إزاي بيعبر كل برج عن غيرته؟

تعتبر الغيرة أمر طبيعي جدا بين أي اتنين بيحبوا بعض، لكن مفهومها بيختلف من شخص للتاني، فيه اللي بيعتبرها دليل قوي على الحب، وفيه اللي بيحس إنها حاجة غير مبررة طالما فيه ثقة بين الطرفين، والاختلاف ده ليه اسباب كتير أهمها اختلاف الشخصيات والطباع، ولإن الأبراج بتعتبر عامل من العوامل المهمة اللي بتحدد الملامح الأساسية الخاصة بكل شخصية، هنقولكوا انهاردة طريقة تعبير كل برج عن غيرته على حبيبه من خلال المقال ده.

برج الحمل

مواليد برج الحمل بيبانوا من برة كدة اقوياء وواثقين في نفسهم، لكنهم في الحقيقة بيكونوا دايما حاسين بعدم الأمان، وعشان كدة ساعات كتير بيغيروا غيره تكاد تكون غير مبررة وبيعيشوا تفاصيلها بشكل درامي جدا.

برج الثور

العند هي الصفة الأساسية اللي بيشتهر بيها مواليد برج الثور، وعشان كدة صعب جداً يظهر غيرته على حبيبه، ولإنه برج روتيني وعقلاني جداً فا عادة بيمشي ورا المنطق في كل تصرفاته ومشاعره، واللي من ضمنها الغيرة.

برج الجوزاء

برج الجوزاء بقى بيجيب من الأخر، يعني لو غيران هيقول بشكل صريح ومباشر، مالوش في اللف والدوران والسهوكة والتلميح من بعيد لبعيد ده.

برج السرطان

برج السرطان لما بيحب بيحب جدا وبيخلص قوي للي بيحبه وبيكون طول الوقت مستني منه يبادله نفس المشاعر، لكن لانه شديد الحساسية ومشاعره مهمة قوي بالنسباله، عادة بيكبت غيرته وبيحتفظ بيها لنفسه ومش بيظهرها.

برج الأسد

برج الأسد بقى غيور إلى ابعد الحدود، لدرجة انه ممكن يخنق اللي بيحبه ويعيشه في سجن، وده لإن بيعتبر شريك حياته ملكية خاصة مينفعش حد غيره يقرب منه او يتعامل معاه، ولو حصل وفكرت تستفذ غيرته هلاقي منه رد فعل عنيف وغير متوقع.

برج العذراء

برج العذراء عقلاني شويه، يعني بيغير جداً لكنه مش بيبين، بس في نفس الوقت انت هتحس من تعاملاته لإن غيرته بتستحوذ على جزء كبير من تفكيره وتصرفاته.

برج الميزان

برج الميزان مبيحبش يواجه، وده بيخليه يكبت غيرته جواه ويحتفظ بيها لنفسه، وبيكتفي بس بشوية تلميحات بسيطة كدة ويسيبك بقى تفهم لوحدك، ولو مفهمتش مش هيحاول يفهمك حتى، بس خلي بالك قوي انه على قد ما هيتحمل على قد ما هتكون قلبته لو اتماديت او مخادتش بالك.

برج العقرب

مواليد برج العقرب بقى دول رقم 1 في الغيرة، يعني تقدر تقول كدة مجانين، واحيانا كتير بتكون غيرتهم دي غير مبررة او منطقية، عندهم حب تملك وسيطرة بشكل مبالغ فيه.

برج القوس

 قليل قوي لما بيحس برج القوس بالغيرة، لكن لو حصل وشك فيك قول على نفسك يا رحمن يا رحيم لإنه مش هيعرف يتحكم لا في اعصابه ولا في ردود افعاله.

برج الجدي

برج الجدي بيغير عمال على بطال وطول الوقت، لكنّه مش بيبين غيرته وبيعرف ازاي يتحكم فيها ويسيطر عليها مش هي اللي تسيطر عليه.

برج الدلو

مفيش حد يقدر يتوقع مشاعر برج الدلو او يبرر تصرفاته، وده لإنه شاطر جدا في إخفاء مشاعره لابعد الحدود، وغيرته مش بتظهر غير في الحالات القصوى وبعد فترة طويلة من الكبت.

برج الحوت

برج الحوت هو الأقل غيرة من بين كل الأبراج، يمكن بسبب ثقته في نفسه او بسبب شخصيته القوية، المهم انه مبيعترفش بحاجة اسمها غيره ومبيحطهاش في حساباته اصلا.