أساطير رعب مصرية ج2

فيما يلي لكم الجزء الثاني من الأساطير المصرية (لقراء الجزء الاول ) أساطير حطمت الخيال، واتنقلت من جيل لجيل، وبقت جزء من حواديت ما قبل النوم لكل طفل مصري رخم، بيقولك هات موبايلك، وبيقلب منك الفكة، وبي”تف علي عمو” يا حبيبي..!

• امسك حاجة حمرا

شئ شائع جدا ما بين البنات ان لو بنتين قالو نفس الكلمة مع بعض، اللي هتمسك فيهم حاجة لونها أحمر الأول هتتجوز..!عرفت الأسطورة دي لما كنت ماشية ف بين السرايات مرة زمان مع زميلة من زملاء الكلية، وانا وهي اتنيلنا قلنا نفس الكلمة، لقيتها عملت سبرنت هوائي مائي فجأة ومسكت ف حاجة حمرا متعلقة ولقيتها بتصرخ بانتصار..” انا هتجوز الأول.! – أصحاب العقول في راحة فعلا، والبنت متجوزتش..!

• الشبشب المقلوب

الأسطورة الأكثر شهرة، والي بسببها كل أطفال التسعينيات أخدو علق ياما..، اعدل الشبشب عشان حرام، طب حرام ليه؟ حرام كدة، طب لو سبته مقلوب هيحصل ايه؟ هتتسخط قرد، طب أهو “بيقلب الشبشب”، طب اهو “بيتضرب بيه” ! الناس فعلا حافظة مش فاهمة، يقولك الشبشب ف وش السما حرام، يعني السما هتسيب الكرة الأرضية كلها طولا وعرضا، وهتسيب الدول المتقدمة كلها وتيجي تمسك ف شبشبي انا!!

• الواد مسك المقص

أحد الحاجات الي أمي كانت بتجري ورايا بسببها وانا صغيرة هي “المقص”، لأني كنت غاوية لعب وقصقصة وانا صغننة، وهي عندها اعتقاد دفين بأن فتح المقص بالليل بيجيب الفقر، ليه؟ مين؟ فين؟ متفهمش..!

• الشلشلة

الشلشلة بالكوفيات والطرح هي أحد الأساطير الشعبية اللي ملهاش أي تسعين لازمة، بيقولك الشلشلة حرام، وبتجيب الفقر، وبتزعل الميتين، مع انها ملهاش أي أضرار غير انها ممكن تجيبلك التهاب ف قفاك من كتر الحك

• البوكيمون يهودي

طبعا مش محتاجين نتكلم علي اقراص البوكيمون الي اترمت في الزبالة اكوام اكوام، البوكيمون يهودي، الأسماء حرام، آش عميل اسرائيلي، كلمة بوكيمون معناها “انا يهودي” و”بيكا بيكا” معناها باحب اسرائيل، يا جماعة اسرائيل اسمها بالعبري “اسرائيل بردو” لا بوكيمون، ولا بيكا بيكا، والراجل الياباني الطيب اللي عمل الكارتون ده، لو كان يعرف كدة كان زمانه انتحر..!

دي كانت أحد أبرز عشر أساطير مصرية سمعتها من أمي وعشتها بنفسي، لو عندك أساطير تانية ياريت تشاركها معايا ف كومنت أو علي الفيسبوك بتاعي من هنا.