أخ ولا فخ

الاخوات نعمة، لو كنت الأخ الكبير وقعدت فترة لوحدك اكيد فاكر فقرة يا رب انا نفسي في أخ واكيد فاكر فرحتك اول لما مامتك ولدت اخوك وادوك هدية وقالولك دي من اخوك عشان تحبه يعني، مكنتش عارف ان اخوك ده هيكسر لعبك وهيشاركك فى حب ابوك وامك، احنا منقدرش نعيش من غير اخواتنا لأن هُمَ أصدق صحابنا وزي ما كل حاجة انواع فالأخوات كمان انواع:

• المنشار

ده اللي بيخلص فلوسه وحلوياته كلها قبل اخواته ويروح بقى يطلب منهم يدوله تاني و لو رفضوا هياخد حاجتهم وهُمَ نايمين

• معرفش

“معرفش” الإجابة الرسمية لأي حاجة في الدنيا، تاكلي؟ معرفش، اوديك النادي “معرفش”، نتفرج على الفيلم ولا المسلسل؟ معرفش ، بني آدم مش عارف اي حاجة في حياته

• أبلة نظيرة

النوع ده جميل اوي الصراحة وبيحب يدلع ويغذي اللي حواليه، قناتها المفضلة CBC  سفرة وفتافيت، نجلاء الشرشابي وسالي فؤاد اهم من امها وابوها، بتقعد في المطبخ كتيييير اوي بس النتيجة بتبقى حلوة.

نصيحة: هداياها المفضلة مجلة فتافيت او صينية الكب كيكس السليكون.

• شريف فايد

اه و الله ده نوع لوحده، ده لو في Relationship Goals  و Friendship Goals  فشريف فايد هو ال Brotherhood Goals   اللي خد اخته تقابل فريق ريال مدريد شخصيا وحاجات تانية كتير مش عايزين نقولها عشان الولد مش ناقص حسد اكتر من كده.

• نائب بابا و ماما

ده غالبا بيكون الكبير و بيحب يفرد نفسه على اخواتة الصغيرين ويسيطر عليهم، فتلاقيه يسألهم رايحين فين جايين منين وممكن لو غلطوا يتبرع ويعاقبهم فيجي ابوه وامه يبهدلوه ويسمعوه كلام من عينة: اما نبقى نموت ابقى عاملهم كده وبعد كام يوم تيجي بقى فقرة الإزدواجية “امال لو متنا مين هياخد باله من اخواتك؟ انت مش شايفهم بيغلطوا؟”

• الغني

طول الوقت معاه فلوس مش بتخلص ومش بيرضى يسلف حد وحجته دايما بتبقى اصلك مش بترجع الفلوس، في ايه احنا اخوات هنخسر بعض عشان الفلوس؟ لأ والأخت الغنية دايما بيبقى عندها لبس كتير ولو جيتي بقى في يوم حابة تستلفي بلوزه استعدي لمعركة “كده لبسي هيوسع”

• الرايق / الرايقة

يبقى ابوها و امها بيتخانقوا بره وخلاص هيتطلقوا ودي قاعدة في اوضتها وبتسمع اغاني وبتحط مانيكير ولو ولد فهيبقى بيلعب بلاي ستيشن .

• ابو العريف

ده اللي يعرف كل المعلومات عن كل حاجة واي حاجة، وجملته الشهيرة اما حد يقول معلومة ” قديمة جدا وقولتلكوا عليها من زمان” جملته المفضلة: “انا مش عارف من غيري كنتوا عملتوا ايه” .

• أم العيال

ودي الأخت الكبيرة اللى اتجوزت اللي بتجلنا في الويك اند تشقلب حالنا هي و قطاقيطها، نفرش الملاية على الأرض ونتحول لكوكي بارك صوت عالي بقى وألعاب في كل حتة وجري و طبعا الشقاوة بتقلب بقلة ادب فتضطر امهم تزعقلهم فيعيطوا، فتلم هدومك من سكات وتروح تعيش في عربيتك في الويك اند.

• الطيب

وده اللى بيقول حاضر وطيب ونعم على أى حاجة، فهتلاقيه دايما بينزل يجيب طلبات البيت بنفس راضية وبيحضر السفر ويلمها مع ماما ومعندوش مشكلة يقف يغسل المواعين.. يعني حاجة كده “روح لسمسم، هو بيحب يصلى” خالص.