الأم المصرية بتتميز بقدرتها على ابتكار أساطير خرافية ممكن تستمر للأبد .. ده حقيقي وبيحصل بمرور السنين .. والدليل مجموعة من أشهر الأساطير والكدبات اللي اتربينا عليها وإحنا صغيرين وكنا أوقات بنصدقها .. لحد ما كبرنا واتصدمنا
وفي الموضوع ده هنتكلم عن أكتر 4 كدبات بتقولها الأم المصرية مهما اختلاف الزمان أو المكان

1- الأكل هيجري وراك يوم القيامة

3
تقريباً دي أول كدبة بنلبسها وإحنا صغيرين .. أمك بتبقى عايزة تأكلك كل اللي في الطبق بالعافية وأنت خلاص شبعت .. طب وبعدين .. راحت ابتكرت أسطورة “الأكل هيجري وراك يوم القيامة” .. ورغم أن الكلام شكله مش مقنع حتى للأطفال إلا إننا كان في حاجة جوانا بتصدق وبتخلينا نيجي على نفسنا عشان ناكل.
لما كبرنا بقى اكتشفنا أن ده كان كدبة من الحاجة .. غالباً عشان الأكل الباقي ده ميترماش .. أصل يعني الأكل مش تافه أوي للدرجة أنه يجري ورايا عشان يعورني مثلاً.

2- هجيبلك اللعبة وإحنا مروحين

2
تاني أكتر كدبة كنا بنلبسها وإحنا صغيرين .. تبقى ماشي مع أمك في الشارع وتشوف لعبة عاجباك .. فتروح قايلها “ماما أنا عايز اللعبة دي” .. طبعاً هي مقتنعة أنك عندك لعب كتير ومش محتاج لعب جديدة بس عارفة أنك هتفضل تزن .. تروح قايلاك “وإحنا مروحين هجيبهالك” .. على أمل أن المحل يكون قافل وأنتو مروحين وبكدة يكون القدر أنقذها .. أو يبقى فاتح بقى وتحاول تعمل من بنها وأنت بتستغيث لها أن المحل اهو .. أو تروح رامية الصدمة في وشك وتقولك مفيش لعب واللي يحصل يحصل.

3- ذاكر دلوقتي وارتاح في الأجازة

31
ودي كدبة مطاطية بتعيش معاك العمر كله .. يعني مثلاً في الإعدادية تقولك ذاكر والعب في الأجازة .. تيجي الأجازة تقولك هجيبلك كتب الثانوي تقرا فيها شوية .. في الثانوية تقولك ذاكر وريح في الكلية .. تيجي الكلية تقولك ذاكر وريح لما تتخرج .. تتخرج تقولك مش ناوي تشتغل بقى وتتجوز وتلم نفسك .. تقريباً كونسبت الراحة ده ملغي عند أي أم مصرية.

4- ده أنت ألف من تتمناك

7
ودي كدبة علاجية بعد ما تكون خارج من صدمة عاطفية .. بتبقى صعبان على أمك ومش عارفة تعملك إيه عشان تبسطك .. تروح رزعاك أسطورة “ألف من تتمناك دي” .. بس هي عارفة أن ده حقيقي ومفيش غير بنت أختها اللي هي عايزة تلبسهالك من وأنتوا عيال.

 

دول كانوا أكتر 4 كدبات بتقولها الأم المصرية لولادها من وجهة نظرنا .. قولوا لنا ذكرياتكم مع كل كدبة منهم .. ولو أنتو عندكو أولاد هل بتقولوا لهم نفس الكدبات دي ولا لا