فالبداية هي فكرة ان شلة من البنات يتجمعوا بتمر بمراحل كتير جدا وعمرها ما بتيجي فجاءة، خاصة لو هما عددهم كبير ومش ساكنين جنب بعض وشغلهم مش واحد، وأهم حاجة هي الاتفاق على اليوم والميعاد والمكان، ثم موافقة الأهل أوالزوج أوالصاحب والنصايح وتعليمات من اللي سبق ذكرهم بعدم التاخير وضحك بصوت عالي ومتركبش تاكسي لوحدها.
الفاشون
من أهم الحاجات اللي البنات بتتكلم فيها في العقدات بتاعهم هي الفاشون واخر اخبار الموضة، وقصة شعر شيرين، وتاتو هيفاء، ولفة طرحة مني عبد الغني، والفساتين في المسلسلات، وشكل الميكب اب في المسلسلات التركي، وخصومات محلات البراندات وخاصة فيكتوريا سكريت.
الجنس
على استحياء او من غير استحياء، البنات بتتكلم في الجنس عادي، وده بيدور على شكل أسئلة نقاشية، وغالبا في كل شلة بنات واحدة فاهمة إلى حدا ما وبتدي معلوماتها وواحدة مش فاهمة اي حاجة عن الجنس بمعني الكلمة.
العلاقات
والمقصود هنا بالعلاقات مش بس الراجل والست ولكن بتتضمن شكاوي عن الحرية وخاصة اننا في مجتمع شرقي البنت لحد ما حريتها مش كاملة زي الولد، او طنط اللي قالتها انتي ليه لسه متجوزتش وطنط اللي جابتلها عريس من السعودية، لو واحدة فيهم متجوزة يبقي الكلام عن جوزها وخروجاته واصحابه،بالإضافة إلى مشاكل مع الأهل وانهم ازاي مش قادرين يفهموا ان المجتمع اتغير وان البنت ممكن تعمل اللي هي عايزاها وعادي انها تلبس اللي هي حبها .
الدين
تشمل اخر دروس مصطفي حسني، واخر فتاوي الشيخ علي جمعة، وهل يجوز قص الشعر، والجزء الأهم لا حياء في الدين فكل الأسئلة اللي تيجي على بال بتتسأل وليها اجابات ولو مالهاش اجابات بيكون منتدي فتكات هو الدليل.
الشغل
وغالبا بيكون أسئلة عابرة عن الشغل عموما، عن المرتبات والعمولات والخصومات، وازاي تكسب ثقة المدير او المديرة، وعن اصحابهم في الشغل وعن الكراش اللي في الشغل وعن المشاكل وممكن يكون عن شغل البيت لواحدة من الشلة معندهاش شغل.
الأكل
وده حاجة شبة الفقرة المفتوحة، او فقرة اطلب واتمنى، وبيتم فيه تبادل الخبرات في تذوق الأكل، او طرق عمل الشاورما والفتة والحلويات، وطبعا افضل المطاعم والكافيهات اللي سيرفس بتاعتها كويسة.
حد يعرف
من الجروبات المعروفة على الفيسبوك وفيها عدد كبير جدا من البنات ،و على الجروب ده في كل ما يخاطر ببال اي بشر في الكون، واي بوست مثير للجدل لازم يتم المناقشة فيه وإبداء الأراء وانتقدها كمان.
بإختصار هي قعدات بسيطة بيدور في النقاش على أمور حياتية، مش زي ما في مخيلة وفي ولاد كتير اننا بنتجمع عشان نعمل مؤامرة كونية، أوقات بيحصل ده لو في واحدة عايزة تاخد حقها من الـ ex ده التجمع اللي يقلق .
