ستات مصر إشتغلوا في كل المجالات و أبدعوا , لكن في السينما و بالتحديد مجال الكوميديا صنعوا تاريخ خاص بيهم و دخلوا قلوب الكل , لدرجة أن من خفة دمهم حببونا في الستات و خلونا نبصلهم بنظرة مختلفة أنهم يقدروا يعملوا أي حاجة و هينفسونا بقوة. و دي قائمة أحسن كوميديانات في تاريخ مصر بالترتيب.
10 رجاء الجداوي
بأدائها السهل الممتنع أستاذة رجاء بتقدر تضحكك بشياكة كده و رقة يا لوتفي , ماحدش يقدر ينسي إفهاتها في مسرحية الزعيم و تيمور و شفيقة. فيها حاجة مميزة و لذيذة علي الرغم من مظهرها الأنيق و الجاد.
9 ياسمين عبد العزيز
قدرت بخفة كدة تثبت وجودها , نشيطة في أدائها و بتمثل بروح حلوة مفيش زيها و عندها كاريزما بتخلي الأطفال و الكبار يحبوها.من مميزتها أنها بتليق في أنواع كتيرة من الأدوار مش بس كوميدي.
8 حنان الطويل
مين يقدر ينسي ميس إنشراح و الست كوريا ,هي من أفضل الممثلات اللي كانوا بيبنوا شخصية كوميدية كاملة مش مجرد إفيهات و بس. إسلوبها الإنفعالي حتي كان مضحك جدا و بالفعل كانت هتبقي في مكانة تانية لكن للأسف المجتمع و العيلة مارحموهاش بس ربنا يرحمها زي ما ضحكتنا.
7 سعاد نصر
التمثيل قبول و هي عندها قبول رهيب و تتحب في كل أدوارها , دور ميسا في يوميات ونيس كان فعلا ماحدش هيقدر يعملوا غيرها. تقدر تضحك من غير إيفيهات إزاي ماتعرفش.
6 إسعاد يونس
أسلوب فريد من نوعه و كفاية تعبيرات وشها لوحده تقدر تضحكك , واحدة من أفضل الكوميديانات و عندها كاريزما خاصة , صاحبة السعادة بتدخل القلب بسهولة ماحدش يقدر مايحبهاش.
5 زينات صدقي
أيقونة الست الكوميدية في الزمن الجميل, واحدة بسيطة جدا هتموت علي عريس , أسلوبها و نبرة صوتها المميزة و الجمل الخاصة بيها بذات لما بتقولها بلغة فصحة مش هتتعوض , بالرغم من مشاكلها و نهايتها المؤثرة فضلت تضحك الناس. هتفضل في قلوبنا في العشرين من عمرها الوردي الزاهر المزدهر.
4 سهير البابلي
غير الكوميديا اللي قدمتها و مسرحية ريا و سكينة و مدرسة المشاغبين اللي بنشوفم دايما بدون ملل , لكن المسرحية السياسية الساخرة “ع الرصيف” واحدة من أحلي المسرحيات في تاريخ مصر اللي مش كتير شافوها بسبب منعها من العرض من سنين طويلة دي هتخليك تشوف أستاذة سهير بشكل تاني. أنت متخيل ازاي كانت بتمثل و المناصب الكبيرة قاعدة قدامها و هي بتسخر منهم و إزاي خلتهم مش قادرين يعملولها حاجة من كتر ما هما واقعين من الضحك. محترفة بمعني الكلمة و هي بتتريق بس بمعلمة.
مشهد من مسرحية “ع الرصيف”
https://www.youtube.com/watch?v=6rkvhFen1RY
3 إنعام سالوسة
بتحسها خالتك كده و بتهزر معاك في الفيلم , واحدة مننا دمها شربات و أدائها بسيط جدا بترمي الإفيه بسلاسة رهيبة زي الأمهات بظبط “لا مش أنت, البغل التاني”. لكن للأسف مش واخدة حقها و تستاهل تاخد أدوار أكتر.
2 عبلة كامل
رمز من رموز الكوميديا في مصر المعلمة فرنسا , تحسها هي اللي كاتبة السيناريو عشان تمثله بمزاج كده هي مش زي أي حد. بتمثل بكل حاجة فيها بنظرتها و تعبيرات الوش وحركة الإيد, دي حتي متقنة التراجيديا زي مشهد الأم في نهاية فيلم “عودة الندلة”, فعلا هي معلمة الكوميديا و الضحك بأدب بدون أي إسفاف أو ألفاظ خارجة.
1 ماري منيب
الأسطورة اللي مش هيجي زيها مهما طال الزمن , أداء إستثنائي بذات في دور الحمي عمروا ما هيتنسي , التعبيرات و الحركات بتاعتها مميزة جدا تحسها علي طبيعتها و هي بتتكلم مفيش أي تمثيل و الغريب أن دا عكس شخصيتها تماما و الكل قال عليها كانت مدام وقورة و هادية و راقية أوي بعكس المظهر البلدي اللي كانت بتقدموا في السخرية, تستحق تكون أفضل كوميديانة في تاريخ مصر.
دي كانت القائمة بتاعتنا قولنا بتحب مين فيهم أكتر و نفسك تضيف مين ليهم و شايف مين تستحق تكون رقم 1 ؟
