنا جايين انهاردة نعرفكم أن انتوا مش لوحدكوا، كلنا كدة وكلنا بنشحر بردو ومنلتزمش بقراراتنا بس لازم نطلع الطلعة بتاعة أول الشهر دي وإلا ميبقاش رمضان!

“احنا ننزل نفطر مع بعض في يوم”

بمعنى أصح إسطوانة كل سنة بتاعتك انت وصحابك.

كل سنة نعمل جروب واتس آب ونقول “يلا نفطر سوا” ونقعد الشهر كله بنحاول نطلع بيوم نتفق عليه كلنا عشان نتقابل نفطر مع بعض ونقعد نتفق على مطعم وندور على حجز ومنلاقيش حجز فنرجع ندور على يوم تاني او مطعم تاني لحد ما العيد يدخل ويخلص واحنا ولا بننزل ولا بنفطر سوا ولا بنشوف وش بعض أساسًا.

“السنة دي هتسحر كل يوم في خيمة شكل”

رمضان طبعًا مليان خيم و إختيارات السحور كلهم أحلى من بعض، بس خلينا واقعيين، اما يكون عندنا شغل الساعة 9 الصبح ومفرهدين طول النهار في الحر والصيام، هنجيب طاقة منين نروح نتسحر كل يوم في خيمة شكل ونسهر فيها لحد الفجر وبعدين نروح ننام؟ احنا بننام العشا ونصحى نشرب مياه على الفجر بالعافية أساسًا!

“احنا نستغل الصيام ونعمل دايت”

بما أننا في رمضان غصب عننا بنقعد اليوم كله من غير أكل، ناس كتير بتحاول تستغل الفرصة دي أنها تظبط نظام أكلها عشان تعمل دايت وتخس بقى وتبقى healthy و fit وكدة، أو ده اللي هما بينووا عليه يعني. بس بعد ما بينووا بيفطروا مكرونة بالبشاميل وجلاش ومحشي ويحلوا بقمر الدين وكنافة وقطايف. بس الحقيقة بيتسحروا بزبادي عشان منظلمهمش بردو.

“رمضان ده هقضي وقت أكتر مع أهلي وقرايبي”

معروف أن رمضان وقت لمة العيلة والزيارات. ففي أول أسبوع كلنا بنتلم ونفطر سوا وننبسط فنتفق احنا رمضان ده هنقضي وقت أكتر مع بعض كصلة رحم وكدة. وطبعًا بيدخل الشهر وحماس أوله بيخلص وبنتعب من الصيام والشغل ونقعد في بيوتنا ونبطل زيارات وعزومات عشان احنا بنيجي على نص الشهر ونشحر أساسًا.

“من أول رمضان هبطل السجاير وأكون إنسان جديد”

بما أننا بردو بنبقى صايمين فمبندخنش طول النهار. بالتالي الناس اللي عايزة تبطل التدخين بتيجي في أول الشهر وتقول أنا هستغل الفرصة دي وأبطل تدخين بقى. بس اللي مبيعملوش حسابهم عليه أن الحرمان من الأكل والشرب مع المجهود اللي بيبذل بالنهار في رمضان بيزود الرغبة في التدخين فأول ما الآذان يأذن، أول حاجة المدخن بيجري عليها حتى قبل الميا هي السجارة أو الشيشة أو أي كان نوع التدخين اللي بيدخنوا. وطبعًا بما أن وجبات الفطار في رمضان بتكون محترمة كدة ومالية مركزها، بعد الفطار لازم نحبس بسجارة، فبيخلص الشهر بأن أننا بندخن أكتر من العادي أساسًا بدل ما بنبطل. بس بردو ده مش معناه نبطل محاولة، يمكن إرادتك أنت أقوى وتعرف تبطل.

” السنة دي هصلي كل الصلوات في الجامع”

هي طبعًا نية حلوة وكتير بيقدروا ينفذوها، بس ناس أكتر بتقرر القرارات دي في حموة اللي في أول الشهر ولما الموضوع يصعب وميعملوش كدة بيزعلوا ويتضايقوا من نفسهم وغالبًا يبطلوا يعملوا أي حاجة. الصلاة كل يوم في الجامع طبعًا حاجة حلوة وكلنا لازم نحاول نعملها كتير مش بس في رمضان، بس لو لأي سبب من الأسباب فشلت، متقساش على نفسك وحاول أنك تخلي أهدافك مقننة وسهلة عشان تقدر تحافظ عليهم.

دول جزء من القرارات اللي كلنا بتاخدنا الحماسة في أول رمضان ونقررها. ومهما رجعنا فيها بنيجي كل سنة وناخد قرارات غيرها. بس الحقيقة الحماس ده جزء لا يتجزأ من روح رمضان وموده، ولو بطلنا ناخد القرارات اللي مبتتنفذش دي رمضان هيتغير ومش هيبقى لو نفس الطعم اللي احنا متعودين عليه. والله أعلم يمكن في يوم ننفذ واحد منهم ولا حاجة!