عزيزتي حواء، ان كنتي فاكرة نفسك برم وفاهمة كل حاجة، ومحدش يتوقعك، ف إليك الخبر التالي:
“انتي مش عارفة حاجة”، ان كنت فاكرة نفسك خبيرة في العلاقات، ومستشارة في الأمور الذكورية، وفاكرة ان كل الرجالة كائنات أحادية الخلية، إليك خمس أساطير، من واقع خبرتي الشخصية، واكتبي ورايا يمكن تنفعك يا بنتي انتي وهي.
  • الرجالة مش بتركز في التفاصيل.

اللي بيظهر للبنات، ولكل الناس عامة ان الرجالة كائنات بتسقط، مش مهتم، مش فاهم، مش واخد باله، انتي أكيد غلطانة، كل راجل عامة بيشوف كل حاجة، وبيعرف كل حاجة، بس الفكرة انه بيكسل، بيكسل يتكلم، بيكسل يعلق، بيكسل ياخد رد فعل أصلا، خلايا مخه في وضع السبات باستمرار، عينيه واخدة شكل العيون النايمة، وهو شايف كل حاجة بس مدكن.
نعمل ايه كبنات؟ نبطل نلوش يمين وشمال واحنا فاكرين انهم مش فاهمين ولا مركزين، فيه نوع م الرجالة أسخم م البنات في التفاصيل: انتي بتضحكي ليه؟ انتي حاطة بلاشر خوخي ليه؟ انتي ليه لابسة هيلز النهاردة؟ وهلم جرا..!
Guy-with-flowers-copy
  • الرجالة بتنسي.

99.9% من الرجالة مش بينسي، الرجالة ب”تتناسي”، الرجالة بتكسل بردو –سبحان الله- بتكسل تفتكر، التواريخ أصلا كتير صحيح، عيد ميلاده، عيد ميلاد صاحبته، عيد ميلاد أمه، عيد الشرطة، عيد تحرير سيناء، ف م الاخر بدل ما يفتكر كل الأعياد دي مبيفكرش فيها أصلا، م الاخر العيد عند أي راجل يعني أجازة، يعني بلاي ستيشن، يعني فسح وخروج.
نعمل ايه كبنات؟ خليكي ذكية، وانتي فكريه، فكريه بذكري أول مرة اتقابلتم، اعمليله ميمو ع الموبايل، فكريه بنوت صغيرة، حتي لو هو عيد ميلادك هاتيله انتي الهدية، اكسفيه وهو هيتحرج، بس من غير من ولا تنطيط، كأنك بتفكري نفسك.
MjAxMi01Njg0MjgyZTE4MDdhYWU2
  • الرجالة مش بتفكر ف ال”لا مؤاخذة”..!

انا م البنات المؤممنة بنظرية “شوّق ولا تدوّق” علي رأي الفنانة “لبلبة” في فيلم “نظرية عمتي”، منذ آلاف السنين، اتفق الخلق جميعا ان الرجالة كلها وبلا استثناء، كبير، صغير، تخين، رفيع، كلهم بيجمع تفكيرهم شئ واحد بس: “الجنس”.
لما الرجالة بتتجمع بيتكلمو علي الجنس، قدراتهم، عن الستات، عن الطرق، في النهاية، الشئ المسيطر علي عقل الذكر هو “التستستيرون”.
نعمل ايه كبنات؟ نتصرف عادي ولا كأننا واخدين بالنا من أي حاجة، لو لمح تلميح مش ظريف سيبك، إلا بحدود، كل علاقة عامة ولها حدود وانتي بس اللي بتحدديها وبتقدري تستوعبي متطلبات واحتياجات شريكك واحتياجاتك.
malemind
  • الرجالة كائنات ناضجة.

دي أكتر أسطورة محتاجة تتلغي بالكامل من تاريخ حياتنا، الرجالة عمرها ما كانت كائنات ناضجة، الرجالة بس أجسامهم كبيرة، الراجل ماهو إلا طفل كبر في الجسم لكن العقل لأ، أكتر حاجة بتبسطه هي “البلاي ستيشن” وأكتر حاجة بتبسطه هي “الأكل” وتاني متعة ليه بعد السكس هي “النوم” يعني كائن أولي بياكل ويشرب وينام، بس.
نعمل ايه كبنات؟ نتعامل معاه كأننا بنربي طفل صغير، كل ما تلاقيه قاعد مبيعملش حاجة فكريه بالماتشات اللي بتتذاع، حطيله أكل، ناوليه نسكافيه، العبي ف شعره، اضحكي في وشه، صدقيني كل ده بيفرق..!

Men-dont-grow-up

 

لقراءة الجزء الثاني : أساطير العلاقات – البنات