كلنا طبعا سمعنا ألبوم عمرو دياب الجديد “معدي الناس”، وأكيد لفت نظركم أغنية “أجمل عيون” اللي عناها لأنثى “برج الحوت” وقال فيها ” والله بحبك .. وبحب برج الحوت .. وعشان تفاصيلك .. ضحك وبكا وسكوت .. لإنك الدنيا .. واللي يفوت يفوت”، ولإن عمرو دياب مقدرش خلال الأغنية انه يوضح كل صفات امرأة برج الحوت، وايه اللي ممكن يخلي الراجل يقع في حبها، قررت انهاردة اكشفلكوا أسرار المرأة الحوت في العلاقات العاطفية، وإزاي بتقدر بسهولة جداً نوقع أي راجل في حبها.
1-اهتمامها بيك “مبيطلبش”
المرأة الحوت عاملة زي “المصباح السحري” اللي بيقدر يحققلك كل امنياتك حتى من غير ما تطلبها، ولإن الراجل كمان بيحب الإهتمام مش بس الست، فا مولودة برج الحوت بتقدر تغرق الراجل اللي معاها في بحر من الإهتمام حتى من غير ما يطلب ده، بتهتم بتفاصيله وتفاصيل يومه وبتدخل نفسها في كل تفصيلة من تفاصيل حياته، فا بتخليه مع الوقت ميقدرش يستغنى عنها أو عن وجودها اللي فرضته على حياته.
2-حرباية في نفسها
ولما بقول هنا “حرباية” أكيد مش قصدي اني اغلط في برج الحوت، بالعكس تماماً، انا قصدي أن أنثى الحوت عندها قدرة رهيبة على انها تتأقلم مع كل الظروف وتتكيف مع طباع البشر المختلفة، وبكدة تقدر تريح الشخص اللي معاها بسهولة جداً وتحسسه قد ايه هي فاهماه وانه مش محتاج يعمل مجهود عشان يتعامل معاها أو يبقى قريب منها ومن شخصيتها.
3-هتخلصك من “مصاصي الطاقة”
مولودة برج الحوت عندها نظرة أيجابية وتفاؤلية للحياة، وده بيخليها تقدر بسهولة تخلصك من “مصاصي الطاقة” اللي في حياتك وتبطل مفعولهم بدعمها وتشجيعها المستمر ليك وقدرتها على تعزيز ثقتك بنفسك ودعم أفكارك وأرائك ومساعدتها ليك في القضاء على أي طاقة سلبية أو إحباط.
4- أسرارك معاها في بير
مولودة برج الحوت مش بس هتحسسك بالراحة في الكلام معاها وهتدور معاك على حلول لمشاكلك وهتدعم مشاعرك وأفكارك وتحتويك وتقف جنبك وتبقى في ضهرك في أي حاجة، لأ دي كمان هتكتم أسرارك وتحافظ عليها ومش هتخرجها برة أبداً مهما حصل، يعني احكيلها وانت مطمن أن مفيش مخلوق هيعرف حرف عنك ولا عن كلامك معاها.
