الروشنة مش سهلة، بس مستاهلة ، الروشنة هي مصطلح ظهر في مصر في بداية الألفية الثالثة، كطفلة ومراهقة تسعيناتية قضيت مراهقتي قدام القناة الأولي ثم روتانا كليب، كل ما حد يقول قدامي لفظ “روش” تنزل في دماغي صورة للفنان وائل نور في عزه، بالجيل، والانسيال الدهب الجنزير، والبنطلونات الي ليها كعب من تحت دي، كنت بكرهها عامة، المهم، مصطلح الروشنة اختلف في عصر السوشال ميديا، وبقي يساوي مجموعة لايكس، فانز، فولورز علي صفحتك، فيه ناس ملهاش شغلة ولا مشغلة غير انها تكون روشة.
ايمانا مني بإني لازم أساعد الشباب الصاعد، قررت أقولكم أكتر من طريقة عشان تكون روش:
-
اشتم كتير.
هي الشتيمة مش الهدف في حد ذاتها، هي وسيلة للظهور بأنك عميق، ومحدش قدك، يعني مثلا، قول رأيك في موضة التوربانز: ايه الخ%$^ا اللي البنات لابسينه ده فوق دماغتهم، بغض النظر انك فعلا ملكش دخل ف البنات لابسة ايه، وكل واحد حر ف راسه.
كذلك اعتمد الشتيمة كمبدأ في كل حاجة، الأكل، الشرب، مينفعش فيه كلمة تخرج من بقك مفيهاش سب للدين أو شتيمة بالأب والأم، انا قلتلك أهو، وكدة حطيتك علي أول سكك الروشنة.
-
حفل علي خلق الله.
استغل الأحداث الجارية، هات أي صورة مثلا من مجلس الشعب واهريها تريقة، ولا يهمك لو كانت صورة لسيدة معاقة حركيا، أو شخص فاقد بصره، مش مهم، المهم يا وحش اللايكس الكتير، هات الصورة، واعمل عليها كومكس، حطها علي أشهر صفحات الكومكس والساركازم، لم لايكس وفولورز كتير، صدقني انتا كدة بقيت عمدة الروشين.
-
اتريق ع الفنان “أحمد عبد العزيز”.
مؤخرا انتشرت حدوتة كدة للسف علي فنان محترم هو “أحمد عبد العزيز” بغض النظر عن طريقة تمثيله، أو أفورته، أو شنبه، إلا انه بجد راجل محترم، مبيعملش أعمال مش مناسبة لسنه، عمرنا ما سمعنا عن فضيحه ليه، وأولا وأخيرا محدش أجبرك انك تسف علي الراجل ده ليل نهار، وتجيب مقاطع يوتيوب، وتاخد سكرين شوتس وتضحك خلق الله عليه، وأقول لهذا الروش ربنا يسامحك، كما نستعير مقولة “إياد نصار” الشهيرة “لهذا خلق الله الريموت يا علي”.
-
سمي نفسك اسم غريب.
لو انتي بنت، الموضوع مختلف شوية، ممكن تدلعي الحاج الوالد، مثلا لو اسمه “عصام” زي حالاتي، ممكن يكون “عصومتي” ولو اسمك انتي “ريم” ممكن تسمي نفسك مثلا “رورو” ليظهر لكي عزيزتي اسم جديد لانج هو “رورو عصومتي” من خلال هذا الاسم عبري عن حبك للولد أبو تفاحة آدم، وأبو عروق ف ايده، وأبو دقن، وعن اشمئزازك وكرهك للفقراا يااااي Via IPhone 6 وكدة، أولا الفولورز هيبقو عندك آلاف، فيسبوكا وتويترا، زائد انك لو عملتي أكاونت انستاجرام هتنباساطي أوي.
-
اتصور صور غريبة.
لو معاك ألف ألفين جنيه محيرينك، ومعاك واحد صاحبك مش عارف تعمل بيه ايه، ممكن تأجر واحد فوتوجرافر، وتلبسو بنطلونات أخضر زرعي وحظاظات وتتصورو علي سكة القطر في المعادي، شيلو بعض، واحضنو بعض في أوضاع مريبة غريبة، عادي، بس الصور يا بوب هتخليك أروش واحد وسط صحابك، وباب رزق خرافي هيتفتح للفوتوجرافر ده من وراك.
-
اكتب Quotes كتير محدش فاهم معناها.
