Honeymoon Phase
 زي ما بنقابل أنواع كتير من الشخصيات في الحياة الواقعية اللي بنعيشها كل يوم .. بنقابل برضه أنواع كتير من الشخصيات في عالم الإنترنت الافتراضي وخاصة في مواقع التواصل الاجتماعي وأهمها الفيسبوك.
من أول ما ظهر الفيسبوك وبدأ يسيطر على عالم الإنترنت في العالم كله ومش في مصر بس، وإحنا بقينا مصنفين لشخصيات مختلفة بحسب تصرفاتنا وسلوكياتنا وتفاعلنا على الفيسبوك، وممكن تكون شخصيتك الواقعية متفقة أو متعارضة مع شخصيتك الحقيقية .. الموضوع كله متوقف على طريقة استخدامك للفيسبوك.
أنواع الشخصيات اللي أنا هقولها كمان شوية دي كلنا قابلناها وبنقابلها في الفيسبوك .. اخواتك وقرايبك وصحابك وزمايلك في المدرسة أو الجامعة أو الشغل .. بس لكل منهم شخصية مختلفة على الفيسبوك واللي ممكن تكون مختلفة تماماً عن شخصيته الحقيقية.
الأنواع الجاية دي هي أكتر أنواع الشخصيات اللي هتقابلها على الفيسبوك:

 

  • المشيراتي

4
ودي شخصية بتعاني من مرض الشير اللا إرادي .. كل نشاطه على الفيسبوك معتمد على “الشير” .. أخبار .. صور .. فيديوهات .. كوميكس .. أي حاجة بتيجي في سكته بيعملها شير ومش بيكلف نفسه حتى عناء أنه يكتب تعليق حلو على الحاجة اللي شيرها ومعندهوش خيال أنه يكتب بوست بنفسه سواء كان البوست ده للهزار أو بيعبر عن رأيه في حاجة أو في أي مناسبة.
النوع ده بصراحة بيتعمله unfollow  وأنت ضميرك مستريح .. لإن الحاجات اللي هو مشيرها دي هتلاقيها كدة كدة ومش معقول يكون كل التايملاين بتاعك بوستات الشخص ده.
  • حرامي البوستات

2
وده بيتغذى على سرقة البوستات الحلوة والمسمعة جامد على الفيسبوك وبينسبها لنفسه .. مع أنه عارف كويس أن الناس عارفة أنه سارقها .. بياخد البوستات كوبي بيست زي ما هي .. حتى مش بيحط التاتش بتاعه .. ولو ضميره “بينقح” عليه ممكن يكتب في آخر البوست منقول أو Copied .. أو لو عايز الناس متاخدش بالها أنه سارق البوست وفي نفس الوقت ضميره واجعه بيكتب في آخر البوست cpd.
  • الجاسوس

596
ودي شخصية واخدة وضع ال Hidden على الفيسبوك .. هو شايف أن ما يدور حوله لا يستحق الاهتمام وبيراقب التايم لاين في صمت ومبيعملش حتى لايك ولو عن طريق الصدفة.
تدخل بروفايله تحس أنه العنكبوت معشش عليه وصدرك يوجعك من كتر التراب .. الشخصية دي بتدعي أن الفيسبوك ده للناس التافهة اللي بتحب تضيع وقتها وغالباً هو نفسه بيضيع وقت على الفيسبوك أكتر من غيره!
طب هنستثني القرايب من شخصية الجاسوس دي لأنهم هما أصلاً جواسيس في الحقيقة
  • الأبيح

3
كل واحد فينا مهما كان محترم بيبقى جواه طاقة سفالة محتاج يطلعها من وقت للتاني .. تطلعها في صحابك أو تطلعها في خناقة أو حتى لو وصل الأمر أنك تطلعها في حكم البلاي ستيشن بس لازم تطلعها .. وأحياناً بنلجأ للفيسبوك عشان نطلعها على أساس أن مفيش قيود ومحدش يعرفنا ” ده لو افترضنا أنك عرفت تهرب من قرايبك الجواسيس”
أنما الشخصية دي بقى معندهاش قيود والفيسبوك هو المكان الوحيد تقريباً اللي بتطلع فيه طاقة الأباحة دي .. والشخصية دي منتشرة بشكل أكبر بين الولاد

 

  • البرنس

33

ودي شخصية كلنا لازم نحترمها على الفيسبوك .. بيبقى عارف إزاي يستخدم السوشيال ميديا كويس .. بيعرف امتى يشير وامتى يعمل لايك أو كومنت .. زيارة بروفايله بالنسبة لك شيء ممتع لأنك هتلاقي كل البوستات اللي عنده حلوة .. وبيعرف يكتب تعليقات ظريفة وعنده خيال بيسمح له يعبر عن رأيه في بوست شخصي وعادة بيكون قليل الشير.