خلينا متفقين ان الستات موديين جدا ؛ متقلبين بس كمان لما تسيطر عليهم فانت عايش في سعادة تامة … ده لو قدرت تسيطر يعني .
ولو حصل – وهو هيحصل – انكم توصلوا لنقطة سد … تفركشوا بقي تتطلقوا اي كان شكل العلاقة فبالتاكيد ده مبيجيش فجاة .
ويمكن اقوي سبب لانهيار العلاقات هو الخيانة …والخيانة مبتجيش غير لما يكون احد الاطراف مش سعيد او مبقاش مكتفي بالعلاقة ؛ وطول ماهو مش سعيد هيبص برة وكمان الطرف التاني مع الوقت هيحس ..
المقال هنا للرجالة اكتر … ازاي تعرف ان صاحبتك/مراتك بتخونك مع حد تاني :
لما تعمل lock للموبايل بتاعها
عادة الستات مش بتعمل لوك للموبايل ؛ ولو من اول علاقتكم ده محصلش او كانت دايما قايللك الباسورد وفجاة اتغير اعرف انها بتخبي حاجة .
وانت مش هتفتح تليفونها تفتشه بس عالاقل هيبان برضه توترها لما تقرب منه او لما حد بيكلمها .
لما تبطل تقولك بحبك
الست المبسوطة علي طول بتحب تعبر عن ده ومعظم الستات – او هكذا اعرف- يحبوا يعبروا عن مشاعرهم طول الوقت وحتي اللي مبيقلوش معظم الوقت بتحسها معاهم .
لما تلاقي صاحبتك فجاة بطلت تقولك كلام حلو حتي لو كل كام يوم مرة … يبقي يابطلت تحبك ياما بتقوله لحد تاني فالاغلب .
لما تمسح المسجات
لو فاي لحظة وانت في ذورة الشك لقيتها بتمسح مسجات فاكيد هي مش زي الرجالة وبتمسح مسجات (التخسيس – الابراج ..الخ) لان دي هوياتهم الاساسية …في الاغلب هي خايفة انت تشوف حاجات بعينها .. الست اللي تمسح رسالة تبقي خايفة تتقفش بيها .
منفضة لك وراشقة مع اصحابها
العادي من الست انها بتحب تقضي اكتر وقت مع صاحبها ؛ من تجارب شخصية عديدة اكتشفت ان مهما كان البنت ناجحة وعملية فهي ممكن تقضي معاك يومك كله متزهقش – عكس الراجل اللي يحب يقعد عالقهوة ويلعب بلاي استشين – … ف لما تلاقي ده قل او بطلت تقولك يلا ننزل او نسهر سوا فالبيت حتي … او خروجاتها كترت مع صاحبتها او حتي بتعمل شوبينج كتير … ف كده هي حلقتلك وش وبتقضي وقتها مع حد تاني يامعلم .
سكس قليل
مع الوقت خصوصا الجواز بعد فترة طويلة ؛ العلاقة الجنسية بتقل ؛ بس في فرق بين العلاقات الطويلة اللي العلاقات الجنسية فيها بتقل او انهي تختفي تماما او يكون علاقاتكم مش طويلة بس مبقتش تقضي اي وقت حميمي معاها .
ف طبيعي لو مفيش سبب طبي يمنعكم من ده فاكيد انت مبقتش الراجل اللي هي عايزة تبقي معاها .
—-
طبعا لو كل النقط دي توافرت فاكيد مفيش شك انك بتتقرطس انما لو نقطة واحدة فيهم فمتخونهاش لانك ممكن تكون ظالمها .
اما للستات ف لو الراجل بيخونك … اعتقد مش محتاجة كل ده عشان تعرفي … الرجالة الخاينة بتتعرف بسرعة جدا .
