في الفترة الأخيرة حاجات كتيرة في المجتمع المصري اتغيرت، نظرة الناس وتقبلهم لأنشطة أو عادات تبان غريبة على المجتمع بقت ملفتة جدًا!
الناس بقى عندها تقبل أكتر لأنواع مختلفة من الفنون زي الرقص على سبيل المثال، بس الرقص تحديدًا كان أشبه بتابوه، وبالذات للبنات، دلوقتى أماكن كتير فتحت فى القاهرة لتعليم الرقص و بقى معظم مرتاديها من البنات.

و علشان الأماكن دي رغم إنتشارها لكن مش بيتسوقلها كويس، فإحنا جمعنالكوا أحسن أماكن في القاهرة لتعليم الرقص بأنواعه المختلفة، هيب هوب، رقص معاصر، باليه ،تانجو وانواع تانية كتير!

Cairo Contemporary Dance Center

مركز القاهرة للرقص المعاصر من أشهر الأماكن المتخصصة في تعليم معظم أنواع الرقص، المكان دايمًا بيتطور بشكل مستمر و بيدرب فيه أفضل الراقصين المحترفين ودة اللي بيخلي المكان دايمًا أول إختيار حتى لممثلين أو فنانين معروفين عايزين يطوروا من أدائهم الحركي!
وبالنسبة لأسعار الورشة فهي معقولة جدًا بالمقارنة مع معظم الأماكن التانية.   

Vogue Center

المكان ده يعتير تانى أشهر مكان لتعليم الرقص فى القاهرة، لو أنت ساكن قريب من مصر الجديدة أو مدينة نصر، حاول تجربه، المكان إحترافى جدًا و معروف عنه حسن التعامل مع الناس والمتابعة المستمرة، الأسعار ممكن تكون غالية شوية مقارنة بأماكن تانية. 

Samia Allouba Gym & Dance Center

المميز في المكان ده، غير انك ضامن مستوى عالى ممكن ماتلاقيهوش فى اماكن كتير بسبب إرتباطه بأسم سامية علوبة، إنه ليه كذا فرع، لو أنت من سكان المعادى أو الشيخ زايد، ده أكتر مكان ننصحك بيه، في كورسات رقص شرقى، تانجو، سالسا وزومبا!
المكان أسعاره مش رخيصة بس شايفين الكواليتى تستاهل.

Latin Love Dance Center

لو أنت من هواة الرقص اللاتيني، فالمكان دة هيبقى زي الكنز بالنسبالك!
المكان مريح جدًا وبتحس إنك مش غريب فيه من أول مرة تروحه، كمان لو أنت شخص بتحاول تكتشف شغفك في الرقص، هتلاقى تشجيع كبير وفرص كتيرة إنك تقدم عروض عالمسرح!

Belly Dance Center

  لو عايزة تتعلمي رقص شرقي على أيد محترفين يبقى المكان دة لازم يكون على قايمة أولوياتك!
لإن المكان دة من الأماكن القليلة اللي بتتعامل مع الرقص الشرقي بإعتباره فن حقيقي وليه أساليب ومهارات معينة، وعلشان كدة هي أول مدرسة متخصصة في تعليم الرقص الشرقي في مصر.
المكان بيدرب فيه راقصات معروفين.

لو جربتي أماكن تانية شاركيها معانا، و لو بتفكري تاخدي الخطوة ومش عارفة تبدأي منين دى فرصتك!